LEFITIKO 25

₁Jehofa a bua le Moše mo thabeng ya Sinai, a re: ₂“Bua le bana ba Iseraele o ba reye o re, e tlaa re lo fitlha mo lefatsheng le ke le lo nayang, foo lefatshe le tlaa ilelela Jehofa Sabata. ₃Lotlhagare lwa gago o tlaa lo jala ka dinyaga di le thataro, le tshimo ya gago ya mofine o e pome dikala ka dinyaga di le thataro, o phuthe maungo a yone; ₄ka ngwaga wa bosupa a go nne Sabata wa boikhutso jo bo masisi jwa lefatshe, Sabata o o nnelang Jehofa, o se ka wa jala lotlhagare lwa gago, le fa e le go poma dikala tsa tshimo ya gago ya lofine. ₅Matshwabudu a thobo ya gago o se ka wa a roba, le maungo a mofine wa gago o o se kang wa pongwa dikala o se ka wa a fula, e nne ngwaga wa boikhutso jo bo masisi jwa lefatshe. ₆Sabata wa lefatshe e tlaa nna dijo mo go lona; mo go wena, le motlhanka wa gago, le lelata la gago, le motlhanka wa gago yo o thapetsweng tuelo, le moeng wa gago yo o jakileng nao; ₇le dikgomo tsa gago, le dilo tsotlhe tse di mo lefatsheng la gago, totafalo yotlhe ya lone e tlaa nna dijo.

₈“O tlaa ipalela boSabata ba supa ba dinyaga, dinyaga di supa gasupa; go tlaa nna go wena malatsi a boSabata ba supa ba dinyaga, e bong dinyaga di le 49. ₉Foo o utlwatse ka ntlha tsotlhe lonaka lo lo kodu e tona, ka letsatsi la lesome la kgwedi ya bosupa; ka letsatsi la tetlanyo lo utlwatse lonaka mo lefatsheng lotlhe la lona. ₁₀Lo itshepise ngwaga wa 50, lo bolele kgololego mo lefatsheng lotlhe, lwa banni botlhe ba lone; e nne Jubile (ke go re, Ngwaga wa bothamo) mo go lona; motho mongwe le mongwe o tlaa boela mo bosweng jwa gagwe, motho mongwe le mongwe o tlaa boela mo losikeng lwa gagwe. ₁₁Ngwaga oo wa 50 e nne Jubile go lona; lo se ka lwa jala le fa e le go roba matshwabudu, le fa e le go phutha maungo a mafine a a se kang a pongwa dikala, ₁₂gonne ke Jubile, e nne boitshepo go lona; lo tlaa ja totafalo ya one e tswa mo lotlhagareng.

₁₃“Mo ngwageng oo wa Jubile lo busetse motho mongwe le mongwe kwa bosweng jwa gagwe. ₁₄Fa o rekisa sengwe mo go wa gaeno, kgotsa o reka sengwe mo go wa gaeno, lo se ka lwa patikana; ₁₅o tlaa reka mo go wa gaeno ka fa palong ya dinyaga morago ga Jubile, le ene a a rekise mo go wena ka fa palong ya dinyaga tsa dithobo tse di tlaa bonwang. ₁₆O tlaa godisa theko ya ka fa bontsing jwa dinyaga, o bo o fokotse theko ka fa bobotlaneng jwa dinyaga, gonne o rekisa mo go wena bokae jwa dithobo, ₁₇Lo se ka lwa patikana; o boife Modimo wa gago, gonne ke nna Jehofa Modimo wa gago.

₁₈“Ke gone ka moo lo direng melao ya me, lo tshegetse dikatlholo tsa me lo di dire; mme lo tlaa aga mo lefatsheng ka polokego. ₁₉Lefatshe le tlaa ntsha loungo lwa lone, lo tlaa ja lo kgora, lo aga mo go lone ka polokego.

