Ka ga tse di sa itshekang tse di tswang mo mmeleng wa motho
1Jehofa a bua le Moše le Arone a re: 2“Buang le bana ba Iseraele, lo ba reye lo re: Fa monna mongwe a na le keleketlo e e tswang mo nameng ya gagwe, o itshekologile ka ntlha ya keleketlo ya gagwe. 3Se e tlaa nna boitshekologo jwa gagwe mo keleketlong ya gagwe; le fa nama ya gagwe e dutla ka keleketlo ya gagwe, kgotsa fa nama ya gagwe e kgala mo keleketlong ya gagwe ke boitshekologo jwa gagwe. 4Bolao bongwe le bongwe jo yo o nang le keleketlo o robalang mo go jone, bo tlaa nna itshekologo, le sengwe le sengwe se o nnang mo go sone se tlaa nna itshekologo. 5Le fa e le mang yo o amang bolao jwa gagwe, a a tlhatswe diaparo tsa gagwe, a tlhape mo metsing, mme a itshekologe go ya maitseboeng. 6Le yo o nnang mo go sengwe se yo o nang le keleketlo o ne a ntse mo go sone, a a tlhatswe diaparo tsa gagwe, a tlhape mo metsing, mme a itshekologe go ya maitseboeng. 7Le yo o amang mmele wa yo o nang le keleketlo, a a tlhatswe diaparo tsa gagwe, a tlhape mo metsing, mme a itshekologe go ya maitseboeng. 8Fa yo o nang le keleketlo a kgwela mathe mo go yo o itshekileng, foo a a tlhatswe diaparo tsa gagwe, a tlhape mo metsing, mme a itshekologe go ya maitseboeng. 9Le fa e ka bo e le sebeeletso sefe se motho wa keleketlo o pagameng ka sone se tlaa itshekologa. 10Le fa e le mang yo o amang sengwe se o neng a se ntse godimo, o tlaa itshekologa go ya maitseboeng; yo o tsholang dilo tseo a tlhatswe diaparo tsa gagwe, a tlhape mo metsing, mme a itshekologe go ya maitseboeng. 11Le fa e le mang yo motho wa keleketlo o mo amang, a sa tsokotsa diatla tsa gagwe ka metsi, a tlhatswe diaparo tsa gagwe, a a tlhape mo metsing, a itshekologe go ya maitseboeng. 12Sejana sa letsopa se motho wa keleketlo o se amang, a se thujwe, mme sejana sengwe le sengwe sa logong a se tsokodiwe ka metsi.
13“E tlaa re motho wa keleketlo fa a itshekisiwa mo keleketlong ya gagwe, foo a ipalele malatsi a supa mo go itshekeng ga gagwe, a tlhatswe diaparo tsa gagwe, a itlhapise mmele mo metsing a a elang, mme o tlaa itsheka. 14E re ka tsatsi la bofera mebedi a a tseye maphoi a le mabedi, a ye fa pele ga Jehofa fa mojakong wa mogope wa bophuthegelo, a di neye moperesiti. 15Moperesiti o tlaa di isa, le lengwe tshupelelo ya boleo, le lengwe tshupelo e e fisiwang, mme moperesiti o tlaa mo direla tetlanyo fa pele ga Jehofa ka ga keleketlo ya gagwe.
16“Fa monna mongwe peo ya gagwe e tswa mo go ene, foo a a itlhapise mmele otlhe, mme a itshekologe go ya maitseboeng. 17Le seaparo sengwe le sengwe, le letlalo lengwe le lengwe le peo ya monna e mo go lone, di tlhatswiwe ka metsi, mme di itshekologe go ya maitseboeng. 18Le mosadi yo monna o letseng nae, ba tlhape mo metsing boo babedi, ba itshekologe go ya maitseboeng.
19“Fa mosadi a le medibela, mme medibela e e mo nameng ya gagwe e le madi, a a nne mo phapogong ya gagwe malatsi a supa; le fa e le mang yo o mo amang o tlaa itshekologa go ya maitseboeng. 20Sengwe le sengwe se o rapamang mo go sone a le mo phapogong ya gagwe se tlaa itshekologa, le sengwe le sengwe se o nnang go sone se tlaa itshekologa. 21Yo o amang bolao jwa gagwe a a tlhatswe diaparo tsa gagwe, a a tlhape mo metsing, mme a itshekologe go ya maitseboeng. 22Yo o amang sengwe se o ntseng mo go sone, a a tlhatswe diaparo tsa gagwe, a tlhape mo metsing, mme a itshekologe go ya maitseboeng. 23Fa e le mo bolaong, le fa e le mo go sengwe se o ntseng mo go sone, fa monna a se ama, o tlaa itshekologa go ya maitseboeng. 24Fa monna mongwe a lala nae, fa e ka re gongwe tshupo ya phapogo ya gagwe ya nna mo monneng o tlaa itshekologa ka malatsi a supa; le bolao bongwe le bongwe jo o rapamang mo go jone bo tlaa itshekologa.
25“Fa mosadi a bona medibela ka malatsi a le mantsi, e se ka lobaka lwa phapogo ya gagwe; kgotsa fa a bona medibela go fetisa lobaka lwa phapogo ya gagwe, ka malatsi otlhe a medibela ya gagwe, a a nne jaaka mo malatsing a phapogo ya gagwe, o itshekologile. 26Bolao bongwe le bongwe jo o rapamang mo go jone ka malatsi otlhe a medibela ya gagwe bo tlaa nna mo go ene jaaka bolao jwa phapogelo ya gagwe; sengwe le sengwe se o nnang mo go sone se tlaa itshekologa jaaka boitshekologo jwa malatsi a phapogo ya gagwe. 27Le fa e le mang yo o amang dilo tseo o tlaa itshekologa; a a tlhatswe diaparo tsa gagwe, a tlhape mo metsing, mme a itshekologe go ya maitseboeng. 28Fa a itshekisitswe mo medibeleng ya gagwe, foo a a ipalele malatsi a supa, mme morago ga moo o tlaa nna boitsheko. 29Ka letsatsi la bofera mebedi a tseye maphoi a le mabedi, kgotsa maebana a le mabedi, a a ise kwa moperesiting, kwa mojakong wa mogope wa bophuthegelo. 30Moperesiti o tlaa isa lengwe tshupelelo ya boleo, le lengwe tshupelo e e fisiwang; mme moperesiti o tlaa direla mosadi tetlanyo fa pele ga Jehofa ka ga medibela ya gagwe.
31“Bana ba Iseraele lo tlaa ba lomolola jalo mo go itshekologeng ga bone, gore ba se ka ba swela mo boitshekologong jwa bone, fa ba itshekolola motlaagana wa me, o o mo gare ga bone.
32“O ke one molao wa yo o nang le keleketlo, le wa yo peo ya gagwe e tswang mo go ene, a nna itshekologo ka gone; 33le wa mosadi yo o botlhoko ka phapogo ya gagwe, le wa yo o nang le keleketlo, wa monna, kgotsa wa mosadi, le wa yo o lalang le mosadi yo o itshekologileng.”
