LUKE 15

₁Jaana bakgethisi botlhe le baleofi ba bo ba ne ba mo atamela go mo utlwa. ₂Bafarisai ba ngongorega le bakwadi, ba re: “Monna yo, o tshola baleofi, o ja nabo.” ₃Mme a bua setshwantsho se nabo a re:

₄“Motho ke ofe wa lona yo e ka reng a na le dinku di le lekgolo, mme fa nngwe ya tsone e timela, yo o se keng a tlogela tse di 99 mo nageng, a ye go batla e e timetseng, go tle go tsamaye a e bone? ₅Mme o tlaa re a sena go e bona, a e beye mo magetleng a gagwe, a itumele. ₆E re a tla mo gae a phuthe ditsala tsa gagwe le ba ga gabo, a ba reye a re: ‘Itumeleng le nna, gonne ke bonye nku etsho e e neng e timetse.’ ₇Ke a lo raya, go tlaa nna boitumelo fela jalo kwa legodimong ka ga moleofi a le mongwe fela yo o ikwatlhayang, bogolo go ka ga ba ba siameng ba le 99, ba ba sa direng boikwatlhao sepe.

₈“Kgotsa, mosadi ke ofe, yo e ka reng a na le madi a le some a selefera, fa a latlhegelwa ke le lengwe, a se ke a tshube lobone, a feela ntlo, a batla ka tlhaofalo go tsamaye a le bone? ₉O tlaa re a sena go le bona, a phuthe ditsala tsa gagwe le ba ga gabo a re: ‘Itumeleng le nna, gonne ke bonye ledi le le neng le ntatlhegetse.’ ₁₀Ke a lo raya, go boitumelo fela jalo fa pele ga baengele ba Modimo ka ga moleofi a le mongwe fela yo o ikwatlhayang.”

₁₁Mme a re: “Monna mongwe o ne a na le bana ba basimane ba le babedi. ₁₂Yo mmotlana wa bone a raya rraagwe a re: ‘Rra, nnaya mo e neng e tlaa nna ga me ga boswa.’ Mme a ba kgaoganyetsa dilo tse o tshelang ka tsone. ₁₃Mme ya re malatsi a ise a fete a le mantsi morago ga moo, ngwana yo mmotlana a phutha gotlhe, a etela kwa lefatsheng le le kgakala, mme a le gone a senya dilo tsa gagwe mo ditlhapelong tsa bofafalele. ₁₄Ya re a sena go di fedisa tsotlhe fela, ga wela mmopamo o mogolo thata mo lefatsheng leo; mme a simolola go nna mo pitlaganong. ₁₅Mme a ya a ineela mo go mongwe monni wa lefatshe leo, mme ene a mo isa kwa nageng ya gagwe gore a otlele dikolobe teng. ₁₆Mme a eletsa a ka bo a ka kgora moroko o o jewang ke dikolobe; mme a se ka a fiwa ke ope. ₁₇Mme e rile a itharabologelwa a re: ‘Kana batlhanka ba ba thapilweng ba ga rre ba bantsi jang, ba na le dijo tse di lekanyeng di ba di sala, mme nna ke swela fano ka tlala. ₁₈Ke tlaa nanoga ke ya kwa go rre, ke mo raya ke re: Rra, ke leofetse legodimo, le fa pele ga gago; ₁₉ka moo ga ke tlhole ke tshwanela go bidiwa morwao; ntira jaaka mongwe wa batlhanka ba gago ba ba thapilweng.’

₂₀“Mme a nanoga, a tla kwa go rraagwe. Ya re a sa ntse a le kgakala, rraagwe a mmona, mme a tlhomolwa ke pelo, a taboga, a ya a wela mo thamong ya gagwe, a mo atla. ₂₁Mme morwawe a mo raya a re: ‘Rra, ke leofetse legodimo, le fa pele ga gago, ga ke tlhole ke tshwanela go bidiwa morwao.’ ₂₂Rraagwe a raya batlhanka a re: ‘Ntshang seaparo se sentlentle ka bonako, lo se mo apese; lo mo rwese mohitsana mo letsogong, le ditlhako mo dinaong; ₂₃lereng namane e e nonneng, lo e tlhabe; mme a re jeng, re dire mokete o mogolo; ₂₄gonne yo morwaake o ne a sule, mme o bile o tshedile; o ne a latlhegile, mme o bonywe.’ Ba simolola go dira mokete.

₂₅“Jaana morwawe yo mogolo a bo a le kwa nageng; ya re a tla a atamela ntlo, a utlwa kopelo le pino. ₂₆Mme a bitsa mongwe wa batlhanka, a mmotsa a re: ‘Ke eng se se dirwang jaana?’ ₂₇A mo raya a re: ‘Monnao o tsile; mme rraago o tlhabile namane e e nonneng, ka gobo a mmonye a itekanetse fela.’

₂₈“Mme a nna bogale, a gana go tsena; mme rraagwe a tswela kwa go ene a mo rapela. ₂₉A fetola rraagwe a re: ‘Bona, ke go diretse ka dinyaga tse dintsi tse, le gone ga ke ise nke ke tlole taolo ya gago gope; le fa go ntse jalo, ga o ise o ko o nneye le fa e le potsane, gore ke dire mokete le ditsala tsa me. ₃₀Mme morwao yo, yo o supuditseng dilo tsa gago le baakafadi, o rile a sa ntse a tla fela, wa mo tlhabisa namane e e nonneng.’

₃₁“A mo raya a re: ‘Morwaaka, ke na nao ka metlha yotlhe, le tsotlhe tse e leng tsa me ke tsa gago. ₃₂E ne e le tshwanelo fa re ka dira mokete, ra ba ra itumela; gonne yo monnao o ne a sule, mme o bile o tshedile; o ne a latlhegile, mme o bonywe.’ ”