JOHANE 15

₁“Ke nna mofine wa ammaaruri, Rre ke ene Mmaakanyi wa tshimo. ₂Kala nngwe le nngwe e e mo go nna, e e sa ungweng, o a e tlosa; mme kala nngwe le nngwe e e ungwang, o a e ntlafatsa, gore e ungwe bogolo. ₃Lona lo setse lo le bantle le jaana, ka ntlha ya lefoko le ke le buileng le lona. ₄Nnang mo go nna, le nna mo go lona. Jaaka kala e sa ka ke ya ungwa ka yosi, fa e sa nne mo mofineng; go ntse jalo le lona, fa lo sa nne mo go nna.

₅“Ke nna mofine, lona lo dikala; yo o nnang mo go nna, le nna mo go ene, ke ene yo o ungwang segolo, gonne kwa ntle ga me ga lo ka ke lwa dira sepe. ₆Fa motho a sa nne mo go nna, o latlhelwa kwa ntle jaaka kala, mme e omelele; batho ba di kgobokanye, ba di latlhele mo molelong, mme di jewe ke molelo. ₇Fa lo nna mo go nna, le mafoko a me a nna mo go lona, lopang se lo se ratang, mme lo tlaa se direlwa. ₈Rre o galalediwa ke mo, ke go re, fa lo ungwa segolo; jalo lo tlaa nna barutwa ba me. ₉Fela jaaka Rara a nthatile, le nna ke lo ratile; nnang mo loratong lwa me. ₁₀Fa lo tshegetsa ditaolo tsa me, lo tlaa nna mo loratong lwa me; fela jaaka ke tshegeditse ditaolo tsa ga Rre, mme ke ntse mo loratong lwa gagwe.

₁₁“Dilo tse ke di buile le lona, gore boitumelo jwa me bo nne mo go lona, le gore boitumelo jwa lona bo dirafale. ₁₂Taolo ya me ke e, gore lo ratane, fela jaaka le nna ke lo ratile. ₁₃Ga go ope yo o nang le lorato lo lo fetang lo, fa motho a ka beela ditsala tsa gagwe botshelo jwa gagwe. ₁₄Lona lo ditsala tsa me, fa lo dira dilo tse ke di lo laolelang. ₁₅Ga ke tlhole ke lo bitsa batlhanka; gonne motlhanka ga a itse se morena wa gagwe o se dirang; mme ke lo biditse ditsala; gonne dilo tsotlhe tse ke di utlwile mo go Rre, ke di lo itsisitse. ₁₆Ga lo a ka lwa intshenkela; ke nna ke itshenketseng lona, mme ka lo laolela go ya go ungwa, le gore loungo lwa lona lo tlhomame; gore e tle e re se lo se lopang Rara, le fa e ka nna eng, ka leina la me, a se lo neye. ₁₇Dilo tse ke a di lo laolela, gore lo ratane.

₁₈“Fa lefatshe le lo ila, lo a itse fa le nkidile pele, le ise le lo ile. ₁₉Fa lo ne lo le ba lefatshe, le ne le tlaa rata ba e leng ba lone; mme e re ka lo se ba lefatshe, mme ke lo itshenketse mo lefatsheng, ke gone lefatshe le lo ilang. ₂₀Gakologelwang lefoko le ke le buileng le lona, ka re: ‘Motlhanka ga a mogolo go feta morena wa gagwe.’ Fa ba mpogisitse, le lona ba tlaa lo bogisa; fa ba tshegeditse lefoko la me, le la lona ba tlaa le tshegetsa. ₂₁Dilo tsotlhe tse, ba tlaa di lo direla ka ntlha ya leina la me, ka gobo ba sa itse yo o nthomileng. ₂₂Fa ke ka bo ke se ka ka tla ka bua le bone, ba ka bo ba se na boleo; jaanong ga ba na seipato mo boleong jwa bone. ₂₃Yo o nkilang, o ila le ene Rre. ₂₄Fa ke ka bo ke se ka ka dira mo go bone ditiro tse ope o sele o se kang a di dira, ba ka bo ba se na boleo; mme jaanong ba mponye, ba bile ba idile nna le Rre. ₂₅Mo go a dirafala, gore lefoko le tlhomamisiwe, le le kwadilweng mo molaong wa bone, ga twe: ‘Ba nkidile ka bomo fela.’

₂₆“E tlaa re fa Mogomotsi a tsile, yo ke tlaa mo romang mo go lona, a tswa kwa go Rara, e bong Mowa wa boammaaruri, o o tswang mo go Rara, ene o tlaa supa ka ga me; ₂₇mme le lona lo a supa, gonne lo ntse lo na le nna go tswa kwa tshimologong.