LUKE 17

₁A raya barutwa ba gagwe a re: “Go retetse gore dikgopiso di se ka tsa tla; mme go latlhega ene yo di tlang ka ene. ₂Go ka bo go le molemo bogolo mo go ene fa lolwala lo ka bo lo gokeletswe mo thamong ya gagwe, mme a thabuediwa mo lewatleng, bogolo go fa a ka bo a kgopisa mongwe wa ba babotlana ba. ₃Itiseng: E re fa wa gaeno a go leofela, o mo omanye; mme fa a ikwatlhaya, o mo itshwarele. ₄Fa a go leofela gasupa ka letsatsi, mme a nna a boela mo go wena gasupa ka letsatsi a re: ‘Ke a ikwatlhaya,’ o mo itshwarele fela.”

₅Baaposetole ba raya Morena ba re: “Totisa tumelo ya rona.” ₆Morena a re: “Fa lo ne lo na le tumelo, e le kana ka tlhaka ya peo ya mosetara, lo ne lo ka raya setlhare se sa mosekamine lwa re: ‘Khumoga ka medi, o ye go tlhongwa mo lewatleng;’ se ne se tlaa lo utlwa.

₇“Ke mang wa lona yo e ka reng a na le motlhanka yo o lemang, kgotsa a disa dinku, e re a goroga a tswa kwa nageng, a ka mo raya a re: ‘Tla, o dule o je?’ ₈Bogolo a ga a mo reye a re: ‘Baakanya se ke lalelang ka sone, o ikokwaele, o ntirele, ke tle ke tsamaye ke je ke nwe; morago o tlaa itse go ja le go nwa?’ ₉A o tle a leboge motlhanka yoo ka a dirile dilo tse o di laoletsweng? ₁₀Go ntse jalo le lona, e tlaa re lo sena go dira dilo tsotlhe tse lo di laoletsweng, lo re: ‘Re batlhanka ba re se nang molemo; re dirile se e neng e le tshwanelo ya rona go se dira, fela.’ ”

₁₁Ga dirala ya re a sa ntse a etela kwa Jerusalema, a ralala fa gare ga Samaria le Galilea. ₁₂Ya re a tsena mo motsaneng mongwe, a kgatlhana le banna ba le some, e le balepero, ba emetse kwa kgakala; ₁₃mme ba tsholetsa mantswe a bone ba re: “Jesu, Morena re utlwele botlhoko!”

₁₄Ya re a ba bona, a ba raya a re: “Tsamayang, lo ye go itshupetsa baperesiti.” Ga dirala ya re ba sa tsamaya, ba ntlafala. ₁₅Mongwe wa bone o rile a ipona fa a fodisitswe a boa, a galaletsa Modimo ka lentswe le legolo. ₁₆A wela ka sefatlhogo fa fatshe fa dinaong tsa gagwe, a mo leboga; mme ya bo e le Mosamaria. ₁₇Jesu a bua a re: “A ba ne ba sa ntlafadiwa boo some? Ba ba 9 ba kae? ₁₈A go ne go sa bonwe ope yo o boang a tla go baka Modimo, fa e se moeng yo?” ₁₉Mme a mo raya a re: “Nanoga, o tsamaye; tumelo ya gago e go fodisitse.”

₂₀Mme e rile a bodiwa ke Bafarisai, gore bogosi jwa Modimo bo tlaa tla leng, a ba fetola a re: “Bogosi jwa Modimo ga bo tle ka go bonwa. ₂₁Le gone ga ba ketla ba re: ‘Bonang fano!’ kgotsa; ‘Bonang fale!’ Gonne bonang, bogosi jwa Modimo bo mo teng ga lona.”

₂₂A raya barutwa a re: “Metlha e tlaa tla e lo tlaa eletsang go bona letsatsi lengwe la malatsi a Morwa Motho ka yone, mme ga lo ketla lo le bona. ₂₃Ba tlaa lo raya ba re: ‘Bonang fale!’ kgotsa, ‘Bonang fano!’ Se tsamayeng, le fa e le go ba sala morago. ₂₄Gonne jaaka e a re fa logadima lo gadima ntlheng nngwe tlase ga legodimo, lo phatsimele kwa ntlheng e nngwe tlase ga legodimo; Morwa motho le ene o tlaa nna jalo mo motlheng wa gagwe. ₂₅Pele o na le go boga dilo di le dintsi, le go ganwa ke losika lo. ₂₆Jaaka go kile ga dirala mo metlheng ya ga Noa, go tlaa nna fela jalo le mo metlheng ya Morwa Motho. ₂₇Ba ne ba ja, ba nwa, ba nyala, ba neelwa nyalong, ga tsamaya ga tla letsatsi le Noa o tsenang mo ntlong e e kokobalang ka lone, mme morwalela wa tla wa ba senya botlhe fela. ₂₈Le jaaka go diretse mo metlheng ya ga Lote: Ba ne ba ja, ba nwa, ba reka, ba rekisa, ba tlhoma, ba aga; ₂₉mme ka letsatsi leo fela, le Lote o duleng mo Sotoma ka lone, ga nna molelo le sulefura mo go tswang legodimong, ga ba laila botlhe fela. ₃₀Go tlaa nna fela jalo mo motlheng o Morwa Motho o tlaa senolwang ka one.

₃₁“A e re mo letsatsing leo yo o mo godimo ga ntlo, mme dilo tsa gagwe di le mo ntlong, a se ka a fologa a ya go di tlosa; jalo le ene yo o kwa nageng, a se ka a boela kwa morago. ₃₂Gakologelwang mosadi wa ga Lote. ₃₃Le fa e le mang yo o tlaa batlang go boloka botshelo jwa gagwe, bo tlaa mo latlhegela; mme le fa e le mang yo o tlaa latlhegelwang ke botshelo jwa gagwe, o tlaa bo boloka. ₃₄Ke a lo bolelela ka re, e tlaa re mo bosigong joo, go tlaa bo go le batho ba le babedi ba tlhakanetse phate; mme mongwe o tlaa tsewa, yo mongwe a tlogelwe. ₃₅Basadi ba le babedi ba tlaa bo ba sila mmogo; mongwe o tlaa tsewa, yo mongwe a tlogelwe. ₃₆(Banna ba le babedi ba tlaa bo ba le mo nageng; mongwe o tlaa tsewa, yo mongwe a tlogelwe.)”

₃₇Mme ba mo fetola, ba mo raya ba re: “Kae, Morena?” A ba raya a re: “Kwa setoto se leng teng, manong le one a tlaa phuthegela teng.”