Melao e e amanang le lepero
1Jehofa a bua le Moše le Arone, a re: 2“Fa motho a na le thurugo mo letlalong la nama ya gagwe, kgotsa logogo, kgotsa lesophi, e nna sebetso sa lepero mo letlalong la nama ya gagwe, foo a isiwe kwa go Arone moperesiti, le fa e le kwa go mongwe wa bomorwawe ba baperesiti. 3Moperesiti o tlaa leba sebetso se se mo letlalong la nama; fa bobowa mo sebetsong bo thunya le sebetso se bonala fa se le kwa teng ga letlalo la nama, ke sebetso sa lepero; mme moperesiti o tlaa mo leba, o tlaa bolela fa a itshekologile. 4Fa lesophi le le lesweu mo letlalong la nama, le sa bonale fa le le kwa teng ga letlalo, le bobowa jwa lone bo sa thunye, foo moperesiti a tswalele ene yo o nang le sebetso ka malatsi a supa. 5Moperesiti o tlaa mo leba ka letsatsi la bosupa, mme fa a fitlhela sebetso se eme, fa sebetso se sa keketsege mo letlalong, foo moperesiti o tlaa fela a mo tswaletse ka malatsi a mangwe a supa. 6Moperesiti o tlaa mo leba gape ka letsatsi la bosupa; fa a fitlhela sebetso se batlile go nyelela, fa sebetso se sa keketsege mo letlalong, foo moperesiti o tlaa bolela gore o itshekile; ke logogo, a a tlhatswe diaparo tsa gagwe, a itsheke. 7Mme fa logogo lo keketsega mo letlalong, a sena go itshupetsa moperesiti gore a itshekisiwe, a a itshupetse moperesiti gape. 8Moperesiti o tlaa leba, mme fa a fitlhela logogo lo keketsegile mo letlalong, foo moperesiti o tlaa bolela go re o itshekologile; ke lepero.
9“Fa sebetso sa lepero se le mo mothong, foo a a isiwe kwa moperesiting; 10moperesiti o tlaa leba, mme fa a fitlhela go na le thurugo e tshweu mo letlalong, mme fa e fetotse bobowa bosweu, go le nama e e betologileng mo thurugong, 11ke lepero le legologolo mo letlalong la nama ya gagwe, mme moperesiti o tlaa bolela go re o itshekologile; a a se mo tswalele, gonne o itshekologile. 12Fa lepero le faletse le letlalo ekete le khurumeditse letlalo la yo o nang le sebetso, go tswa kwa tlhogong ya gagwe go ya dinaong, jaaka moperesiti a bona; 13foo moperesiti o tlaa leba, mme fa a fitlhela lepero le khurumeditse nama ya gagwe yotlhe fela, o tlaa bolela ene yo o nang le lepero a re, o itshekile; le fetogile bosweu jotlhe fela, o itshekile. 14Mme e ne e re go bonala nama e e betologileng mo go ene, jalo a nne itshekologo. 15Moperesiti a lebe nama e e betologileng, a mmolele go re o itshekologile; nama e e betologileng e itshekologile, ke lepero. 16Kgotsa fa nama e e betologileng e boa gape e ba e fetoga bosweu, foo a ye kwa moperesiting. 17Moperesiti o tlaa mo leba; fa a fitlhela sebetso se fetogile bosweu, foo moperesiti a bolele yo o nang le sebetso go re, o itshekile; o itshekile.
18“E re fa nama e na le seso mo letlalong la yone, mme se fodile, 19mme mo boemong jwa seso go le thurugo e tshweu, kgotsa lesophi, go itshema bohididu bosweu, foo go supediwe moperesiti. 20Moperesiti o tlaa leba, mme fa a fitlhela go bonala go re ekete go kwa teng ga letlalo, bobowa jwa yone bo thuntse, foo moperesiti o tlaa bolela go re o itshekologile; ke sebetso sa lepero, le kukuntse mo sesong. 21Fa moperesiti a le leba, mme a fitlhela go se na bobowa jo bosweu mo go lone, le sa ye kwa teng ga letlalo, go le looto fela, foo moperesiti a mo tswalele ka malatsi a supa. 22Fa le falala le letlalo, foo moperesiti a mmolele go re o itshekologile; ke sebetso. 23Fa lesophi le eme le sa keketsege, ke lobadi lwa seso; moperesiti o tlaa bolela go re, o itshekile.
