JEREMIA 26

₁E rile mo tshimologong ya puso ya ga Jehoiakime morwa Josia, kgosi ya Juta, lefoko le, la tswa kwa go Jehofa, la re: ₂“Jehofa o bua jaana, a re: Ema mo lwapeng lwa ntlo ya ga Jehofa, o bue le ba metse yotlhe ya Juta, ba ba tlang go obamela mo ntlong ya ga Jehofa, bua mafoko otlhe a ke a go laolelang gore o a bue nabo; o se ka wa loba lefoko lepe. ₃E tlaa re gongwe ba reetse, mme mongwe le mongwe a boe mo tseleng ya gagwe e e bosula; gore ke tle ke ikwatlhaye ka ga bosula jo ke ikaeletseng go bo ba direla ka ntlha ya bosula jwa ditiro tsa bone.

₄“O ba reye, o re: ‘Jehofa o bua jaana, a re: Fa lo gana go ntheetsa, go sepela mo molaong wa me, o ke o beileng fa pele ga lona, ₅le go reetsa mafoko a batlhanka ba me, e bong baperofeti, ba ke ba romileng kwa go lona, ke phakela fela ke ba roma, mme lwa se ka lwa reetsa; ₆foo ke tlaa dira ntlo e gore e nne jaaka Shilo, ke tlaa dira motse o gore o nne phutso mo merafeng yotlhe ya lefatshe.’ ”

₇Mme baperesiti, le baperofeti, le batho botlhe ba utlwa Jeremia a bua mafoko a mo ntlong ya ga Jehofa. ₈Ga dirala, e rile Jeremia a sena go wetsa go bua gotlhe mo Jehofa o go mo laoletseng go go bua le batho botlhe, baperesiti le baperofeti, le batho otlhe ba tloga ba mo tshwara, ba re: “Ruri o tlaa swa. ₉Ana o perofeseditseng mo ineng la ga Jehofa, wa re: ‘Ntlo e, e tlaa nna Shilo, le motse o, o tlaa nna tshwafalo fela o sena monni’ ”? Mme batho botlhe ba ne ba kgobokanetse Jeremia mo ntlong ya ga Jehofa.

₁₀E rile dikgosana tsa Juta di utlwa dilo tseo, tsa tswa mo ntlong ya kgosi tsa tlhatlogela kwa ntlong ya ga Jehofa; tsa dula mo botsenong jwa kgoro e ntšha ya ntlo ya ga Jehofa. ₁₁Foo baperesiti le baperofeti ba bua le dikgosana le batho botlhe, ba re: “Monna yo, o tshwanetse loso; gonne o perofeseditse motse o bosula, jaaka lo utlwile ka ditsebe tsa lona.”

₁₂Foo Jeremia a bua le dikgosana le batho botlhe, a re: “Jehofa o nthomile gore ke tle go perofesetsa ntlo e bosula, le motse o, ka mafoko a otlhe a lo a utlwileng. ₁₃Ke gone jaana siamisang ditsela tsa lona, le ditiro tsa lona, mme lo utlwe lentswe la ga Jehofa Modimo wa lona; mme Jehofa o tlaa ikwatlhaela bosula jo o bo buileng ka ga lona. ₁₄Ka ga me, bonang, ke mo seatleng sa lona; dirang ka nna ka fa go leng molemo le tshiamo mo matlhong a lona ka teng. ₁₅Mme lo itsetse ruri, go re, fa lo mpolaya, lo tlaa lere madi a a se nang molato mo go lona, le mo motseng o, le mo banning ba one; gonne ruri Jehofa o nthomile kwa go lona, gore ke tle go bua mafoko otlhe a, mo ditsebeng tsa lona.”

₁₆Foo dikgosana le batho botlhe ba raya baperesiti le baperofeti, ba re: “Motho yo, ga a tshwanela go swa; gonne o buile le rona mo ineng la ga Jehofa Modimo wa rona.”

₁₇Foo ga nanoga bagolwane bangwe ba lefatshe, ba bua le phuthego yotlhe ya batho, ba re: ₁₈“Mikaia wa Morešethe o ne a perofesa mo metlheng ya ga Hesekia kgosi ya Juta; a bua le batho botlhe ba Juta, a re: ‘Jehofa wa masomosomo o bua jaana, a re:

₁₉“A Hesekia kgosi ya Juta le Bajuta botlhe a ba ne ba mmolaya? A ga a ne a boifa Jehofa, a ga a ne a lopa tlhogonolofatso mo go Jehofa, mme a Jehofa ga a ne a ikwatlhaela bosula jo o ne a bo buile ka ga bone? Jalo re ka bo re itirela bosula jo bogolo.”

₂₀Le gone go ne go bile go le monna mongwe yo o perofesang mo ineng la ga Jehofa, e bong Uria morwa Shemaia wa Kiriathe-jearime; a perofesetsa motse o bosula, le lefatshe le, ka fa mafokong otlhe a ga Jeremia. ₂₁E rile kgosi Jehoiakime, a na le batho botlhe ba gagwe ba batona, le dikgosana tsotlhe, a utlwa mafoko a gagwe, kgosi ya batla go mmolaya; mme e rile Uria a go utlwela, a boifa, a tshaba, a ya Egepeto. ₂₂Mme kgosi Jehoiakime a roma batho kwa Egepeto, e bong Elenathane morwa Akebore, le batho bangwe nae, ba ya Egepeto. ₂₃Ba ya ba ntsha Uria kwa Egepeto, ba mo isa kwa go kgosi Jehoiakime; mme a mmolaya, a latlhela setoto sa gagwe mo diphupung tsa ba e leng batho fela.

₂₄Mme seatla sa ga Ahikame morwa Shafane sa bo se na le Jeremia, gore ba se ka ba mo tsenya mo seatleng sa batho go mmolaya.