Morwa Isaia o dirwa sesupo
1Mme Jehofa a nthaya a re: “Tsaya sekwalela se segolo, mme o kwale mo go sone ka se motho o kwalang ka sone, o re: ‘Maherešalale-haše-base.’ 2Mme ke tlaa itseela basupi ba tlhomamo gore ba kwale, e bong moperesiti Uria, le Sekaria morwa Jeberekia.”
3Ka ya mosading wa me wa moperofeti; mme a ithwala, a belega ngwana wa mosimane. Foo Jehofa a nthaya a re: “Mo reye leina o re: ‘Maherešalale-haše-base.’ 4Gonne e tlaa re pele ngwana a ise a nne le kitso ya go bitsa, a re: ‘Rra,’ le ‘Mma,’ dikhumo tsa Damaseko le dithopo tsa Samaria di tlaa rwalwa fa pele ga kgosi ya Asiria.”
Kgosi ya Asiria e a goroga
5Jehofa a fela a bua le nna gape a re: 6“A e re ka tšhaba e, e ganne metsi a Shiloa, a a elang ka bonya, ba itumelela Resine le morwa Remalia; 7ke gone jaana ka mo, bonang, Morena o tlisang mo go bone metsi a Noka, a a thata a bile a le matona, e bong kgosi ya Asiria le kgalalelo yotlhe ya gagwe, o tlaa tlhatloga le meedi yotlhe ya gagwe, a penologa ka dintshi tsotlhe tsa gagwe. 8O tlaa kgokgweeletsa kwa pele kwa Juta, o tlaa penologa a ralala; o tlaa fitlha le kwa thamong; mme tsharololo ya diphuka tsa gagwe e tlaa tlala ka katlhamo yotlhe ya lefatshe la gago, wena Imanuele.”
9Tsosang sedumedi, lona ditšhaba, mme lo tlaa thubaganngwa; lo sekege tsebe, lona, lotlhe ba mafatshe a a kgakala; itlameng, mme lo tlaa thubaganngwa itlameng, mme lo tlaa thubaganngwa. 10Gakololanang; mme go tlaa tswa lefela; buang lefoko, mme ga le ketla le ema; gonne Modimo o ntse le rona.
Jehofa o tlhagisa moperofeti go ikgapa mo bosuleng
11Gonne Jehofa o buile le nna jaana ka seatla se se thata, mme a nthuta, gore ke se tsamaye mo tseleng ya tšhaba e, a re: 12“Lo se ka lwa re: Go morero, ka ga sengwe le sengwe se batho ba ba reng: Go morero; le gone lo se ka lwa boifa se bone ba se boifang; le fa e le go boborana ka ga sone. 13Mme Jehofa wa masomosomo lo itshepise ene; a e nne ene poifo ya lona, mme a e nne ene poborano ya lona. 14E tlaa nna ene felo ga boitshepo; mme o tlaa bo a le lentswe le le kgopang, le lefika la borumolang, mo matlong a mabedi a Iseraele, a ba a nna seru le mutlwane mo banning ba Jerusalema. 15Ba le bantsi ba tlaa kgokgweetsega ba wa, ba robega, ba iteisiwa, ba tshwarawa.”
Tlhagiso ka ga go buisanya le baswi
16Wena, bofa tshupo, o kanele molao mo barutwaneng ba me. 17Ke tlaa lebelela Jehofa yo o subelang ntlo ya ga Jakobe sefatlhogo sa gagwe, ke tlaa mo lebelela.
18Bonang, nna le bana ba Jehofa o ba nneileng, re beilwe go nna ditshupo le dikgakgamatso mo Iseraele, di tswa mo go Jehofa wa masomosomo, yo o agileng mo thabeng ya Sione.
19E tlaa re fa ba tlaa lo raya ba re: “Botsang ba ba buang le badimo, le mo go ba e leng baloi, ba ba tswirinyang, le ba ba pepedumang;” a tšhaba ga e ke e lopa mo go o e leng modimo wa yone? A ka ga ba ba tshedileng, go ka bodiwa baswi?
20A go iweng molaong le ditshupong! Fa ba sa bue ka fa lefokong le, ruri ga go ketla go ba phepafalela.
Dinako tsa matshwenyego
21Ba tlaa le ralala ba le mo bothateng, ba bolailwe ke tlala; mme go tlaa dirala, go re, ba tlaa re ba bolailwe ke tlala ba inyanyarele, ba hutsakane ka kgosi ya bone, le ka modimo wa bone, ba lelalele kwa godimo. 22Ba tlaa leba kwa lefatsheng, mme bona, go bo go le tlalelo e e mahehe, mme ba tlaa lelekelwa mo lefifing le le lebe.
