BAATLHODI 17

₁Go ne go le monna mongwe wa lefatshe la makgabana la Eferaime, leina la gagwe e le Mika. ₂A raya mmaagwe a re: “Diselefera tse di 1 100 tse o di thukhuthilweng, tse o buileng phutso ka ga tsone, wa ba wa e buela mo ditsebeng tsa me, bona, selefera seo se mo go nna; ke nna ke se tsereng.” Mmaagwe a re: “A morwaake a segofadiwe ke Jehofa.” ₃Diselefera tse di 1 100 a di rebolela mmaagwe, mme mmaagwe a re: “Ruri selefera se, ke se kgethela Jehofa, se tswa mo seatleng sa me, ka ga morwaake, go dira setshwantsho se se setilweng, le setshwantsho se se thetsweng; ke gone jaana ke tlaa se busetsa mo go wena.” ₄Ya re a busetsa madi kwa go mmaagwe, mmaagwe a tsaya diselefera di le 200, a di neela mothudi, mme ene a dira ka tsone setshwantsho se se setilweng, le setshwantsho se se thetsweng; mme sa nna mo ntlong ya ga Mika.

₅Monna yoo Mika o ne a na le ntlo ya medimo, mme a dira sekhutlana, le mereo. A tshwaya mongwe wa bomorwawe, ene a nna moperesiti wa gagwe. ₆Mo metlheng eo go ne go se na kgosi mo Iseraele; motho mongwe le mongwe a dira se se siameng mo matlhong a gagwe fela.

₇Go ne go le lekau lengwe le le tswang Bethelehema wa Juta, la losika lwa Juta, yo e ne e le Molefi, a bo a jakile gone. ₈Monna yoo a huduga mo motseng, mo Bethelehema wa Juta, a ya go jaka kwa o ka bonang bonno gone; mme a re a eta a tla mo lefatsheng la makgabana la Eferaime, kwa ntlong ya ga Mika. ₉Mme Mika a mo raya a re: “O tswa kae?” A mo raya a re: “Ke Molefi wa Bethelehema wa Juta, ke ya go jaka kwa ke ka bonang bonno teng.”

₁₀Mika a mo raya a re: “Aga le nna, o bo o nne rre le moperesiti mo go nna, ke tlaa go naya diselefera di le some ka ngwaga le ngwaga, le diaparo le dijo tsa gago.” Jalo Molefi a tsena. ₁₁Molefi a itumela go aga le monna yoo; lekau leo la nna mo go ene jaaka mongwe wa bomorwawe. ₁₂Mika a tshwaya motho wa Molefi, mme lekau leo la nna moperesiti wa gagwe a ba a nna mo ntlong ya ga Mika. ₁₃Foo Mika a re: “Jaanong ke a itse fa Jehofa a tlaa ntirela molemo, ka ke na le Molefi go nna moperesiti wa me.”