Jeremia o naya Baiseraele ba ba kwa Egepeto molaetsa wa Morena
1Lefoko le le tsileng mo go Jeremia ka ga Bajuta botlhe ba ba agileng mo lefatsheng la Egepeto, ba agile mo Migetole, le mo Tapanehese, le mo Nofe, le mo lefatsheng la Patherose, la re: 2“Jehofa wa masomosomo, Modimo wa Iseraele o bua jaana, a re: Lo bonye bosula jotlhe jo ke bo lerileng mo Jerusalema, le mo metseng yotlhe ya Juta; bonang, gompieno ke tshwafalo fela, mme ga go a aga motho ope teng; 3ka ntlha ya boikepo jwa bone, jo ba bo dirileng go ntlhotlheleletsa bogaleng, ka ba ya go fisa maswalo, le go direla medimo e sele, e bone ba sa e itseng, bone, le fa e le lona, le fa e le borraeno. 4Le fa go ntse jalo ka roma batlhanka botlhe ba me kwa go lona, e bong baperofeti, ke phakela ke ba roma ke re: ‘Ao! ke a lo rapela, se direng selo se se makgapha se ke se ilang.’ 5Mme ga ba a ka ba reetsa, le fa e le go sekega tsebe, go tla ba bowa mo boikepong jwa bone, go bakela go fisetsa medimo e sele maswalo. 6Ke gone ka moo tšararego ya me, le bogale jwa me jwa gorometsega, mme jwa tuka mo metseng ya Juta le mo mebileng ya Jerusalema; mme e kgakgabetse, e swafetse, jaaka go sa ntse go ntse le gompieno.
7“Ke gone ka moo Jehofa Modimo wa masomosomo, Modimo wa Iseraele o buang jaana, a re: Ke ka ntlha yang lo direla mewa ya lona bosula jo bogolo jo, go tlosa monna le mosadi, ngwanyana le yo o anyang, mo gare ga Juta, go tlhoka le go itshadisetsa ope; 8ka lo ntlhotlheleletsa bogaleng ka ditiro tsa diatla tsa lona, lo fisetsa medimo e sele maswalo mo lefatsheng la Egepeto, kwa lo ileng go jaka teng; gore lo tlosiwe, le gore lo tle lo nne phutso le kgobo mo merafeng yotlhe ya lefatshe? 9A lo lebetse boikepo jwa borraeno, le boikepo jwa dikgosi tsa Juta, le boikepo jwa lona tota, le boikepo jwa basadi ba lona, jo ba ne ba bo dirile mo lefatsheng la Juta, le mo mebileng ya Jerusalema? 10Ga ba a kokobediwa le gompieno, le gone ga ba a boifa, le fa e le go sepela mo molaong wa me, le fa e le mo ditaong tsa me, tse ke di beileng fa pele ga lona le fa pele ga borraeno.
11“Ke gone ka moo Jehofa wa masomosomo, Modimo wa Iseraele o buang jaana, a re: Bonang, ke tlaa lo lebisa sefatlhogo sa me bosula, e bong go kgaola Bajuta botlhe. 12Ke tlaa tsaya masalela a Juta, ba ba tlhomileng mogopolo go ya kwa lefatsheng la Egepeto go jaka teng, mme ba tlaa nyelediwa botlhe; ba tlaa wa mo lefatsheng la Egepeto, ba tlaa nyelediwa ka tšhaka le ka popamo; ba tlaa swa, go simolola ka ba babotlana le go ya kwa go ba bagolo, ka tšhaka le ka popamo, mme ba tlaa nna seferosa sebete, le kgakgamatso, le phutso, le kgobo. 13Gonne ke tlaa betsa ba ba agileng mo lefatsheng la Egepeto, jaaka ke beditse Jerusalema, ka tšhaka, ka popamo le ka kgogodi. 14Jalo mo masaleleng a Juta a a ileng lefatsheng la Egepeto go jaka teng, ga go ketla go falola ope le fa e le go sala go tla ba boela lefatsheng la Juta, le ba nang le keletso ya go boela teng go aga teng mo go lone, gonne ga go ketla go bowa bape fa e se ba ba tlaa falolang fela.”
