JEREMIA 8

₁“E tlaa re ka motlha oo, go bua Jehofa, ba tlaa ntsha marapo a dikgosi tsa Juta, le marapo a dikgosana tsa teng, le marapo a baperesiti le marapo a baperofeti, le marapo a banni ba Jerusalema; ba tlaa a epolola mo diphupung tsa bone. ₂Ba tlaa a anega fa pele ga letsatsi, le kgwedi, le bontsi jotlhe jwa legodimo, e le dilo tse ba di ratileng, tse ba di diretseng, tse ba di latetseng, tse ba di batlileng, tse ba di obametseng; ga a ketla a phuthwa le fa e le go fitlhwa; a tlaa nna letshotelo fa godimo ga mmu. ₃Mme masalela otlhe a a tlaa salang a losika lo lo bosula lo, a a tlaa bong a setse mo mafelong otlhe kwa ke a leleketseng teng, a tlaa ipatlela loso bogolo go botshelo,” go bua Jehofa wa masomosomo.

₄“Gape o ba reye o re: ‘Go bua jaana Jehofa. A re: A batho ba tlaa wa, mme ba se ke ba tsoge gape? A motho mongwe o tlaa fapoga, mme a se ke a boe?’ ₅Ke ka ntlha yang tšhaba e ya Jerusalema e releletse kwa morago ka tenego ya ka gale le ka gale? Ba tshegeditse tsietso thata, ba gana go boa.” ₆Ka reetsa mme ka utlwa, mme ga ba a ka ba bua ka tshiamo; ga go motho ope yo o ikwatlhaelang boikepo jwa gagwe ka go re: “Ke dirile eng?” Mongwe le mongwe o fapogela tseleng ya gagwe, jaaka pitse e e sotlhomelang mo tlhabanong. ₇Ee, mogolodi mo loaping o itse metlha ya one e e laotsweng; le lephoi, le peolwane, le kokolohutwe, di tle di tlhokomele metlha ya go tla ga tsone; mme batho ba me ga ba itse molao wa ga Jehofa.

₈“Lo bua jang, lo re: ‘Re botlhale, le molao wa ga Jehofa re na nao?’ Bonang, sekwala se se tsietsang sa bakwadi se dirile ka tsietso. ₉Ba ba botlhale ba tlhabilwe ke ditlhong, ba tseanye, ba tshwaregile; bonang, ba ganne lefoko la ga Jehofa; mme botlhale go na le jo bo ntseng jang mo go bone? ₁₀Ke gone ka moo basadi ba bone ke tlaa ba naya ba sele, le masimo a bone ke tlaa a naya ba ba tlaa a ruang fela; gonne mongwe le mongwe, go simologa ka yo mmotlana go ya kwa go yo mogolo, o ineetse mo bopelotshetlheng, go simolola ka moperofeti le go ya moperesiting, mongwe le mongwe o dira ka tsietso. ₁₁Ba fodisitse thobego ya morwadia batho ba me ka kgometho, ba re: ‘Kagiso, kagiso;’ le mororo go se na kagiso. ₁₂A ba kile ba tlhajwa ke ditlhong ba sena go dira se se makgapha? Nnyaa, ba ne ba sa tlhajwe ke ditlhong gope, le fa e le go thunya; ke gone ka moo ba tlaa wang le ba ba wang. Mo motlheng wa go sekisiwa ga bone ba tlaa digelwa fa fatshe,” go bua Jehofa. ₁₃“Ke tlaa ba nyeleletsa ruri, go bua Jehofa, ga go ketla go dirana le difine mo mofineng, le fa e le difeige mo mofeigeng; le lekakaba le tlaa swaba; le dilo tse ke di ba neileng di tlaa tloga di feta mo go bone.” ₁₄Ana re duletseng fela? Phuthegang, re tseneng mo metseng e e thekeleditsweng, re tuulaleng teng; gonne Jehofa Modimo wa rona o re didimaditse, o re nositse metsi a santlhokwe, gonne re leofetse Jehofa. ₁₅Ra lebelela kagiso, mme ga se ka ga tla molemo ope; ra lebelela motlha wa go fola, mme bonang ga nna tseano fela! ₁₆Pudulo ya dipitse tsa gagwe e utlwala di le kwa Dane; lefatshe lotlhe le roroma ka kgwankgwanyego ya dinatla tsa gagwe; gonne ba tsile, mme ba lakaitse lefatshe le tsotlhe tse di mo go lone; motse le ba ba agileng mo go one.

₁₇“Gonne, bonang, ke tlaa roma dinoga, dišaušawane mo go lona, tse di tlaa ganang go tshereganngwa; mme di tlaa lo loma,” go bua Jehofa.