JOHANE 20

₁Jaana e rile ka letsatsi la ntlha la beke, Maria Magetalene a ya kwa phupung go le ka maphakela, go sa ntse go le lefifi, mme a fitlhela lentswe le tlositswe fa phupung. ₂Foo a taboga a ya kwa go Simone Petere, le morutwa yo mongwe yo Jesu o mo ratang, mme a ba raya a re: “Ba tlositse Morena mo phupung, mme ga re itse kwa ba mmeileng teng.”

₃Foo Petere a tswa, a na le morutwa yo mongwe, ba tsamaela kwa phupung. ₄Ba taboga mmogo; mme morutwa yo mongwe a sia Petere, a fitlha pele fa phupung. ₅Mme ya re a inama a okomela mo teng, a bona matsela a leloba a ntse fela; le fa go ntse jalo a se ka a tsena mo teng. ₆Foo Simone Petere le ene a tla a mo setse morago, a tsena mo phupung; a bona matsela a leloba jaaka a ntse fela. ₇Letsela le le neng le mo fapile tlhogo, jaaka le sa nna le matsela a leloba, le phuthetswe le le losi fa thoko. ₈Foo ga tsena le ene morutwa yo mongwe, yo o fitlheleng pele fa phupung, mme a bona, a ba a dumela. ₉Gonne ka lobaka loo ba ne ba ise ba itse lokwalo, fa a tshwanetse go ba a tsoga mo baswing. ₁₀Jalo barutwa ba tloga ba boela kwa ga bone.

₁₁Maria a bo a eme ka fa ntle ga phupu a lela; mme ya re a ntse a lela, a inama, a okomela mo phupung; ₁₂a bona baengele ba le babedi ba ba apereng bosweu, ba dutse fa setoto sa ga Jesu se neng se le teng, mongwe a le fa tlhogong, yo mongwe fa dinaong. ₁₃Ba mo raya ba re: “Mosadi, o lelelang?” A ba raya a re: “Ke ka gobo ba tlositse Morena wa me, mme ga ke itse kwa ba mmeileng teng.”

₁₄Ya re a sena go bua jalo, a retologa, mme a bona Jesu a eme, mme a sa itse fa e le Jesu. ₁₅Jesu a mo raya a re: “Mosadi o lelelang? O batla mang?” Mme ene ka a gopotse gore ke mmaakanyi wa tshimo, a mo raya a re: “Morena, fa o mo tlositse, mpolelela kwa o mmeileng teng, mme ke tlaa mo tlosa.”

₁₆Jesu a mo raya a re: “Maria!” A ithetolola, a mo raya ka Sehebere, a re: “Raboni,” ke go re: “Moruti.”

₁₇Jesu a mo raya a re: “Se nkame; gonne ga ke ise ke tlhatlogele kwa go Rara; mme o ye kwa go bana ba ga Rre, o ba reye o re, ke tlhatlogela kwa go Rre, le Rraeno, le kwa go Modimo wa me, le Modimo wa lona.”

₁₈Maria Magetalene, a fitlha a bolelela barutwa a re: “Ke bonye Morena;” le jaaka a buile dilo tse nae.

₁₉Jaana ya re go sa le letsatsi leo, e le letsatsi la ntlha la beke, go le maabanyane, go bile go tswetswe fa barutwa ba leng teng, ka ntlha ya go boifa Bajuta, Jesu a fitlha a ema fa gare ga bone, a ba raya a re: “Kagiso e nne le lona.” ₂₀Ya re a sena go bua jalo, a ba supetsa diatla tsa gagwe le lotlhakore lwa gagwe. Foo barutwa ba itumela, ka ba bona Morena. ₂₁Foo Jesu a ba a ba raya gape, a re: “Kagiso e nne le lona. Jaaka Rara a nthomile, le nna ke roma lona jalo.” ₂₂Ya re a sena go bua jalo, a ba budulela mowa, a ba raya a re: “Amogelang Mowa o o Boitshepo; ₂₃le fa e le bomang ba dibe tsa bone lo di itshwarelang, ba di itshwaretswe; mme ba dibe tsa bone lo di emisang, di eme.”

₂₄Mme Thomase, mongwe wa ba ba 12, yo o bidiwang Didimo, e rile Jesu a tla, ene a bo a seyo mo go bone. ₂₅Barutwa ba bangwe ba mo raya ba re: “Rona re bonye Morena.” Mme a ba raya a re: “Fa ke sa bone dintho tsa dimapo mo diatleng tsa gagwe, ka tsenya monwana wa me mo dinthong tsa dimapo, ka ba ka tsenya seatla sa me mo lotlhakoreng lwa gagwe, ga nketla ke dumela.”

₂₆E rile malatsi a a 8 a sena go feta, barutwa ba gagwe ba bo ba bile ba le mo teng, le ene Thomase a na nabo. Jesu a tla go tswetswe, a ema fa gare ga bone, a re: “Kagiso e nne le lona.” ₂₇Foo a raya Thomase a re: “Ntshetsa kwano monwana, o bone diatla tsa me; ntshetsa kwano seatla, o se tsenye mo lotlhakoreng lwa me; se nne pelaelo mme o dumele.”

₂₈Thomase a mo fetola a re: “Morena wa me, le Modimo wa me.”

₂₉Jesu a mo raya a re: “O dumetse ka gobo o mponye; go sego ba ba sa bonang, le fa go ntse jalo ba dumetse.”

₃₀Jesu a dira ditshupo di le dintsi di sele fa pele ga barutwa ba gagwe, tse di sa kwalwang mo lokwalong lo; ₃₁mme tse, di kwadilwe gore lo dumele fa Jesu e le Keresete, Morwa Modimo; le gore lo bone botshelo mo ineng la gagwe ka go dumela.