LUKE 12

₁Gone foo, fela go sena go phuthega boidiidi jwa batho, ba ba ba tla ba ba katakalana, a simolola go raya barutwa ba gagwe sa ntlha a re: “Lo itise mo sebedisong sa Bafarisai, se e leng boitimokanyo. ₂Ga go ne sepe se se bipilweng, se se se ketlang se senolwa; le fa e le se se fitlhegileng, se se ketlang se itsege. ₃Ke gone tsotlhe tse lo di buileng mo lefifing di tlaa utlwiwa mo leseding; le se lo se sebileng mo matlwaneng a a kwa teng, se tlaa kakanngwa mo ditlhoeng tsa matlo.

₄“Ke a lo raya ditsala tsa me ka re: Se boifeng ba ba bolayang mmele, mme kwa morago ba sa tlhole ba na le se ba ka se dirang. ₅Ke tlaa lo tlhagisa ka ga yo lo tlaa mmoifang; ka re: Boifang ene yo e tlaa reng a sena go bolaya, a bile a na le thata go latlhela mo moleteng, ee, ke a lo raya, boifang ene.

₆“Dithaga di le tlhano, a ga di rekwe ka madinyana a le mabedi? Mme go bo go se epe ya tsone e e lebalwang fa pele ga Modimo. ₇Le meriri ya ditlhogo tsa lona e badilwe yotlhe; ke gone, se boifeng; gonne lo molemo bogolo go dithaga di le dintsi.

₈“Ke a lo raya ka re, le fa e le mang yo o tlaa impolelang fa pele ga batho, Morwa Motho le ene o tlaa mo ipolela fa pele ga baengele ba Modimo; ₉mme yo o tlaa intatolang fa pele ga batho, o tlaa itatolwa fa pele ga baengele ba Modimo.

₁₀“Le mongwe le mongwe yo o tlaa buang lefoko le le tswitlang Morwa Motho, o tlaa go itshwarelwa; mme yo o tlhapatsang Mowa o o Boitshepo, ga a ketla a go itshwarelwa.

₁₁“Mogang ba lo isang fa pele ga ditsheko tsa matlo a thuto, le kwa balaoding, le bathata, lo se ka lwa tlhodiegela gore lo tlaa fetola jang, le fa e le gore lo tlaa reng, gongwe gore lo tlaa buang. ₁₂Gonne Mowa o o Boitshepo o tlaa lo ruta mo lobakeng loo fela se lo tshwanetseng go se bua.”

₁₃Mongwe mo bontsing a mo raya a re: “Moruti, bua le mogolole gore a kgaogane boswa le nna.” ₁₄Mme a mo raya a re: “Monna, ke dirilwe e mang moatlhodi le moabi mo go lona?” ₁₅A ba raya a re: “Tlhokomelang lo bo lo itise mo bopelotshetlheng; gonne botshelo jwa motho ga bo a ema mo letlotlong la dithoto tse o nang natso.”

₁₆A bua setshwantsho nabo a re: “Lefatshe la mohumi mongwe la ungwisa segolo. ₁₇Mme a ithaya a re: ‘Ke tlaa dirang ka ke se na mo ke ka bolokelang maungo a me teng?’ ₁₈A re: ‘Ke tlaa dira jaana: Ke tlaa rutla matlo a me a mabolokelo, ke aga a sele a magolo; mme ke tlaa bolokela mabele a me le dithoto tsa me teng. ₁₉Ke tlaa raya mowa wa me ke re: Mowa, o na le dithoto di tona, di boloketswe dinyaga di le dintsi; iketle, o je, o nwe, o dire mokete.’ ₂₀Mme Modimo wa mo raya wa re: ‘Seeleele ke wena, mowa wa gago o lopiwa mo go wena sigong jono; mme dilo tse o di baakantseng di tlaa nna tsa ga mang?’

₂₁“Le ene yo o ikhumelang fela a sa humele Modimo, o ntse fela jalo.”

₂₂A raya barutwa ba gagwe a re: “Ke gone ke lo rayang ke re: Se tlhobaeleng ka ga botshelo jwa lona, gore lo tlaa ja eng; le fa e le ka ga mmele gore lo tlaa apara eng; ₂₃gonne botshelo bo gaisa dijo, le mmele disparo. ₂₄Elang mahukubu tlhoko, lo bone fa a sa jale, a sa robe; ga a na letlole le fa e le sebolokelo; mme Modimo o a a jesa; lona lo tlhwatlhwa e kgolo jang go feta dinonyane! ₂₅Ke ofe wa lona yo o ikoketsang boleele jwa letsogo, le fa e le le lengwe fela ka go tlhobaela? ₂₆E ka re fa lo sa nonofa go dira se sennyennyane, ana lo tlhobaelelang tse dingwe? ₂₇Elang dithunya tsa masoma tlhoko, ka fa di golang ka teng; ga di dire, ga di otlhe; le fa go ntse jalo ke a lo raya, le ene Solomone, mo kgalalelong yotlhe ya gagwe, o ne a sa kgabe jaaka sengwe sa tseo. ₂₈Fa e bo ne ne Modimo o apesa bojang jo bo mo nageng jalo, jo e a reng gompieno bo eme mo nageng, e re ka moso bo latlhelwe mo pesetsong; bogolo jang a ga o ketla o apesa lona, lona ba lo tumelo e potlana?

₂₉“Se batleng se lo tlaa se jang, le se lo tlaa se nwang, le gone lo se ka lwa etsaetsega. ₃₀Gonne dilo tsotlhe tse, di batlwa ke merafe ya lefatshe; mme Rraeno o a itse fa lo tlhoka dilo tse. ₃₁Bogolo batlang bogosi jwa one, mme dilo tsotlhe tse, lo tlaa di okelediwa.

