Kotlhao, boikwatlhao le tsholofelo
1Ke nna monna yo
ke bonyeng pogiso
ka thupa ya go šakgala ga gagwe.
2O nkgogile,
o ntsamaisitse mo lefifing
e seng mo leseding.
3Ruri o tlhola
a busetsa letsogo la gagwe
go tlhabana le nna gangwe le gape
motshegare otlhe.
4O onaditse nama ya me
le letlalo la me;
o robile marapo a me.
5O agile dikago tsa go tlhabana
le nna,
mme o ntikanyeditse ka mo
go galakang le ka tapisego.
6O mpatikile go aga
mo mafelong a a lefifi,
jaaka ba ba sa bolong go swa.
7O ntsentse gare ka logora,
ga ke na go tswela kwa ntle;
ketane ya me o e ketefaditse.
8Ee, ya re fa ke goa ke kuela thuso,
a tswalele morapelo wa me
kwa ntle.
9O kganetse ditsela tsa me
ka dithako tsa maje a a betlilweng,
o sokamisitse ditsela tsa me.
10Mo go nna o ntse jaaka bera
e e laletseng, jaaka tau
mo mafelong a boiphitlhelo.
11O fapositse ditsela tsa me,
o nkgagogantse; o ntshwafaditse.
12O laetse bora jwa gagwe,
o ntlhomile sekonopiwa
sa go fulwa ka motswi.
13O tsenyeditse metswi ya mokotlopo
wa gagwe mo diphilong tsa me.
14Ke dule setshego
mo bathong botlhe ba me,
le sefela sa bone motshegare otlhe.
15O ntladitse bogalaka,
o ntlopetse ka longana.
16O bile o nthobile meno
ka lošagarana,
o nkhurumeditse ka melora.
17O tloseditse mowa wa me
kgakala le kagiso;
ka lebala tlhogonolofalo.
18Ka re: “Thata ya me e nyeletse,
le tebelelo ya me mo go Jehofa.”
19Gopola pogisego ya me
le manyobonyobo a me,
longana le santlhokwe.
20Mowa wa me o sa ntse o di gopotse,
mme o obegile mo teng ga me.
21Ke a ikgakolola go mo,
mme ke gone ke nang le tsholofelo.
22Fa e bo ne ne re sa nyelediwe jaana
ke ka ntlha ya mapelonomi
a ga Jehofa, le ka go bo
matlhomoga pelo a gagwe
a sa tlhaele.
23A ntse maša ka meso le meso;
boikanngo jwa gago bo bogolo.
24“Jehofa ke kabelo ya me,”
go bua mowa wa me:
“ke gone ke tlaa solofelang
mo go ene.”
25Jehofa o molemo
mo go ba ba mo lebelelang,
le mo moweng o o mmatlang.
26Go molemo gore motho a solofele
a be a lebelele poloka ya ga Jehofa
a iketlile fela.
27Go molemo mo monneng
go rwala jokwe
mo bokaung jwa gagwe.
28A a dule a le esi,
a didimale ka a e beile mo go ene.
29A a beye molomo wa gagwe
mo loroleng;
e tle e re kgotsa
go bo go na le tsholofelo.
30A a neele yo o mo tlhanyang lesama
la gagwe;
a a tladiwe kgobo, e tlale.
31Gonne Morena
ga a ketla a latlhela ruri.
32Gonne le fa a hutsafatsa,
o tlaa tlhomoga pelo
ka fa bontsing
jwa mautlwelobotlhoko a gagwe.
33Gonne ga a bogise ka go rata,
le fa e le go hutsafatsa
bana ba batho.
34Go gatakela bagolegwi botlhe
ba lefatshe,
35go faposa tshiamelo ya monna
fa pele ga sefatlhogo
sa Mogodimodimo,
36go phetsolela motho mafoko a
gagwe, a a sekwang, dilo tse,
Morena ga a di rate.
37E mang yo o buang,
mme go dirafale,
fa Morena a sa laola jalo?
38Mo molomong wa Mogodimodimo
a ga go tle go tswe bosula
le molemo?
39Ana motho yo o tshedileng
o ngongoregelang, e le motho,
ka ntlha ya go belediwa
dibe tsa gagwe?
40A re kheleiseng
re lekeng ditsela tsa rona,
re be re sokologele mo go Jehofa.
41A re tsholeletseng Modimo
mo magodimong
dipelo di na le diatla tsa rona.
42“Re tlodile, re tsuoletse;
ga o a re itshwarela.
43“O re khurumeditse ka bogale,
wa re konatelela;
o bolaile, ga o a tlhomoga pelo.
44O ikhurumeditse ka leru,
gore morapelo wa rona
o se le phololele.
45O re dirile ra nna jaaka mokgona
le se se latlhwang
mo gare ga ditšhaba.
46Baba botlhe ba rona
ba re atlhamoloseditse melomo.
47Poifo le molete di re tletse,
le pheretlho le tshenyo.
48Leitlho la me le elela dinoka
tsa metsi,
ka ntlha ya tshenyego
ya morwadia batho ba me.
49“Leitlho la me le a tsholola,
ga le khutle, ga go kgaoge gope.
50Go tsamaye Jehofa a okomele,
a lebe a le kwa legodimong.
51Leitlho la me
le tlhokofatsa mowa wa me,
ka ntlha ya bomorwadia motse
wa gaetsho otlhe fela.
52Ba e leng baba ba me fela
e seng ka sepe,
ba ntelekile mo go botlhoko
jaaka nonyane.
53Ba nkgaoletse botshelo
mo moleteng,
ba latlhetse letlapa
godimo ga me.
54Metsi a ne a elela
godimo ga tlhogo ya me;
ka re: ‘Ke kgaotswe.’
55“Ka bitsa leina la gago Jehofa,
ke le mo moleteng
o o kwa tengteng.
56O ne wa utlwa lentswe la me;
o se ka wa subela phegelo ya me
le go goa ga me tsebe.
57O ne wa atamela
mo motlheng o ke go biditseng
ka one wa re: ‘Se boife.’
58“Morena, o mpueletse mafoko
a mowa wa me a tsheko;
o rekolotse botshelo jwa me.
59Jehofa, o bonye patikego ya me;
a ko o atlhole mafoko a me.
60O bonye pusoloso yotlhe ya bone,
le maano otlhe a ba a ntogetseng.
61O utlwile kgobo ya bone, Jehofa,
le maano otlhe a ba a ntogetseng;
62le dipounama tsa ba ba
ntsogologetseng,
le go akanya ga bone ka ga me
motshegare otlhe.
63Leba go dula ga bone,
le go nanoga ga bone;
ke ntse sefela sa bone fela.
64“Jehofa, o tlaa ba naya tuelo
ka fa tirong ya diatla tsa bone.
65O tlaa ba naya kgwalalo ya pelo,
phutso ya gago
e tlaa nna mo go bone.
66O tlaa ba konatelela mo bogaleng,
o tlaa ba senyetsa ruri
ba tloge fa tlase ga magodimo
a ga Jehofa.”
