LEFITIKO 6

₁Jehofa a bua le Moše a re: ₂“Fa motho mongwe a leofa, a tlola taolo ya ga Jehofa, a tsietsa wa ga gabo ka ga sengwe se o se neetsweng, kgotsa sengwe se se golaganetsweng, kgotsa sengwe sa bogodu, kgotsa a patikile wa ga gabo, ₃kgotsa a begile selo se se latlhegileng, a tsietsa ka ga sone, a ikana ka maaka, mo go sengwe sa dilo tse tsotlhe se motho o se dirileng, fa a leofa ka sone, ₄foo go tlaa dirala gore e tlaa re fa a leofile, mme a le molato, a buse se o se tseileng ka bogodu, kgotsa se o se bonyeng ka patiko, kgotsa leneelo le o le neetsweng, kgotsa se se latlhegileng se o se begileng. ₅Kgotsa e le sengwe fela se o ikanneng ka ga sone ka tsietso; a a se buse fela ka botlalo, mme a oketse ka kgaogano ya botlhano; a a se neye ene yo selo e leng sa gagwe, mo letsatsing le o fitlhetsweng a le molato ka lone. ₆A a ise tshupelelo ya gagwe ya molato mo go Jehofa, e le phelefu e e se nang bogole e e tswang mo letsomaneng, ka fa o e beelang tlhwatlhwa ka gone, gore e nne tshupelelo ya molato, a e ise moperesiting. ₇Moperesiti o tlaa mo direla tetlanyo fa pele ga Jehofa, mme o tlaa itshwarelwa, ka ga sengwe le sengwe se o ka se dirang, mme a nna molato ka ga sone.”

₈Jehofa a bua le Moš a re: ₉“Laola Arone le bomorwawe o re: O ke one molao wa tshupelo e e fisiwang; tshupelo e e fisiwang e lale mo isong mo sebesong, go ya go fitlha mo mosong; molelo wa sebeso a o nne tuke fela mo go sone. ₁₀A moperesiti a apare seaparo sa gagwe sa leloba a ba a tswese nama ya gagwe ka diputlela tsa leloba; a ole molora wa tshupelo e e fisiwang, e molelo o e jeleng mo sebesong, a o beye ka fa thoko ga sebeso. ₁₁A a apole diaparo tsa gagwe, a apare diaparo di sele, a ise molora kwa ntle ga bothibelelo kwa felong fa gontle. ₁₂Molelo o o mo sebesong o nne o tukisiwe fela mo go sone, a o se time; moperesiti a nne a tsenye dikgong mo go one ka mesomeso, le gone a rulaganye tshupelo e e fisiwang mo go sone, a ba a fisetse mafura a ditshupelo tsa kagiso mo godimo ga sone. ₁₃A molelo o nne o tukisiwe mo sebesong ka metlha yotlhe; a o se time gope.

₁₄“O ke one molao wa tshupelo ya boupe: a bomorwa Arone ba e ise fa pele ga Jehofa, fa pele ga sebeso. ₁₅Moperesiti a tabole ka legofi ga setou sa tshupelo ya boupe le ga lookwane lwa sone, le lebano lotlhe le le mo tshupelong ya boupe, mme a a di fisetse mo sebesong, e le monko o o monate mo go Jehofa, e le morafolo wa yone. ₁₆Se se setseng sa sone Arone le bomorwawe ba tlaa se ja, a se jewe se sa bedisiwa, mo felong gongwe ga boitshepo, ba se jele mo lolwapeng lwa mogope wa bophuthegelo. ₁₇A se se besiwe se tsentswe sebediso. Ke se ba neile, e le kabelo ya bone ya ditshupelo tsa me tse di dirwang ka molelo; se boitshepo jo bo itshepileng, e le tshupelelo ya boleo le tshupelelo ya molato. ₁₈Senna sengwe le sengwe mo baneng ba ga Arone se ka se ja, e le tshiamelo ya bone, go ya le dikokomana tsotlhe tsa lona, e tswa mo ditshupelong tsa ga Jehofa tse di dirwang ka molelo; le fa e le mang yo o di amang o tlaa nna boitshepo.”

₁₉Jehofa a bua le Moše a re: ₂₀“Se ke sone seromololo sa ga Arone le sa bomorwawe, se ba tlaa se isetsang Jehofa ka letsatsi le o tlodiwang ka lone; kgaogano ya bosome ya emere ya setou, e le tshupelo ya boupe ya metlha yotlhe, bontlhanngwe jwa sone mo mosong le bontlhanngwe jwa sone maitseboa. ₂₁A se dirwe mo pitsaneng e e besetsang se na le lookwane; fa se sena go kolobediwa, o se ise mo teng; tshupelo ya dijo o e ise e le dikabetla tse di besitsweng, e le monko o o monate mo go Jehofa. ₂₂Moperesiti yo o tloditsweng wa bomorwa Arone, yo o tlaa bong a le mo boemong jwa gagwe, a se ise; se fisediwe Jehofa sotlhe fela, ke molao ka bosakhutleng. ₂₃Tshupelo nngwe le nngwe ya boupe ya moperesiti, e fisiwe yotlhe fela, a e se jewe.”

₂₄Jehofa a bua le Moše, a re: ₂₅“Bua le Arone le bomorwawe o re: O ke molao wa tshupelelo ya boleo, mo felong fa tshupelo e e fisiwang e tlhabelwang teng, tshupelelo ya boleo le yone e tlhabelwe gone, fa pele ga Jehofa; e boitshepo jo bo itshepileng. ₂₆Moperesiti yo o e isetsang boleo a a e je; e jelwe mo felong gongwe ga boitshepo mo lolwapeng lwa mogope wa bophuthegelo. ₂₇Le fa e le mang yo o tlaa amang nama ya yone, o tlaa nna boitshepo; fa go tsapogetse madi a yone mo seaparong sengwe, se madi a se tsapogetseng, o se tlhatswe mo felong gongwe ga boitshepo. ₂₈Pitsa ya letsopa e tshupelo e apeilweng ka yone a e thujwe; fa e apeilwe ka pitsa ya kgotlho a e gotlhwe, e be e tsokodiwe ka metsi. ₂₉Senna sengwe le sengwe mo baperesiting se ka ja ga yone, e boitshepo jo bo itshepileng. ₃₀Tshupelelo ya boleo, e madi mangwe a yone a isiwang mo mogopeng wa bophuthegelo, a ya go dira tetlanyo mo felong ga boitshepo, a go se jewe epe, e fisiwe ka molelo fela.