JOBE 8

₂“O tlaa bua dilo tse

ka lobaka lo lo kae?

Mafoko a molomo wa gago

a tlaa nna jaaka phefo e kgolo

ka lobaka lo lo kae?

₃A Modimo o tle

o sokamise katlholo?

Kgotsa a Mothatayotlhe

o tle a sokamise tshiamiso?

₄Fa bana ba gago ba o leofetse,

mme o ba tsentse mo seatleng

sa tlolo ya bone;

₅fa o ne o ka batla ka tlhoafalo

mo Modimong,

mme wa dira mokokotlelo wa gago

mo go Mothatayotlhe,

₆fa o ne o le boitsheko le thokgamo;

ruri o ka bo fano a go kubugela,

a dira bonno jwa tshiamo ya gago

gore bo segofale.

₇Le fa tshimologo ya gago

e ne e le potlana,

le fa go ntse jalo

bokhutlo jwa gago

bo ne bo tlaa totafala segolo.

₈“Gonne ke a go rapela,

a ko o botse ka ga motlha wa pele,

mme o tseye tsia

se borraabo ba se tlhotlhomisitseng:

₉(Gonne rona re ba maabane fela,

mme ga re itse sepe,

gonne malatsi a rona mo lefatsheng

ke moriti fela).

₁₀A bone ga ba ketla ba go ruta,

ba go bolelela,

ba bua mafoko a a tswang

mo pelong tsa bone?

₁₁“A motsitla o ka gola

go se na loraga?

A mophutlo o ka gola

go se na metsi?

₁₂E re o sa ntse o le mo botaleng

jwa one,

o sa ntse o segwa, o bo o swabe

pele ga merogo e mengwe.

₁₃Ditsela tsa botlhe

ba ba lebalang Modimo

di ntse jalo;

tsholofelo ya motho

yo o sa reng Modimo sepe

e tlaa nyelela;

₁₄yo boikgantsho jwa gagwe

bo tlaa kgaogang ka bogare,

le yo boikanyo jwa gagwe

e leng bobi jwa segokgwane fela.

₁₅O tlaa ikaega ntlo ya gagwe,

mme ga e ketla e ema;

o tlaa itshwarelela ka one,

mme ga e ketla e tlhomama.

₁₆O a tle a nne motala

pele ga letsatsi le ise le tlhabe,

mme matswela a gagwe

a anamele mo tshimong ya gagwe.

₁₇Medi ya gagwe e tlamparele

thotobolo, a lebe felo ga maje.

₁₈Fa a sengwa

a ntshiwa mo felong ga gagwe,

foo go tlaa mo itatola go re:

‘Ga ke ise ke go bone.’

₁₉Bona jo ke boitumelo

jwa tsela ya gagwe,

ba bangwe ba tlaa tlhongwa

mo mmung wa gagwe.

₂₀“Bona, Modimo ga o ketla o latlha

motho yo o itekanetseng,

le gone ga o ketla o ema

badira bosula nokeng.

₂₁O tlaa nama o tlatsa

molomo wa gago ka setshego,

le dipounama tsa gago

ka moduduetso.

₂₂Ba ba go ilang

ba tlaa apesiwa ditlhong;

le mogope wa moikepi

ga o ketla o tlhola o leyo.”