15Foo banna botlhe ba ba itseng fa basadi ba bone ba tle ba fisetse medimo e sele maswalo, le basadi botlhe ba ba emeng teng, e le phuthego e kgolo, e bong batho botlhe ba ba agileng mo lefatsheng la Egepeto, mo Patherose, ba fetola Jeremia, ba re: 16“Ka ga lefoko le o le buileng le rona ka leina la ga Jehofa, ga re ketla re go reetsa. 17Lefoko lengwe le lengwe le le duleng mo molomong wa rona re tlaa le dira ruri, la go fisetsa kgosi ya sesadi ya legodimo maswalo, le go e thelela ditshupelo tse di nowang, jaaka re dirile, rona le borraetsho, le dikgosi tsa rona, le dikgosana tsa rona, mo metseng ya Juta, le mo mebileng ya Jerusalema: gonne ka baka loo re ne re na le dijo tse di tletseng, mme ra tshela sentle, re sa bone bosula bope. 18Re sa le re bakela go fisetsa kgosi ya sesadi ya legodimo maswalo, le go e thelela ditshupelo tse di nowang, re ntse re tlhoka dilo tsotlhe, mme re ntse re nyelediwa ke tšhaka le ke popamo.”
19“A e ne ya re re ntse re fisetsa kgosi ya sesadi ya legodimo maswalo re e thelela ditshupelo tse di nowang, a re kile ra e direla dinkgwenyana tse di papetla go e tshwantsha, le fa e le go e thelela ditshupelo tse di nowang re sena banna ba rona?”
20Foo Jeremia a raya batho botlhe, banna le basadi, e bong batho botlhe ba ba mo fetotseng jalo, a re: 21“Maswalo a lo a fisitseng mo metseng ya Juta, le mo mebileng ya Jerusalema, lona le borraeno, le dikgosi tsa lona, le dikgosana tsa lona, le batho ba lefatshe, a Jehofa ga a a di gakologelwa, mme a ga di a tsena mo pelong ya gagwe? 22Ga ba ga retelela Jehofa go tlhola a itshokile, ka ntlha ya bosula jwa ditiro tsa lona, le ka ntlha ya dilo tse di makgapha tse lo di dirileng; ke gone ka moo lefatshe la lona le ntseng tshwafalo, le kgakgamatso le phutso go sena monni, jaaka go ntse gompieno. 23Ereka lo fisitse maswalo, le gone ka lo leofetse Jehofa, mme lo se ka lwa akela lentswe la ga Jehofa, le fa e le go sepela mo molaong wa gagwe, le fa e le mo ditaong tsa gagwe, le fa e le mo ditshupong tsa gagwe; ke gone ka moo bosula jo bo lo dirafaletseng, jaaka go ntse gompieno.”
24Gape Jeremia a raya batho botlhe, le basadi botlhe, a re: “Utlwang lefoko la ga Jehofa, lona lotlhe Bajuta ba lo mo lefatsheng la Egepeto. 25Jehofa wa masomosomo, Modimo wa Iseraele o bua jaana, a re: Lona le basadi ba lona lo buile ka melomo lo bile lo se diraditse ka diatla tsa lona, lo re: ‘Ruri re tlaa tlhomamisa maikano a re ikanneng ka one a go fisetsa kgosi ya sesadi ya legodimo maswalo, le go e thelela ditshupelo tse di nowang.’ Ke gone, tshegetsang maikano a lona, lo bo lo tlhomamise maikano a lona. 26Ke gone, utlwang lefoko la ga Jehofa, lona lotlhe Bajuta ba lo agileng mo lefatsheng la Egepeto: ‘Bonang ke ikanne ka leina la me le legolo,’ go bua Jehofa, ‘go re, leina la me ga le ketla le tlhola le umakwa mo molomong wa motho ope wa Juta mo lefatsheng lotlhe la Egepeto, go re: Jaaka Jehofa a tshedile. 27Bonang ke ba lebela go ba direla bosula, e seng molemo; mme batho botlhe ba Juta ba ba mo lefatsheng la Egepeto ba tlaa nyelediwa ka tšhaka le ka popamo, go tsamaya ba fela. 28Ba ba falolang mo tšhakeng, ba tlaa bowa mo lefatsheng la Egepeto, ba boela lefatsheng la Juta ba le babotlana fela mo palong; mme masalela otlhe a Juta a a ileng lefatsheng la Egepeto go ya go jaka teng, a tlaa itse, go re, go tlaa ema lefoko la ga mang, la me, kgotsa la bone.
29“ ‘Mme se e tlaa nna sesupo go lona, go bua Jehofa, fa ke tlaa lo kgopholola mo felong fa, gore lo itse ruri fa mafoko a me a tlaa emalana le lona go lo direla bosula.’ 30Jehofa o bua jaana, a re: ‘Bonang, Faro Hofera kgosi ya Egepeto, ke tlaa mo tsenya mo seatleng sa baba ba gagwe, le mo seatleng sa ba ba batlang botshelo jwa gagwe; jaaka ke tsentse Setekia kgosi ya Juta mo seatleng sa ga Nebukatenesare kgosi ya Babilone, mmaba wa gagwe, yo o ne a batla botshelo jwa gagwe.’ ”
