JOHANE 7

₁Morago ga dilo tse Jesu a sala a ntse a tsamaya mo Galilea, gonne a gana go tsamaya mo Jutea, ka Bajuta ba senka go mmolaya. ₂Jaana modiro wa Bajuta, e bong modiro wa Metlaagana, wa bo o le gaufi. ₃Foo bomonnawe ba mo raya ba re: “Tloga mono, o ye kwa Jutea, gore barutwa ba gago le bone ba bone ditiro tsa gago tse o di dirang. ₄Gonne ga go motho ope yo o dirang sengwe mo sephiring, mme ene ka esi a senka go itsiwe mo ponalong. Fa o dira dilo tse, iponaletse lefatshe.” ₅Gonne le e leng bone bomonnawe ba ne ba sa dumele mo go ene.

₆Jesu a ba raya a re: “Lobaka lwa me ga lo ise lo tle; mme lobaka lwa lona lo a bo lo ntse lo etleetsegile gale. ₇Lefatshe ga le ka ke la ila lona; mme nna le a nkila, ka gobo ke supa ka ga lone, fa ditiro tsa lone di le bosula. ₈A go ye lona kwa modirong; nna ke tlaa nama ke ise ke ye kwa modirong o, ka lobaka lwa me ga lo ise lo dirale.” ₉Ya re a sena go bua dilo tse nabo, a nama a sa tlhotse mo Galilea.

₁₀E rile bomonnawe ba sena go ya kwa modirong le ene a sala a ya, e seng mo ponalong, ya ne e kete ka go iphitlha. ₁₁Ke gone Bajuta ba mmatla mo modirong ba re: “O kae?”

₁₂Ga nna ngongorego e kgolo mo matshutitshuting a batho ka ga gagwe; bangwe ba re: “Ke motho yo o molemo,” ba bangwe ba re: “Nnyaa, o timetsa batho.” ₁₃Le fa go ntse jalo ga bo go se na motho ope yo o buang ka ga gagwe mo ponong, ka go boifa Bajuta.

₁₄E rile jaana go setse go le fa gare ga modiro, Jesu a tlhatlogela kwa tempeleng, mme a ruta. ₁₅Foo Bajuta ba gakgamala ba re: “Ana motho yo o itse jang dikwalo, ka a se ka a ithuta gope?”

₁₆Jesu a ba fetola a re: “Thuto ya me, ga se ya me; ke ya yo o nthomileng. ₁₇Fa motho le fa e le mang a rata go dira go rata ga gagwe, o tlaa itse ka ga thuto, gore a e tswa mo Modimong, kgotsa ke ipuisa fela. ₁₈Yo o ipuisang fela, o senka go ikgalaletsa, mme yo o senkang go galaletsa yo o mo romileng, mme ke ene wa boammaaruri, ga go na tshiamololo epe mo go ene. ₁₉A Moše ga a a lo naya molao, le fa go ntse jalo go bo go se ope wa lona yo o dirang molao? Lo senkelang go mpolaya?”

₂₀Batho ba bantsi ba mo fetola ba re: “O na le diabolo; e mang yo o senkang go go bolaya?”

₂₁Jesu a ba fetola a re: “Ke dirile tiro nngwe, mme lwa gakgamala lotlhe. ₂₂Moše o lo neile bogwera ka ntlha ya gone mo – e se gore bo tswa mo go Moše, mme bo tswa mo go borara – mme lo tle lo rupise motho go le Sabata. ₂₃Mme fa motho a rupisiwa go le Sabata, gore molao wa ga Moše o se ka wa tlolwa; a lo bogale le nna, ka gobo motho ke mo fodiseditse ruri go le Sabata? ₂₄Se atlholeng ka fa ponong ya matlho, mme atlholang ka katlholo e e siameng.”

₂₅Ke gone bangwe ba Jerusalema ba re: “A ga se ene yo ba mo senkang go mmolaya? ₂₆Bonang, o bua mo ponong, mme ga ba mo reye sepe. A ruri balaodi ba a itse fa yo e le Keresete? ₂₇Le fa go ntse jalo monna yo re a mo itse kwa o tswang teng; mogang Keresete o tlang, go tlaa bo go sa itse ope kwa o tswang teng.”