24“Kgotsa fa nama mo letlalong la yone e na le phisego ya molelo, mme e na le lesophi le le bohibidu bosweu, le fa e le le lesweu fela, 25foo moperesiti o tlaa le leba. Fa a fitlhela bobowa jo bo mo lesophing bo thuntse, fa go bonala kwa teng ga letlalo, ke lepero, le kukuntse fa go neng go fisitse molelo gone; moperesiti o tlaa bolela go re o itshekologile, ke sebetso sa lepero. 26Fa moperesiti a leba a fitlhela go se na bobowa jo bosweu mo lesophing, le sa ye kwa teng ga letlalo, le le looto fela, foo moperesiti a mo tswalele ka malatsi a supa. 27Moperesiti a mo lebe ka letsatsi la bosupa. Fa go keketsega mo letlalong, foo moperesiti o tlaa mmolela go re, o itshekologile, ke sebetso sa lepero. 28Fa lesophi le eme le sa keketsege mo letlalong, le le looto fela, ke thurugo ya phisego, mme moperesiti a bolele go re, o itshekile, gonne ke lobadi lwa phisego.
29“E re fa monna kgotsa mosadi a na le sebetso mo tlhogong, le fa e le mo ditedung, 30foo moperesiti a lebe sebetso; mme fa a fitlhela se bonala se le kwa teng ga letlalo, go le mo go sone bobowa jo bosetlha jo bosesane, foo moperesiti a mmolele go re o itshekologile; ke sekwaba, ke lepero la tlhogo kgotsa la ditedu. 31Fa moperesiti a leba sebetso sa sekwaba, a fitlhela ekete se kwa teng ga letlalo, go se na bobowa jo bontsho mo go sone, foo moperesiti a tswalele ene yo o nang le sebetso sa sekwaba ka malatsi a supa. 32Ka letsatsi la bosupa a moperesiti a lebe sebetso; fa a fitlhela sekwaba se sa keketsege, go se na bobowa jo bosetlha mo go sone, le sekwaba ekete se se kwa teng ga letlalo, 33foo a beolwe a sekelediwe sekwaba; moperesiti a tswalele ene yo o nang le sekwaba ka malatsi a mangwe a supa. 34E re ka letsatsi la bosupa moperesiti a lebe sekwaba, mme fa a fitlhela a sekwaba se sa keketsega mo letlalong, ekete se kwa teng ga letlalo; foo moperesiti o tlaa mmolela go re, o itshekile, mme a tlhatswe diaparo tsa gagwe, a itsheke. 35Fa sekwaba se keketsega mo letlalong a sena go itshekisiwa, 36foo moperesiti a mo lebe: Fa a fitlhela sekwaba se keketsegile mo letlalong, a moperesiti a se ka a senka bobowa jo bosetlha, o itshekologile. 37Fa a bona sekwaba se eme, le bobowa jo bontsho bo tlhogile mo go sone, sekwaba se fodile, o itshekile; a moperesiti a mmolele go re, o itshekile.
38“E re fa monna, le fa e le mosadi a na le masophi mo letlalong la nama ya gagwe, e bong masophi a masweu, 39foo moperesiti a lebe, mme fa a fitlhela masophi a a mo letlalong la nama ya gagwe a le bosweu jo bo sa bonaleng sentle, ke ntho ya thutlwa, e kukuntse mo letlalong, o itshekile.
40“Fa moriri wa motho o tlogile mo tlhogong ya gagwe, o logwete; le fa go ntse jalo o itshekile. 41Fa moriri wa gagwe o tlogile mo phatleng, o mafatla, le fa go ntse jalo o itshekile. 42Fa tlhogo e e logwete, kgotsa tlhogo e e mafatla, e na le sebetso se se bohibidu bosweu, ke lepero le le kukunyang mo tlhogong ya gagwe e e logwete, kgotsa mo tlhogong ya gagwe e e mafatla; 43foo a moperesiti a mo lebe, fa a fitlhela thurugo ya sebetso e le bohibidu bosweu mo tlhogong ya gagwe e e logwete, kgotsa mo tlhogong ya gagwe e e mafatla, e bonala ekete lepero mo letlalong la nama; 44ke motho yo o nang le lepero, ga a itsheka, ruri moperesiti o tlaa bolela go re ga a itsheka, sebetso sa gagwe se mo tlhogong ya gagwe.