₂₀“Fa lo re: ‘Re tlaa ja eng ka ngwaga wa bosupa, re sa jale, le fa e le go phutha totafalelo ya rona?’ ₂₁Foo ke tlaa laola gore tshegofatso ya me e nne mo go lona ka ngwaga wa borataro, mme o tlaa ungwa loungo lwa dinyaga tse tharo. ₂₂Lo tlaa jala ka ngwaga wa bo 8, lo ntse lo ja maungo a a beilweng gale, go ya go fitlha mo ngwageng wa bo 9, go tsamaya maungo a one a tsena, lo tlaa ja mo go sa leng go bewa bogologolo.

₂₃“Lefatshe a le se rekisediwe ruri, gonne lefatshe ke la me, gonne lona lo baeng le bajaki ba me.

₂₄“Mo lefatsheng lotlhe la boswa jwa lona, lo tlaa lesa lefatshe le rekololwa. ₂₅E tlaa re fa ngwana wa ga rraago a humanegile, a rekisa bontlhanngwe jwa boswa jwa gagwe, foo tsala ya gagwe e e rulaganyeng nae ka go tsalwa, a a tle a rekolole se ngwana wa ga rraagwe o se rekisitseng. ₂₆E re fa motho a se na ope yo o se rekololang, mme a tloga a huma, a ba a bona mo go lekanyeng go se rekolola ka esi, ₂₇foo a a bale dinyaga tsa thekiso ya sone, mme mo go setseng a a go busetse mo go yo boswa bo rekisitsweng mo go ene, a boele mo bosweng jwa gagwe. ₂₈Fa a sa nonofa go ba a bo bona ka esi, foo se o se rekisitseng se tlaa sala mo seatleng sa yo o se rekileng, go ya go fitlha mo ngwageng wa Jubile; mo ngwageng wa Jubile se tswe, mme a boele mo bosweng jwa gagwe.

₂₉“Fa motho a rekisa ntlo e e nnwang e le mo motseng o o dithako, foo o ka e rekolola mo teng ga ngwaga o o tletseng e sena go rekisiwa, o tlaa dira le tshiamo ya go e rekolola ka ngwaga o o tletseng. ₃₀Fa e se ka ya rekololwa mo teng ga ngwaga o o tletseng, foo ntlo e e mo motseng o o dithako e tlaa tlhomamiselediwa ene yo o e rekileng ka bosakhutleng, go ya le dikokomana tsa gagwe; ga e ketla e tswa ka Jubile. ₃₁Mme matlo a metsana e e se nang dithako mo tikologong ya yone, a kaiwe jaaka matlhagare a lefatshe, a ka rekololwa e bile a tlaa tswa ka Jubile. ₃₂Le fa go ntshe jalo metse ya Balefi, matlo a metse ya boswa jwa bone, Balefi ba ka a rekolola ka lobaka longwe le longwe fela. ₃₃Fa motho wa Molefi a sa rekolole, foo ntlo e e neng e rekisitswe, le motse wa boswa jwa gagwe, di tlaa tswa ka Jubile, gonne matlo a metse ya Balefi ke boswa jwa bone mo Baiseraeleng. ₃₄Naga e e mo tikologong ya dintlhana tsa metse ya bone, ga e ka ke ya rekisiwa, gonne ke boswa jwa bone jwa bosakhutleng.

₃₅“Fa ngwana wa ga rraago a humanegile, letsogo la gagwe le tlhaela mo go ene; foo o mo thuse, o tlaa go agela jaaka moeng le mojaki. ₃₆O se ka wa tsaya tuelo mo go ene, le fa e le koketso; o boife Modimo wa gago, gore ngwana wa ga rraago a nne nao. ₃₇O se ka wa mo neela madi a gago ka go lopa tuelo, le fa e le go mo naya dijo tsa gago go tla o bona koketso. ₃₈Ke nna Jehofa Modimo wa lona yo ke lo ntshitseng mo lefatsheng la Egepeto, go tla ke lo naya lefatshe la Kanana, gore ke nne Modimo wa lona.

