Egepeto o fenya Karekemiše
1Lefoko la ga Jehofa le le tsileng mo go Jeremia moperofeti ka ga merafe. 2Ka ga Egepeto; ka ga ntwa ya ga Faro Neko kgosi ya Egepeto, e e neng e le fa nokeng ya Euferatese, mo Karekemiše, e Nebukatenesare kgosi ya Babilone o e kgemethileng ka ngwaga wa bone wa ga Jehoiakime morwa Josia, kgosi ya Juta.
3“Baakanyang thejana le thebe,
mme lo atamele go tlhabana.
4Golegang dipitse,
palamang, lona bapalami,
ikemiseng ka ditlhoro tsa phemelo
tsa lona;
gotlhang marumo,
Aparang meitshomelo ya phemelo.
5Ana ke go bonye ka ntlha yang?
Ba a tseanngwa,
ba buseditswe kwa morago;
diganka tsa bone di batantswe,
mme di tshabile ka thata
di sa šebe kwa morago;
theregiso e mo ntlheng tsotlhe,
go bua Jehofa.
6Yo o bofefo a a se tshabe,
a seganka se se falole;
ntlheng ya botsheka
fa nokeng ya Euferatese ba kgopilwe
ba ole.
7“Emang yo,
yo o hohomogang jaaka Nile,
e metsi a yone a itlolakisang
jaaka dinoka?
8Egepeto o hohomoga jaaka Nile,
mme metsi a gagwe
a itlolakisa jaaka dinoka; mme a re:
‘Ke tlaa nanoga,
ke khurumetsa lefatshe;
ke tlaa senya motse le banni ba one.’
9Tlhatlogang, lona dipitse;
šakgalang, lona dikara;
mme a diganka tsa ntwa
di tswele pele;
ba Kuše le ba Pute,
ba ba itseng go tshwara thebe;
le Balute ba ba itseng
go tshwara le go oba bora.
10Gonne letsatsi leo
ke letsatsi lengwe la ga Jehofa,
Jehofa wa masomosomo,
letsatsi la tefetso,
gore a tle a itefetse
mo babeng ba gagwe;
mme tšhaka e tlaa suputsa, e kgora,
e tlaa nwa madi a bone ya kgora;
gonne Jehofa,
Modimo wa masomosomo
o na le tlhabelo
mo lefatsheng la botsheka
fa nokeng ya Euferatese.
11“Tlhatlogela kwa Gileate,
mme o tseye gone boroku
jo bo alafang,
wena morwadia Egepeto
wa kgarebana;
o nwela melemo e le mentsi lefela;
ga o na go fola.
12Merafe e utlwetse ditlhong tsa gago,
le lefatshe le tletse go goa ga gago;
gonne seganka se thulakanye
le seganka,
di ole tsoo pedi mmogo.”
Go tla ga Nebukatenesare
13Lefoko le Jehofa o le buileng le Jeremia moperofeti, la ka fa Nebukatenesare kgosi ya Babilone o tlaa tlang ka gone a kgemetha lefatshe la Egepeto.
14“Bolelang mo Egepeto,
lo utlwatse mo Migetole,
lo bo lo utlwatse mo Nofe
le mo Tapanahese, lo re:
‘Ikemise, o ipaakanye;
gonne tšhaka e supuditse
mo tikologong ya gago.’
15Ana ba ba thata ba gago
ba kgopholetswe koo ka ntlha yang?
Ga ba a ka ba ema,
ka gonne Jehofa o ba kgophotse.
16O ne a kgopisa ba le bantsi,
ee, ba ne ba welana;
mme ba re:
‘Nanogang, a re boeleng
kwa bathong ba ga rona,
le kwa lefatsheng la ga rona,
re tswe mo tšhakeng
e e patikang.’
17Ba ne ba kua gone, ba re:
‘Faro, kgosi ya Egepeto
ke modumo fela,
o lesitse lobaka lo lo laotsweng
lwa feta.’
18“Jaaka ke tshedile, go bua Kgosi
e leina la yone e leng
Jehofa wa masomosomo, a re:
Ruri jaaka Tabore a ntse
mo gare ga dithaba,
le jaaka Karemele a ntse
fa lewatleng,
ene o tlaa tla jalo.
19Wena ngwana wa mosetsana
yo o agileng mo Egepeto,
ipaakanye go tla o ya botshwarong;
gonne Nofe
o tlaa nna tshwafalo fela,
o tlaa fisiwa, a tlhoka monni.
20“Egepeto ke kgomo ya moroba
e ntle thata;
mme tshenyego e e tswang ntlheng
ya botsheka e tsile, e tsile.
21Banna ba gagwe
ba ba thapilweng ka tuelo
ba ntse jaaka dinamane
tse di otlilweng
mo gare ga gagwe;
gonne le bone
ba buseditswe kwa morago,
ba tshabile mmogo,
ga ba a ka ba ema;
gonne letsatsi la tatlhego ya bone
le tsile mo go bone,
motlha wa tshekiso ya bone.
22“Mokgwasa wa one o tlaa tsamaya
jaaka wa noga;
gonne ba tlaa tsamaela gongwe
ka ntwa,
ba tlaa mo tlhasela ka dilepe,
jaaka baremi ba ditlhare.
23Ba tlaa rema sekgwa sa gagwe,
go bua Jehofa,
le fa se sa kake sa hukudiwa;
ka gonne ba feta tsie,
ba sena palo.
24Morwadia Egepeto
o tlaa tlhabisiwa ditlhong;
o tlaa tsenngwa mo seatleng
sa batho ba botsheka.”
25Jehofa wa masomosomo, Modimo wa Iseraele, a re: “Bonang, ke tlaa kgopholola Amone wa No, le Faro, le Egepeto, a na le medimo ya gagwe, le dikgosi tsa gagwe; e bong Faro le ba ba ikanyang mo go ene. 26Ke tlaa ba tsenya mo seatleng sa ba ba batlang botshelo jwa bone, le mo seatleng sa ga Nebukatenesare kgosi ya Babilone, le mo seatleng sa batlhanka ba gagwe; mme morago ga moo o tlaa nnwa jaaka mo metlheng ya bogologolo,” go bua Jehofa.
Morena o tlaa boloka batho ba gagwe
27“Wena Jakobe motlhanka wa me,
o se ka wa boifa,
se rerege, wena Iseraele;
gonne bona, ke tlaa go boloka
o le kwa kgakala,
le ba losika lwa gago
ba le kwa lefatsheng
la botshwaro jwa bone.
mme Jakobe o tlaa boa,
mme o tlaa nna mo thagamong
le mo boiketlong,
mme ga go na ope
yo o tlaa mmoifisang.
28Jakobe motlhanka wa me,
o se ka wa boifa,
go bua Jehofa;
gonne ke na nao;
gonne ke tlaa khutlisetsa ruri
merafe e ke go leleketseng
kwa go yone,
mme wena ga nketla
ke go khutlisetsa ruri;
mme ke tlaa go siamisa ka tekanyo,
ga nketla ke go lesa gope
o sa kgopololwa.”
