JOHANE 12

₁Ke gone e rileng malatsi a le marataro pele ga Tlolaganyo, Jesu a tla mo Bethania, kwa Lasaro o leng teng, yo Jesu o mo tsositseng mo baswing. ₂Jalo ba mo direla modiro wa maitseboa teng; Maretha a bo a emetse go ba tsholela dijo; Lasaro e le mongwe wa ba ba dutseng ba ja nae. ₃Foo Maria a tsaya setlolo sa nareto, e le se se tlhokegang thata, se le selekanyo sa bogare jwa litara, a tlotsa dinao tsa ga Jesu ka sone, a ba a mo phimola dinao ka moriri wa gagwe; mme ntlo ya tlala monko wa setlolo. ₄Jutase Isekariota mongwe wa barutwa ba gagwe, yo e leng ene yo o tlaa mo okang, a re: ₅“Ana setlolo se se ne se sa rekisediweng sa bona diponto di le 30, mme ga abelwa bahumanegi?” ₆Mo o go buile e seng ka gobo a gopotse bahumanegi; mme e re ka gobo a le legodu; mme e re ka a tshotse kgetsana ya madi, a itseele mo go tsenngwang mo go yone.

₇Foo Jesu a re: “Lo mme a se bolokele letsatsi la phitlho ya me. ₈Gonne bahumanegi lo na nabo ka metlha yotlhe, mme nna ga ke nne le lona ka metlha yotlhe.”

₉Foo ba e leng batho fela ba Bajuta ba tlhaloganya fa a le teng; mme ba tla e seng ka ntlha ya ga Jesu a le esi, mme e le gore ba bone le ene Lasaro, yo o mo tsositseng mo baswing. ₁₀Ba e leng ditlhogo tsa baperesiti ba gakololana gore ba bolaye le ene Lasaro; ₁₁ka gobo e le ka ntlha ya gagwe fa Bajuta ba le bantsi ba tsamaile, mme ba dumela mo go Jesu.

₁₂Ya re ka moso bontsi jo bogolo jwa batho ba ba tsileng mo modirong, ka ba utlwa fa Jesu a tla Jerusalema, ₁₃ba tsaya dikala tsa makolane, ba tswa ba ya go mo kgatlhantsha, mme ba thela lošalaba ba re: “Hosana, go bakwe yo o tlang mo ineng la Morena, e bong Kgosi ya Iseraele.”

₁₄Jesu e rile a bonye eselana, a e pagama, jaaka go kwadilwe ga twe: ₁₅“O se ka wa boifa, wena morwadia Sione; bona, Kgosi ya gago e etla, e pagame eselana ya esele.”

₁₆E rile pele barutwa ba gagwe ba se ka ba tlhaloganya dilo tse; mme ya re Jesu a sena go galalediwa, ba gakologelwa fa dilo tse di ne di kwadilwe ka ga gagwe, le gone fa ba kile ba mo direla dilo tse.

₁₇Batho ba bantsi ba e rileng a bitsa Lasaro go tswa mo phupung, a mo tsosa mo losong ba bo ba le teng, mme ba go supa. ₁₈Le bontsi jo bo ileng go mo kgatlhantsha, ba ya ka ntlha ya gone mo, ka ba utlwile fa a dirile sesupo se. ₁₉Foo Bafarisai ba raana ba re: “Bonang, jaaka lo sa fenye gope; aitsane lefatshe le ile go mo sala morago.”

₂₀Jaana ga bo go le Bagerika bangwe mo go bone ba ba ileng go obama mo modirong; ₂₁bao ba ya kwa go Filipo, yo o leng wa Bethesaita wa Galilea, ba mo lopa ba re: “Morena, re rata ra bona Jesu.” ₂₂Filipo a ya a bolelela Anterea, mme Anterea a tla a nna le Filipo, mme ba bolelela Jesu. ₂₃Jesu a ba fetola a re: “Lobaka lo tsile, lo Morwa Motho o tlaa galalediwang ka lone. ₂₄Ammaaruri, ammaaruri, ke a lo raya, fa tlhaka ya mabele e sa wele mo mmung, ya swa, e tle e nne yosi fela; mme fa e swa, e ungwe loungo lo logolo. ₂₅Yo o ratang botshelo jwa gagwe, bo a mo latlhegela; mme yo o ilang botshelo jwa gagwe mo lefatsheng leno, o tlaa bo bolokela botshelong jo bo sa khutleng. ₂₆Fa motho le fa e le mang a ntirela, a a ntshale morago; mme kwa ke teng motlhanka wa me le ene o tlaa nna teng; fa mongwe le fa e le mang a ntirela, Rara o tlaa mo tlotla.