₃₉“Fa ngwana wa ga rraago a humanegile fa go wena, mme a ithekisa mo go wena, o se ka wa mo dirisa jaaka yo e leng motlhanka tota. ₄₀A a nne nao jaaka motlhanka yo o thapetsweng tuelo, le jaaka mojaki; a a go direle go ya go fitlha mo ngwageng wa Jubile, ₄₁foo a a tswe mo go wena, ene le bana ba gagwe nae, a boele kwa ga gagwe a be a boele kwa bosweng jwa borraagwe. ₄₂Gonne ke batlhanka ba me ba ke ba ntshitseng mo lefatsheng la Egepeto; ba se rekisiwe jaaka batlhanka fela. ₄₃O se ka wa mo laola ka bopeloethata; o boife Modimo wa gago. ₄₄Ka ga ba e leng batlhanka ba gago, ba banna le ba basadi, ba o tlaa dirang nabo; mo merafeng e e mo tikologong ya lona, lo ka reka batlhanka mo go bone, ba banna le ba basadi. ₄₅Gape le mo baneng ba baeng ba ba jakileng mo go lona, lo ka reka bone, le ga ditshika tsa bone tse lo nang natso, tse ba di tsaletseng mo lefatsheng la lona, ba ka nna boswa jwa lona. ₄₆Lo ka ba dira boswa jwa bana ba lona morago ga lona, go ba rua e le boswa; mo go bone, lo ka tsaya batlhanka ba lona ka bosakhutleng, mme bana ba ga rraeno, bana ba Iseraele, lo se ka lwa ba laola ka bopeloethata, mongwe a laola yo mongwe.

₄₇“E tlaa re fa moeng mongwe, kgotsa mojaki yo o nang nae a humile, mme ngwana wa ga rraago a humanegela fa go ene, a ithekisa mo moennyeng, kgotsa mo mojaking yo o nang nae, kgotsa mo tsaleng nngwe ya losika lwa moeng, ₄₈e tlaa re fa a sena go rekisiwa, a bo a ka rekololwa. Mongwe ngwana wa ga rraagwe o ka mo rekolola; ₄₉kgotsa rangwanaagwe, kgotsa morwa rangwanaagwe o ka mo rekolola, kgotsa mongwe fela yo o gaufi nae ka go tsalwa, e le wa losika lwa gagwe o ka mo rekolola; kgotsa fa go humile ene ka esi, o ka ithekolola. ₅₀O tlaa bala le yo o neng a mo rekile, go simolola ka ngwaga o o ithekisitseng mo go ene ka one, go ya ngwageng wa Jubile, mme madi a thekiso ya gagwe a tlaa nna ka fa bokaeng jwa dinyaga; o tlaa nna nae ka fa lobakeng lwa motlhanka yo o thapetsweng tuelo. ₅₁E tlaa re fa go sa ntse go le dinyaga di le dintsi, o tlaa busa madi a thekololo ya gagwe ka fa palong ya dinyaga, e le ga madi a o rekilweng ka one. ₅₂E tlaa re fa go sa setse dinyaga di le dipotlana go ya ngwageng wa Jubile, foo a a bale nae; o tlaa busa madi a thekololo ya gagwe ka fa palong ya dinyaga tsa gagwe. ₅₃A a nne nae jaaka motlhanka yo o thapetsweng tuelo ka ngwaga le ngwaga; a se ka a mo laola ka bopeloethata mo ponong ya gago. ₅₄Fa a sa rekololwe ka mokgwa o o ntseng jaana, foo o tlaa tswa ka ngwaga wa Jubile, ene le bana ba gagwe nae; ₅₅gonne bana ba Iseraele ke batlhanka kwa go nna; ke batlhanka ba me ba ke ba ntshitseng mo lefatsheng la Egepeto, ke nna Jehofa Modimo wa lona.