₃₂“Letsomanyane, se boifeng, gonne Rraeno o natefelwa ke go lo naya bogosi. ₃₃Rekisang tse lo nang natso, mme lo ntshe maatso; itireleng dipatana tsa madi tse di sa onaleng, lohumo kwa magodimong lo lo sa tlhaeleng, kwa go sa atameleng legodu lepe teng, le fa e le motoutwana go senya teng. ₃₄Gonne kwa lohumo lwa lona lo leng teng, dipelo tsa lona le tsone di tlaa nna teng.

₃₅“A ditheka tsa lona di tlangwe, le dipone tsa lona di tuke; ₃₆le lona lo nne jaaka batho ba ba lebeletseng morena wa bone, fa a boa kwa modirong wa nyalo; gore e tle e re a tla a kgwanyakgwanya, ba mmulele ka bofefo. ₃₇Go sego batlhanka bao, ba e tlaa reng morena wa bone a tla, a ba fitlhele ba lebeletse; ammaaruri, ke a lo raya, o tlaa ikokwaela, a ba dudisa go ja, mme o tlaa tla a ba neela dijo. ₃₈Fa a ka tla ka tebelo ya bobedi bosigo, le fa a ka tla ka tebelo ya boraro, mme a ba fitlhela jalo, ba bo ba le sego batlhanka bao. ₃₉Itseng se, gore fa mong wa ntlo a ka bo a itsile nako e legodu le tlaa tlang ka yone, o ka bo a disitse, mme a ko a se ka a leseletsa ntlo ya gagwe ya phunngwa. ₄₀Le lona etleetsegang; gonne Morwa Motho o tla ka nako e lo sa e gopoleng.”

₄₁Foo Petere a mo raya a re: “Morena, setshwantsho se, a o se bua le rona, kgotsa o se bua le botlhe fela?”

₄₂Morena a re: “Molebalebi yo o ikanyegang, yo o botlhale, e be e le mang, yo morena wa gagwe o tlaa mo laodisang ba ntlo ya gagwe, gore a ba abele dijo mo lobakeng lo e leng lone? ₄₃Go sego motlhanka yoo, yo e tlaa reng morena wa gagwe a tla, a mo fitlhele a ntse a dira jalo. ₄₄Ammaaruri ke a lo raya, o tlaa mmaya molaodi wa dilo tsotlhe tse o nang natso. ₄₅Mme fa motlhanka yo a ka ithaya mo pelong ya gagwe a re: ‘Morena wa me o diegile go tla;’ mme a simolola go betsa batlhanka le malata, le go ja le go nwa, le go tagwa; ₄₆morena wa motlhanka yoo o tlaa tla ka letsatsi le o sa mo lebeleleng ka lone, le ka nako e o sa e itseng, mme o tlaa mo kgwathisa thata, a mo laolela kabelo ya gagwe le ba ba se nang boikanngo.

₄₇“Mme motlhanka yo o itsileng go rata ga morena wa gagwe, mme a se ka a ipaakanya, le fa e le go dira ka fa go rateng ga gagwe, o tlaa bediwa dithupa di le dintsi. ₄₈Mme yo o se kang a itse, mme a dira dilo tse di tshwanetseng dithupa, o tlaa bediwa dithupa di le dipotlana. Le gone, le fa e le mang yo o neilweng segolo, go tlaa lopiwa segolo mo go ene; le motho yo batho ba mo neetseng go le gotona, ba tlaa lopa mo go fetisang mo go ene.

₄₉“Ke tsile go latlhela molelo mo lefatsheng; mme ke sa eletsa eng fa jaana o setse o gotsitswe? ₅₀Ke na le kolobetso e ke nang le go kolobediwa ka yone; mme ke pitlaganye jang go tsamaye go dirafale! ₅₁A lo itlhoma gore ke tsile go aba kagiso mo lefatsheng? Ke a lo raya, nnyaa; mme bogolo kgaogano. ₅₂Gonne go tloga fano batho ba le batlhano, ba e leng ba ntlo e le nngwe fela, ba tlaa kgaogana, ba bararo ba ganele le ba babedi, le ba babedi ba ganele le ba bararo. ₅₃Ba tlaa kgaogana: Rra motho a ganele le morwawe, le morwa a ganele le rraagwe; mma motho a ganele le morwadie, le morwadi a ganele le mmaagwe; matsala a motho a ganele le ngwetsi ya gagwe; ngwetsi le matsalaagwe.”

₅₄Le gone a raya matshutitshuti a batho a re: “E a tle e re lo bona leru le tlhatloga kwa bophirimatsatsi, lo re: ‘Go tla mookodi;’ mme go dirafale jalo. ₅₅E re lo bona phefo ya borwa e foka, lo re: ‘Go tlaa nna mogote o o fisang;’ mme go dirafale. ₅₆Baitimokanyi ke lona, lo itse go phutholola ponalo ya legodimo le ya lefatshe; mme go ntse jang lo sa itse go phutholola motlha ono?

₅₇“Ana, mme go ntse jang, lona ka losi ga lo sekasekeleng se se siameng? ₅₈Gonne e a re fa o ya le moganetsi wa gago kwa molaoding, o tlhoafalele gore o re o sa ntse o le mo tseleng, o gololwe mo go ene; gore e se re kgotsa a go gogela fa pele ga moatlhodi, mme moatlhodi a go neela leotlana, mme leotlana le go latlhela mo ntlong ya kgolegelo.

₅₉“Ke a go bolelela, ga o ketla o tswa teng gope, o ise o bo o lefe ledinyana la bofelo pele.”