Jeremia o bua ka ga molao wa Kgolagano
1Lefoko le le tsileng mo go Jeremia le tswa kwa go Jehofa, la re: 2“Utlwang mafoko a kgolagano e, mme lo bue le banna ba Juta, le banni ba Jerusalema. 3O ba reye o re: Go bua jaana Jehofa, Modimo wa Iseraele, a re: ‘A go hutsege motho yo o sa utlweng mafoko a kgolagano e, 4e ke e laoletseng borraeno ka motlha o ke ba ntshitseng ka one mo lefatsheng la Egepeto, mo leubelong la tshipi,’ ka re: ‘Utlwang lentswe la me, mme lo di dire, ka fa go tsotlhe tse ke di lo laoletseng; jalo lo tlaa nna batho ba me, le nna ke tlaa nna Modimo wa lona, 5gore ke tlhomamise ikano e ke e ikanetseng borraeno, ya go ba naya lefatshe le le elang maši le dinotshe,’ jaaka go ntse le gompieno.” Foo ka fetola, ka re: “A go nne jalo, Jehofa.”
6Mme Jehofa a nthaya a re: “Bolela mafoko a otlhe mo metseng ya Juta, le mo mebileng ya Jerusalema, o re: ‘Utlwang mafoko a kgolagano e, lo a dire. 7Gonne ke ntse ka laya borraeno ka thata mo motlheng o ke ba ntshitseng mo lefatsheng la Egepeto ka one nako e sa le eno, ke phakele ke ba laye, ke re: Utlwang lentswe la me. 8Le fa go ntse jalo ga ba a ka ba utlwa, le fa e le go sekega tsebe tsa bone, mme mongwe le mongwe a sepela ka fa logwading lwa pelo ya gagwe e e bosula; ke gone ka moo ka tlisa mo go bone mafoko otlhe a kgolagano e, a ke a ba laoletseng gore ba a dire, mme ba se ka ba a dira.’ ”
9Mme Jehofa a nthaya a re: “Go fitlhetswe morero mo bathong ba Juta, le mo banning ba Jerusalema. 10Ba boetse kwa maikepong a borraabo, ba ba ganneng go utlwa mafoko a me; ba ineetse medimo e sele go ya go e direla; ba ntlo ya Iseraele le ba ntlo ya Juta ba sentse kgolagano ya me e ke e dirileng le borraabo. 11Ke gone ka moo, go bua jaana Jehofa, a re: ‘Bonang, ke tlaa tlisa bosula mo go bone, jo ba se ketlang ba nonofa go falola mo go jone; ba tlaa goela kwa go nna, mme ga nketla ke ba reetsa. 12Foo metse ya Juta le banni ba Jerusalema ba tlaa ya ba goela kwa medimong e ba e isetsang maswalo; mme ga e ketla e ba boloka gope mo motlheng wa pitlagano ya bone. 13Gonne palo ya medimo ya gago e kana ka palo ya metse ya gago, wena Juta; jaaka palo ya mebila ya Jerusalema lo agetse selo se se tlhabisang ditlhong dibeso tse di kalo, e bong dibeso tsa go fisetsa Baale maswalo.’
14“Ke gone o se ka wa rapelela tšhaba e, le gone o se ka wa tsholetsa selelo le fa e le morapelo ka ga bone; gonne ga nketla ke ba utlwa mo motlheng o ba goelang kwa go nna ka one ka ga pitlagano ya bone.
15“Ana moratwa wa me o dirang mo ntlong ya me, etswa a dirile boatla le batho ba le bantsi, le nama e e itshepileng e tlogile mo go wena? E re o dira bosula e be e le gone o itumelang.” 16Jehofa a go raya leina a re: “Motlhware o monana o montle, o o loungo lo lo molemo; o o tshubetse molelo ka modumo wa pheretlhego e kgolo, mme dikala tsa one di robegile.”
17Gonne Jehofa wa masomosomo yo o go tlhomileng, o boletse bosula ka ga gago, ka ntlha ya bosula jwa ba ntlo ya Iseraele, le ba ntlo ya Juta, jo ba bo itiretseng ka go ntlhotlheleletsa bogaleng, ka go fisetsa Baale maswalo.
Jeremia o rerelwa go bolawa
18Jehofa o go nkitsisitse,
mme ka go itse;
foo wa mpontsha ditiro tsa bone.
19Ke ne ke ntse jaaka kwanyana
e e bokgwabo,
e e gogelwang tlhabong;
ke ne ke sa itse
fa ba ntogetse maano ba re:
“A re senyeng setlhare
le loungo lwa sone,
a re mo tloseng
mo lefatsheng la batshedi,
gore leina la gagwe
le se tlhole le gakologelwa.”
20Wena Jehofa wa masomosomo,
yo o atlholang ka tshiamo,
yo o lekang diphilo le pelo,
a nke ke bone pusoloso ya gago
mo go bone;
gonne ke go senoletse mafoko a me.
21Ke gone ka moo Jehofa o bua jaana, a re: Ka ga batho ba Anathothe, ba ba senkang botshelo jwa gago, ba re: “Se perofese ka leina la ga Jehofa, o ka tla wa swa ka seatla sa rona.” 22Ke gone ka moo go bua jaana Jehofa wa masomosomo, a re: “Bonang, ke tlaa ba betsa; makau a tlaa swa ka tšhaka; bomorwaa bone le bomorwadia bone ba tlaa swa ka popamo; 23mme ga go ketla go nna masalela mo go bone, gonne ke tlaa lere bosula mo banneng ba Anathothe, e bong ngwaga wa tshekiso ya bone.”