₂₇“Jaanong mowa wa me o huduegile; mme ke tlaa reng? A ke tlaa re: ‘Rara, nkgolola mo lobakeng lo’? Mme ke tsile go fitlha mo lobakeng lo ka ntlha ya gone mo. ₂₈‘Rara, galaletsa leina la gago.’ ” Mme ga tla lentswe le tswa legodimong la re: “Ke le galaleditse, mme ke tlaa ba ke le galaletsa gape.”

₂₉Foo batho ba bantsi ba ba emeng teng, ba le utlwa, mme ba re: “Go ne go duma maru.” Ba bangwe ba re: “Moengele o buile nae.”

₃₀Jesu a ba fetola a re: “Lentswe le ga le a tla ka ntlha ya me, mme ke ka ntlha ya lona. ₃₁Jaanong go tshekiso ya lefatshe leno; jaanong kgosana ya lefatshe leno e tlaa kgoromelediwa kwa ntle. ₃₂Mme nna, fa ke tlhatlosiwa mo lefatsheng, ke tlaa gogela batho botlhe kwa go nna.” ₃₃Mo a go bua go kaya mokgwa wa loso lo o tlaa lo swang.

₃₄Foo batho ba bantsi ba mo fetola ba re: “Re utlwile mo molaong fa Keresete a nnela ruri ka bosakhutleng; o bua jang, wa re, Morwa Motho o na le go tlhatlosiwa? Morwa Motho yo ke mang?”

₃₅Jesu a ba raya a re: “Lesedi le sa ntse le le mo go lona ka lobakanyana. Sepelang lo sa ntse lo na le lesedi, gore lefifi le se lo tshware; e bile yo o sepelang mo lefifing ga a itse kwa o yang teng. ₃₆E re lo sa ntse lo na le lesedi, dumelang mo leseding, gore lo tle lo nne bana ba lesedi.”

Dilo tse Jesu a di bua, mme a tsamaya, a ba iphitlhela. ₃₇Mme le fa a ne a dirile ditshupo tse dintsi tse fa pele ga bone, ga ba a ka ba dumela mo go ene; ₃₈gore lefoko la ga Isaia moperofeti le dirale, le o le buileng a re: “Morena, mang yo o dumetseng polelo ya rona? Le letsogo la Morena le senoletswe mang?”

₃₉Ba ne ba retelelwa ke go dumela ka ntlha ya gone mo, gonne Isaia o bile a re: ₄₀“O ba foufaditse matlho, a thatafatsa pelo tsa bone; e se re kgotsa ba bona ka matlho, ba lemoga ka pelo, ba boa, mme ka ba fodisa.”

₄₁Isaia a bua dilo tse, ka gobo a bona kgalalelo ya gagwe, mme a bua ka ga gagwe.

₄₂Le fa go ntse jalo, le mo balaoding, ba le bantsi ba dumela mo go ene; mme ba se ka ba mo ipolela ka ntlha ya Bafarisai, e se re kgotsa ba kgaolwa mo ntlong ya thuto. ₄₃Gonne ba ne ba rata kgalaletso ya batho bogolo go kgalaletso ya Modimo.

₄₄Jesu a buela godimo a re: “Yo o dumelang mo go nna, ga a dumele mo go nna, fa e se mo go yo o nthomileng. ₄₅Mme yo o mponang, o bona yo o nthomileng. ₄₆Ke tsile mo lefatsheng ke le lesedi, gore le fa e le mang yo o dumelang mo go nna a se ka a nna mo lefifing. ₄₇Fa mongwe le fa e le mang a utlwa mafoko a me, mme a sa a tshegetse, ga ke mo sekise, gonne ga ke a tla go sekisa lefatshe, fa e se go boloka lefatshe. ₄₈Yo o nkganang, mme a sa amogele mafoko a me, o na le mongwe yo o mo sekisang; lefoko le ke le buileng, ke lone le le tlaa mo sekisang mo letsatsing la bofelo. ₄₉Gonne ga ke a ipuisa fela; mme Rara yo o nthomileng ke ene yo o nneileng taolo ya se ke tlaa se bolelang, le ya se ke tlaa se buang. ₅₀Ke a itse fa taolo ya gagwe e le botshelo jo bo sa khutleng; ke gone dilo tse ke di buang, ke di bua fela jaaka Rara a di mpoleletse.”