JOBE 37

₁“Se le sone pelo ya me

e a se roromela,

e garoge mo felong ga yone.

₂Reetsang loratla lwa lentswe la one,

le tumo e e tswang mo molomong

wa one.

₃O e dumisetse

fa tlase ga legodimo lotlhe fela,

le logadima lwa one

o lo gadimisetse kwa dikhutlong

tsa lefatshe.

₄Morago ga lone go dume kodu;

o dume ka kodu ya borena jwa one;

mme ga o thibe dikgadima

mogang kodu ya one e utlwalang.

₅Modimo o duma kgakgamatso

ka kodu ya one,

o dira dilo tse dikgolo

tse re sa kakeng ra di tlhaloganya.

₆Gonne o tle o reye kapoko o re:

‘Na mo lefatsheng;’

le pula ya medupe,

le marothodi a ya maebana

a magolo.

₇O konela seatla sa motho mongwe

le mongwe;

gore batho botlhe

ba o ba dirileng ba go itse.

₈Foo diphologolo le dibatana

di ye mo maiphitlhong,

di nne mo dikutleng tsa tsone.

₉Ledimo le tle le tswe mo kutleng

ya borwa;

le serame ntlheng ya botsheka.

₁₀Dikgapetla tsa metsi di abiwa

ka pudulo ya Modimo;

mme boatlhamo jwa metsi bo

gatsediwe.

₁₁Ee, o belesa leru le le kwenneng

metsi;

o phutholole leru la one la logadima;

₁₂le dikolosiwe ka kgoro ya one

gore di tle di dire sengwe le sengwe

se o se di laoletseng

mo lefatsheng lotlhe le le nnwang.

₁₃Le fa o di tlisitse

gore di nne kwatlhao,

kgotsa go thusa lefatshe la one,

kgotsa ka kutlwelobotlhoko.

₁₄“Jobe, a ko o reetse se;

ema fela, o akanye ditiro

tse di gakgamatsang tsa Modimo.

₁₅A o itse ka fa Modimo o tleng

o di laye ka gone,

mme o phatsimise logadima

lwa leru la one ka gone?

₁₆A o itse go retelediwa ga maru

le ditiro tse di gakgamatsang

tsa o o leng boitekanelo mo kitsong?

₁₇Le ka fa diaparo tsa gago

di leng bothitho ka gone

fa lefatshe le tuuletse fela

ka ntlha ya phefo ya borwa?

₁₈A o ka tsharolola nao loapi

lo lo thata

jaaka seiponi se se thetsweng?

₁₉O re rute se re tlaa se buang nao,

gonne ga re kake ra rulaganya puo

ya rona ka ntlha ya lefifi.

₂₀A o ka bolelelwa fa ke rata go bua,

kgotsa a motho o ka eletsa

a ka bo a komediwa?

₂₁Jaana batho ga ba kake ba leba

lesedi fa le phatsima mo loaping;

fa phefo e fetile e lo ntlafaditse.

₂₂Mo ntlheng ya botsheka

go tswa kgalalelo e eketeng

ya botsodutsokwane,

Modimo o na le borena

jo bo boitshegang mo go one.

₂₃Ka ga Mothatayotlhe,

ga re kake ra mo tlhantlhabetsa,

o tlotlometse mo thateng,

mo katlholong le mo tshiamisong

e e tletseng, ga a ketla a patika.

₂₄Mme batho ba mmoifa

ka ntlha ya gone moo;

ga a tlhokomele bape

ba ba pelo e e tlhalefileng.”