₂₈Foo Jesu a buela godimo mo tempeleng, a ruta a re: “Go le nna lo a nkitse, le kwa ke tswang teng, lo a go itse; mme ga ke a itere, mme yo o nthomileng o ammaaruri, yo lo sa mo itseng. ₂₉Nna ke a mo itse; gonne ke tswa kwa go ene, mme o nthomile.” ₃₀Foo ba senka go mo tshwara; mme go se ka ga dira le ope yo o mo tsenyang diatla, ka lobaka lwa gagwe lo ne lo ise lo tle. ₃₁Mme mo bontsing jwa batho ba le bantsi, ba mo dumela; ba re: “Mogang Keresete o tlang, a o tlaa dira ditshupo tse di fetang tse monna yo o di dirileng?”

₃₂Bafarisai ba utlwa jaaka batho ba bantsi ba sebetsanya dilo tse ka ga gagwe; mme ditlhogo tsa baperesiti le Bafarisai ba roma maotlana, gore ba ye go mo tshwara. ₃₃Foo Jesu a re: “Ke sa na le lona ka lobakanyana, mme ke tloga ke ya kwa go yo o ntlhomileng. ₃₄Lo tlaa mpatla, mme ga lo ketla lo mphitlhela; le kwa ke teng, ga lo ka ke lwa ya go fitlha teng.”

₃₅Foo Bajuta ba raana ba re: “Ana monna yo o tlaa ya kae kwa re se ketlang re mo fitlhela teng? A o tlaa ya kwa Phalading e e kwa Bagerikeng, a ya go ruta Bagerika? ₃₆Ana lefoko le ke eng, le o le buileng, a re: ‘Lo tlaa mpatla, mme ga lo ketla lo mphitlhela; le kwa ke teng, ga lo ka ke lwa ya go fitlha teng’?”

₃₇Jaana ya re ka letsatsi la bofelo, e bong letsatsi le legolo la modiro, Jesu a ema, a buela godimo a re: “Fa mongwe a nyorilwe, a a tle mo go nna, a nwe. ₃₈Yo o dumelang mo go nna, dinoka tsa metsi a a tshedileng di tlaa ela di tswa mo mpeng ya gagwe, jaaka dikwalo di buile.” ₃₉Golo mo, a go bua ka ga Mowa, o ba ba dumetseng mo go ene ba ne ba tlaa o amogela, gonne Mowa o ne o ise a abiwe, ka Jesu a ise a galalediwe.

₄₀Bangwe mo bontsing jwa batho ya re ba utlwa mafoko, a, ba re: “Ammaaruri, yo ke ene moperofeti.”

₄₁Ba bangwe, ba re: “Yo ke Keresete.” Bangwe ba re: “Ao! A Keresete o tswa kwa Galilea? ₄₂A dikwalo ga di a re: Keresete o tswa mo losikeng lwa ga Dafite, le kwa Bethelehema, motsana o Dafite o neng a nna mo go one?” ₄₃Jalo ga tsoga kgaogano mo bontsing jwa batho ka ga gagwe. ₄₄Bangwe ba rata go mo tshwara; mme go se ka ga nna ope yo o mo tsenyang diatla.

₄₅Foo maotlana a boela kwa ditlhogong tsa baperesiti le kwa Bafarisaing; mme ba ba raya ba re: “Lo ne lo sa tleleng nae?” ₄₆Maotlana a ba fetola a re: “Ga go ise go ko go bue motho ope jaaka ene.”

₄₇Foo Bafarisai ba a fetola ba re: “A le lona lo timeditswe? ₄₈A bangwe ba balaodi, kgotsa ba Bafarisai, ba dumetse mo go ene? ₄₉Batho ba ba bantsi ba ba sa itseng molao, ba hutsegile.”

₅₀Nikotemo – e bong ene yo o ne a ile kwa go Jesu gale, e le mongwe wa bone – a ba raya a re: ₅₁“A molao wa rona o tle o sekise motho o ise o utlwe mo go ene pele, mme o itse se o se dirang.”

₅₂Ba mo fetola ba re: “A le wena o wa Galilea? Botsisa, mme o bone fa go sa tswe moperofeti ope mo Galilea.” ₅₃Mme mongwe le mongwe a ya kwa ga gagwe.