JOBE 36

₂“Ntesa go le gonnye,

mme ke tlaa go kaela;

gonne ke sa na le sengwe

se ke se buang ntlheng ya Modimo.

₃Ke tlaa ya go tsaya kitso ya me

kgakala,

ke tlaa kaela Modiri wa me tshiamo.

₄Gonne ruri mafoko a me

ga se a maaka;

mongwe yo o itekanetseng

mo kitsong o na nao.

₅Bona, Modimo o nonofile,

ga o nyatse ope;

o thata mo nonofong ya tlhaloganyo.

₆Ga o boloke botshelo

jwa ba ba bosula;

mme o naya ba ba patikwang

tshiamelo ya bone.

₇Ga o tlose matlho a one

mo basiaming;

mme o ba baya le dikgosi

mo setulong sa bogosi

ka bosakhutleng,

mme ba goletsege.

₈Fa ba golegwa ka dikeetane,

ba ba ba tshwarwa ka megala

ya patiko;

₉foo o ba supetse tiro ya bone

le ditlolo tsa bone

fa ba dirile ka boikgodiso.

₁₀Gape o kabololele thuto tsebe

ya bone,

o laole gore ba bowe mo boikepong.

₁₁Fa ba reetsa, ba o direla,

ba tlaa fetisa malatsi a bone

mo tlhogonolofalong le dinyaga

tsa bone mo monateng.

₁₂Mme fa ba sa reetse,

ba tlaa nyelela ka tšhaka,

ba tlaa swa go se na kitso.

₁₃Bone ba ba sa reng Modimo sepe

mo pelong ba kokotletsa bogale;

ga ba goele thuso fa o ba bofa.

₁₄Ba tle ba swe mo bokaung,

botshelo jwa bone bo felele

mo go ba ba itshekologileng.

₁₅O golola ba ba patikwang

ka patiko ya bone;

o kabolole ditsebe tsa bone

ka pogiso.

₁₆Ee, o ne a tlaa bo a go ntshitse

mo patikegong,

a go isa felong fa go atlhameng,

kwa go se nang pitlagano gone;

mme se se bewang mo lomating

lwa gago lwa bojelo

se ne se tlaa tlala mahura.

₁₇“Mme o tletse tshekiso ya baikepi;

tshekiso le tekatekanyo

di go tshwere.

₁₈E re ka go na le bogale,

o itise gore o se ka wa timediwa

ke boikgantsho jwa gago; le gone,

a bogolo jwa thekololo

bo se go fapose.

₁₉A dikhumo tsa gago di tlaa lekana,

gore o se nne mo patikegong,

kgotsa dithata tsotlhe

tsa nonofo ya gago?

₂₀O se ka wa eletsa bosigo,

e le lobaka lwa batho

go kgaolwa mo bonnong jwa bone.

₂₁O itise, o se ka wa tlhokomela

boikepo, gonne o itshenketse jone

bogolo go patikego.

₂₂Bona, Modimo o dira ka bogodi

mo thateng ya one.

E mang yo e leng moruti jaaka one?

₂₃E mang yo o o laoletseng

tsela ya one,

kgotsa e mang yo o ka reng,

o dirile tshiamololo?

₂₄“O gakologelwe

go godisa tiro ya one

e batho ba e opetseng.

₂₅Batho botlhe ba ntse ba e lebile;

motho o e bonela kgakala.

₂₆Bona, Modimo o mogolo,

ga re o itse;

palo ya dinyaga tsa one

e retela go tlhotlhomisiwa.

₂₇Gonne o gogela dithothi tsa metsi

godimong,

tse di fetogang pula e e tswang

mo mouwaneng wa one;

₂₈e loapi lo e thelang,

lo e thotheletsa mo bathong

ka letlotlo.

₂₉Ee, a mongwe o ka tlhaloganya

diphuthologo tsa maru,

le tutumo ya mogope wa tsharologo

wa one?

₃₀Bona, o phutholola lesedi la one

tikologong ya one;

o khurumetsa boteng jwa lewatle.

₃₁Gonne o atlhola ditšhaba ka dilo tse;

o naya batho dijo ka botlalo.

₃₂O ipipa diatla tsa one ka tladi,

o e laela gore e iteye

fa go laotsweng.

₃₃Loratla lwa yone lo bolela

ka ga one,

le tsone dikgomo lo a di bolelela

ka ga ledimo le le tlogang le tla.”