JEREMIA 24

₁Jehofa o ne a ntshupetsa, mme bonang, ga bo go le diroto di le pedi tsa difeige di beilwe fa pele ga tempele ya ga Jehofa; morago ga Nebukateresare kgosi ya Babilone a sena go tlosa Jekonia morwa Jehoiakime, kgosi ya Juta mo Jerusalema, a le setshwarwa, a na le dikgosana tsa Juta, le badiri ba ba maatlametlo, le bathudi, a ba fitlhisitse kwa Babilone. ₂Seroto sengwe se ne se na le difeige tse di monate thata, di ntse jaaka difeige tse di tleng di butswe pele; mme seroto se sengwe se ne se na le difeige tse di bosula tse di sa kakeng tsa jewa, ka di le bosula thata. ₃Foo Jehofa a nthaya a re: “O bonang Jeremia?” Mme ka re: “Difeige; ke difeige tse di monate, di le monate thata; le tse di bosula, di le bosula thata, e le tse di sa kakeng tsa jewa, ka di le bosula thata.”

₄Mme lefoko la ga Jehofa la tla mo go nna, la re: ₅“Jehofa, Modimo wa Iseraele o bua jaana, a re: ‘Fela jaaka difeige tse di monate tse, ke tlaa kaya ditshwarwa tsa Juta jalo, tse ke di ntshitseng mo felong fa, ka di isa kwa lefatsheng la Bakalatea, go di direla molemo. ₆Gonne ke tlaa tlhoma matlho a me mo go bone go tla ke ba direla molemo, ke tlaa ba ke ba busetsa mo lefatsheng le; ke tlaa ba aga, mme ga nketla ke ba rutla; ke tlaa ba tlhoma, mme ga nketla ke ba kumola. ₇Ke tlaa ba naya pelo ya go nkitse fa ke le Jehofa; mme ba tlaa nna batho ba me, mme ke tlaa nna Modimo wa bone; gonne ba tlaa boela mo go nna ka pelo yotlhe ya bone.

₈“ ‘Jaaka difeige tse di bosula, tse di sa kakeng tsa jewa, ka di le bosula thata;’ ruri Jehofa o bua jaana, a re: ‘Setekia kgosi ya Juta, le dikgosana tsa gagwe, le masalela a Jerusalema, a a setseng mo lefatsheng le, le ba ba agileng mo lefatsheng la Egepeto, ke tlaa ba tlhoboga fela jalo. ₉Ke tlaa ba tlhoboga fela ba ya go akgaakgelwa kwa le kwa mo magosing otlhe a lefatshe ka bosula, go nna kgobo le seane, tshotlo le phutso mo mafelong otlhe kwa ke tlaa ba lelekelang teng. ₁₀Ke tlaa tsenya tšhaka, le popamo, le kgogodi mo go bone, go tsamaye ba nyelediwe mo lefatsheng le ke le neileng bone le borraabo.’ ”