JEREMIA 1

₁Mafoko a ga Jeremia morwa Hilekia, wa baperesiti ba ba neng ba le kwa Anathothe mo lefatsheng la Benjamine, ₂yo lefoko la ga Jehofa le kileng la tla kwa go ene mo metlheng ya ga Josia morwa Amone, kgosi ya Juta, ka ngwaga wa 13 wa puso ya gagwe. ₃Le gone la tla mo metlheng ya ga Jehoiakime morwa Josia, kgosi ya Juta; go ya bofelong jwa ngwaga wa 11 wa ga Setekia morwa Josia, kgosi ya Juta; go ya kwa go tlosiweng ga ba Jerusalema ba le ditshwarwa ka kgwedi ya botlhano.

₄Jaana lefoko la ga Jehofa la tla mo go nna, la re: ₅“E rile ke ise ke go bopele mo sebopelong ka bo ke go itse, le o ise o tswe mo sebopelong ka bo ke go itshepisitse; ke go laoletse go nna moperofeti mo merafeng.”

₆Foo ka re: “Ao, Jehofa Modimo! Bona, ga ke itse go bua, gonne ke ngwanyana fela.”

₇Mme Jehofa a nthaya a re: “Se re: ‘Ke ngwanyana fela’; gonne le fa e le bomang ba ke tlaa go romang kwa go bone o na le go ya fela, mme le fa e le eng se ke se go laolelang o na le go se bua fela. ₈O se ka wa boifa ka ntlha ya bone, gonne ke na nao go go golola;” go bua Jehofa.

₉Foo Jehofa a ntsha seatla, mme a nkama molomo; mme Jehofa a nthaya a re: “Bona ke tsentse mafoko a me mo molomong wa gago. ₁₀Bona, ke go neile thata mo merafeng le mo magosing gompieno, go kumola le go phalolela fa fatshe, go senya le go ribegetsa; go aga le go tlhoma.”

₁₁Gape lefoko la ga Jehofa la tla mo go nna, la re: “Jeremia, o bonang?” Ka re: “Ke bona thupa ya setlhare sa mothamane.”

₁₂Foo Jehofa a nthaya a re: “O bonye sentle, gonne ke dibetse lefoko la me ka tlhodumelo go tla ke le dirafatsa.”

₁₃Mme lefoko la ga Jehofa la tla mo go nna lwa bobedi, la re: “O bonang?” Ka re: “Ke bona pitsa e tona e e belang ka thata; mme marago a yone a sekametse kwa ntlheng ya botsheka.”

₁₄Foo Jehofa a nthaya a re: “Bosula bo tlaa phunyegela banni botlhe ba lefatshe, bo tswa ntlheng ya botsheka. ₁₅Gonne bona, ke tlaa bitsa ba makgotla otlhe a magosi a a kwa ntlheng ya botsheka;” go bua Jehofa; mme ba tlaa tla, mme mongwe le mongwe o tlaa tlhoma setulo sa gagwe sa bogosi fa matsenong a dikgoro tsa Jerusalema, le fa tlase ga dithako tsa one mo tikologong, le fa tlase ga metse yotlhe ya Juta.

₁₆“Ke tlaa bolela ditshekiso tsa me ka ga boikepo jotlhe jwa bone; ka ba ntatlhile, ba fiseditse medimo e sele maswalo, ba obametse tse e leng ditiro tsa diatla tsa bone fela.

₁₇“Ke gone wena o ikokwaele lotheka, o nanoge, o bue nabo tsotlhe tse ke di go laolelang, o se ka wa tseanngwa ke bone, ka nka tla ka go tseanya fa pele ga bone. ₁₈Gonne, bona, ka tsatsi leno ke go dirile motse o o thekeleditsweng, le tshipe lore, le dithako tsa kgotlho, kemalano le lefatshe lotlhe, kemalano le dikgosi tsa Juta, kemalano le dikgosana tsa teng, kemalano le baperesiti ba teng, le kemalano le batho botlhe ba lefatshe. ₁₉Ba tlaa tlhabana nao; mme ga ba ketla ba go fenya; gonne ke na nao, go bua Jehofa, go go golola.”