JEREMIA 16

₁Lefoko la ga Jehofa la ba la tla mo go nna, la re: ₂“O se ka wa tsaya mosadi, le gone o se ka wa bona bana ba basimane le fa e le bana ba basetsana mo felong fa.” ₃Gonne Jehofa o bua jaana ka ga bana ba basetsana ba ba tsholwang mo felong fa, le ka ga bommaabo ba ba ba belegeng, le ka ga borraabo ba ba ba tshotseng mo fatsheng le, a re: ₄“Ba tlaa swa dintsho tse di botlhoko; ga ba ketla ba lelelwa, le gone ga ba ketla ba fitlhwa; ba tlaa nna jaaka letshotelo fa godimo ga mmu; ba tlaa nyelediwa ka tšhaka le ka moswele; ditoto tsa bone di tlaa nna dijo tsa dinonyane tsa loapi, le tsa dibatana tsa lefatshe.”

₅“Gonne Jehofa o bua jaana, a re: O se ka wa tsena mo ntlong ya khutsafalo, le gone o se ka wa ya go lela, le fa e le go ba thukhuthela tlhogo; gonne ke tlositse kagiso ya me mo bathong ba,” go bua Jehofa, “e bong bopelonomi jwa lorato le mautlwelobotlhoko a manana. ₆Bagolo le bannye ba tlaa swela mo fatsheng le; ga ba ketla ba fitlhwa, le gone batho ga ba ketla ba ba lelela, le fa e le go ba itshegakela, le fa e le go ba itšhemolela tlhogo. ₇Le gone batho ga ba ketla ba ba abela dijo ba le mo selelong, go ba direla matshediso a baswi; le gone batho ga ba ketla ba ba naya senwelo sa kgomotso go tla ba se nwela rraabo kgotsa mmaabo.

₈“Le gone o se ka wa tsena mo ntlong ya mediro go ya go dula nabo, go ja le go nwa.” ₉Gonne go bua jaana Jehofa wa masomosomo, Modimo wa Iseraele; a re: “Bonang, ke tlaa khutlisa mo felong fa, fa pele ga matlho a lona, le mo metlheng ya lona, modumo wa mokete le modumo wa boitumelo, lentswe la monyadi le lentswe la monyadwi.

₁₀“Go tlaa dirala, go re, e tlaa re fa o supetsa batho ba mafoko otlhe a, mme ba go raya ba re: ‘Ke ka ntlha yang Jehofa a boletse bosula jo bogolo jotlhe jo ka ga rona? Kgotsa boikepo jwa rona ke eng? Kgotsa boleo jwa rona ke eng jo re leofetseng Jehofa Modimo wa rona ka jone?’ ₁₁Foo o tlaa ba raya o re: ‘E re ka borraeno ba ntatlhile, go bua Jehofa, mme ba setse medimo e sele morago, ba e diretse, ba e obametse, mme ba ntatlhile, ba se ka ba boloka molao wa me; ₁₂mme lona lo dirile bosula bogolo go borraeno; gonne bonang, mongwe le mongwe o sepela ka fa logwading lwa pelo ya gagwe e e bosula, lwa ba lwa tla lwa se ka lwa ntheetsa; ₁₃ke gone ka moo ke tlaa lo eola mo lefatsheng le, ke lo eolela kwa lefatsheng le lo sa le itseng, lona, le fa e le borraeno; mme lo tlaa direla medimo e sele gone motshegare le bosigo; gonne ga nketla ke lo supetsa botsalano bope.’

₁₄“Ke gone bonang, metlha e etla e go se ketlang go tlhola go buiwa ka yone, go twe: ‘Jaaka Jehofa a tshedile, yo o tlhatlositseng bana ba Iseraele kwa lefatsheng la Egepeto;’ ₁₅mme go tlaa twe: ‘Jaaka Jehofa a tshedile, yo o tlhatlositseng bana ba Iseraele mo lefatsheng la botsheka, le kwa mafatsheng otlhe kwa o ne a ba leleketse teng’; ke tlaa ba ke ba lere gape mo lefatsheng la bone le ke le neileng borraabo.

₁₆“Bonang ke tlaa romela batshwari ba ditlhapi ba le bantsi,” go bua Jehofa, “mme ba tlaa ba tshwara jaaka ditlhapi; morago ga mo ke tlaa romela batsomi ba le bantsi, mme ba tlaa ba tsoma ba ba ntsha mo dithabeng tsotlhe, le mo makhubung, le mo dipharong tsa mafika. ₁₇Gonne matlho a me a mo ditseleng tsotlhe tsa bone; ga ba a subegela sefatlhogo sa me, le gone boikepo jwa bone ga bo a bipegela matlho a me. ₁₈Pele, ke tlaa lefetsa boikepo jwa bone le boleo jwa bone sebedi; gonne ba leswefaditse lefatshe la me ka ditoto tsa dilo tsa bone tse di maswe, ba tladitse boswa jwa me ka makgapha a bone.”

₁₉Jehofa, thata ya me, le kago ya me e e thata, le botshabelo jwa me mo metlheng ya patikego, merafe e tlaa tla mo go wena e tswa kwa dikhutlong tsa lefatshe, mme e tlaa re: “Borraetsho ga ba a rua sepe fa e se maaka fela, e bong boithamako le dilo tse go se nang thuso epe mo go tsone. ₂₀A motho o ka itirela medimo, e e bileng e se medimo ya sepe?”

₂₁“Ke gone ka moo, bonang, ke tlaa ba itsise, ka lobaka lono fela ke tlaa ba itsise seatla sa me le nonofo ya me; mme ba tlaa itse fa leina la me e le Jehofa.