Senwelo se se thubegileng
1Jehofa o bua jaana, a re: “Ya o reke kurwana ya letsopa ya mmopi wa dipitsa, mme o tseye bagolwane bangwe ba batho, le bagolwane bangwe ba baperesiti; 2o tswele kwa mogogorong wa morwa Hinome, o o fa botsenong jwa kgoro ya Harasithe, o kakanye teng mafoko a ke tlaa a go bolelelang, 3O re: ‘Utlwang lefoko la ga Jehofa lona dikgosi tsa Juta, le banni ba Jerusalema; Jehofa wa masomosomo, Modimo wa Iseraele o bua jaana, a re: Bonang, ke tlaa lere bosula mo felong fa, mme le fa e le mang yo o bo utlwelang, ditsebe tsa gagwe di tlaa suma. 4Gonne ba ntatlhile, ba dirile golo fa golo go sele fela, ba fiseditse medimo e sele maswalo teng, e ba ne ba sa e itse, bone le fa e le borraabo, le fa e le dikgosi tsa Juta; ba tladitse madi a ba ba se nang molato mo felong fa; 5ba agile mafelo a a tlotlometseng a ga Baale, go tla ba fisa bana ba bone mo molelong, gore e nne ditshupelo tse di fisediwang Baale; e le se ke se kang ka se laola, le fa e le go se bua, le gone ga se a ka sa tsena mo mogopolong wa me. 6Ke gone bonang, metlha e etla, go bua Jehofa, ya go re felo fa ga go ketla go tlhola go bidiwa Tofethe, le fa e le Mogogoro wa morwa Hinome, fa e se Mogogoro wa Palaelo fela.
7“ ‘Ke tlaa dira kgakololo ya Juta le ya Jerusalema lefela fela mo felong fa; ke tlaa ba usa ka tšhaka fa pele ga baba ba bone, le ka seatla sa ba ba senkang go ba bolaya; mme ditoto tsa bone ke tlaa di naya dinonyane tsa loapi le dibatana tsa lefatshe, go nna dijo. 8Ke tlaa dira motse o go nna kgakgamatso, le kotso; mongwe le mongwe yo o tlang ka gone o tlaa gakgamala a ba a otsa ka ntlha ya dipetso tsotlhe tsa teng. 9Ke tlaa ba jesa nama ya bana ba bone ba basimane, le nama ya bana ba bone ba basetsana, mongwe le mongwe o tlaa ja nama ya tsala ya gagwe mo go dikweng ga motse, le mo pitlaganong e baba ba bone, le ba ba senkang botshelo jwa bone, ba tlaa ba pitlaganyang ka yone.’
10“Foo o tlaa thuba kurwana mo ponong ya batho ba o tsamayang nabo. 11O ba reye o re: ‘Jehofa wa masomosomo o bua jaana, a re: Fela jalo ke tlaa thuba tšhaba e, le motse o, jaaka motho a tle a thube sejana sa letsopa, se se sa kakeng sa tlhola se kopanngwa gape; mme ba tlaa fitlha baswi mo Tofethe, go tsamaye bonno jwa phitlhelo bo tlhokafale teng. 12Felo fa ke tlaa go direla jalo, go bua Jehofa, le banni ba gone, ke dira motse o fela jaaka Tofethe: 13Matlo a Jerusalema, le matlo a dikgosi tsa Juta, a a itshekolotsweng, a tlaa nna jaaka felo ga Tofethe, e bong matlo otlhe a ba fiseditseng bontsi jwa legodimo maswalo mo godimo ga ditlhomeso tsa one, ba ba ba thelela medimo e sele ditshupelo tse di nowang teng.’ ”
14Foo Jeremia a tswa Tofethe, kwa Jehofa o ne a mo romile teng go perofesa; mme a fitlha a ema mo lwapeng lwa ntlo ya ga Jehofa, mme a raya batho botlhe, a re: 15“Jehofa wa masomosomo, Modimo wa Iseraele o bua jaana, a re: ‘Bonang, ke tlaa lere mo motseng o le mo metsaneng yotlhe ya one, bosula jotlhe jo ke bo boletseng ka ga one; gonne ba ithatafaditse dithamo, gore ba se utlwe mafoko a me.’ ”