45“Molepero yo sebetso se mo go ene, a diaparo tsa gagwe di gagolwe, a a funolole moriri wa tlhogo ya gagwe, a a bipe pounama ya godimo a kue a re: ‘Itshekologo! Itshekologo!’ 46Metlheng yotlhe e sebetso se ntseng mo go ene ka yone, a a nne itshekologo; o itshekologile, a a nne esi, bonno jwa gagwe bo nne kwa ntle ga bothibelelo.
Melao e e amanang le bolwetse jwa lepero jo bo tshasegetseng mo diaparong
47“Le seaparo se sebetso sa lepero se mo go sone, le fa e ka nna sa bobowa kgotsa sa leloba; 48le fa e le se se logilweng fela, kgotsa se se logilweng ka lomao; sa leloba, le fa e le sa bobowa; sa letlalo, le fa e le sa sengwe se se dirilweng ka letlalo; 49fa sebetso se le setalana, kgotsa sehibitswana mo seaparong, kgotsa mo letlalong, mo go se se logilweng fela, kgotsa mo go se se logilweng ka lomao, kgotsa mo go sengwe se se dirilweng ka letlalo; ke sebetso sa lepero, se supediwe moperesiti. 50Moperesiti o tlaa leba sebetso, mme se se nang le sebetso, a a se tswalele ka malatsi a supa. 51A a lebe sebetso ka letsatsi la bosupa, fa sebetso se keketsegile mo seaparong, le fa e le mo go se se logilweng fela, le fa e le mo go se se logilweng ka lomao, le fa e le mo letlalong, le fa e ka ne e le eng se se dirilweng ka letlalo, sebetso seo ke lepero le le garubang, se itshekologile. 52A a fise seaparo ka molelo, le fa e ka bo e le se se logilweng fela, kgotsa se se logilweng ka lomao, sa bobowa kgotsa sa leloba, kgotsa sengwe sa letlalo, se sebetso se mo go sone, gonne ke lepero le le garubang, se fisiwe mo molelong.
53“Fa moperesiti a leba, a fitlhela sebetso se sa keketsega mo seaparong, se se logilweng fela, kgotsa se se logilweng ka lomao, le fa e le mo go sengwe sa letlalo, 54foo moperesiti a laole gore ba tlhatswe se sebetso se mo go sone, mme o tlaa fela a se tswalela ka malatsi a mangwe a supa. 55Moperesiti a lebe sebetso se sena go tlhatswiwa, fa a fitlhela sebetso se sa fetoga mmala, fa sebetso se sa keketsega, se itshekologile; o se fise ka molelo, ke kgarubo, le fa logwete lo le ka fa ntle, kgotsa lo le ka fa teng.
56“Fa moperesiti a leba, mme fa a fitlhela sebetso se le looto fela se sena go tlhatswiwa, foo a a se dibolele a se tlose mo seaparong, kgotsa mo letlalong, kgotsa mo go se se logilweng fela, kgotsa mo go se se logilweng ka lomao. 57Fa se sa ntse se bonala mo seaparong, le fa e le mo go se se logilweng fela, kgotsa mo go se se logilweng ka lomao, kgotsa mo go sengwe sa letlalo, se a kukunya; se sebetso se mo go sone o se fise ka molelo. 58Seaparo, le fa e le se se logilweng fela, kgotsa se se logilweng ka lomao, kgotsa e ka ne e le eng sa letlalo, se o tlaa se tlhatswang, fa sebetso se tlogile mo go sone, foo se tlhatswiwe lwa bobedi, mme se tlaa itsheka.
59“O ke one molao wa sebetso sa lepero mo seaparong sa bobowa, le fa e le sa leloba, se se logilweng fela, kgotsa se se logilweng ka lomao, kgotsa e le sengwe sa letlalo, go se bolela fa se itshekile kgotsa go se bolela fa se itshekologile.”
