ISAIA 66

₁Go bua jaana Jehofa, a re: “Legodimo ke setulo sa me sa bogosi, mme lefatshe ke sebeo sa me sa dinao; lo tlaa nkagela ntlo e e ntseng jang? Le felo ga boikhutso jwa me e tlaa nna gofe? ₂Gonne dilo tse tsotlhe seatla sa me se di dirile, jalo dilo tse tsotlhe tsa tla tsa nna, go bua Jehofa; mme motho ke yo, yo ke tlaa lebang kwa go ene, e bong ene yo o humanegileng, a le mowa o o ngomogileng, mme a roroma ka lefoko la me.

₃“Yo o bolayang kgomo o ntse jaaka yo o bolayang motho; yo o isang kwanyana setlhabelo, o ntse jaaka yo o komolang ntša thamo; yo o supelang seromololo, jaaka yo o supelang madi a kolobe; yo o fisang maswalo jaaka yo o segofatsang modimo wa sesetwa, ee: ba itebalebetse mekgwa e e leng ya bone, le mowa wa bone o kgatlhega thata mo dilong tsa bone tse di makgapha. ₄Le nna ke tlaa itebalebela diphoro tsa bone, ke tlaa tlisa dipoifo tsa bone mo go bone; gonne e rile ke bitsa, ope a se ka a araba, e rile ke bua, ba se ka ba utlwa; mme ba ne ba dira se se bosula mo matlhong a me fela, ba itshenkela se ke sa natefelwang ke sone.”

₅Utlwang lefoko la ga Jehofa, lona ba lo roromang ka lefoko la gagwe: “Bomorwa rraeno ba ba lo tlhoileng, ba lo latlhetse kwa ntle ka ntlha ya leina la me, ba rile: ‘A Jehofa a galalediwe, gore re tle re bone boitumelo jwa lona;’ mme ba tlaa tlhajwa ke ditlhong.

₆“Go tumo ya pheretlho e e tswang mo motseng, tumo e e tswang mo tempeleng, tumo ya ga Jehofa yo o ntshetsang baba ba gagwe maduo a a ba lekanyeng.

₇“E rile a ise a ikutlwe ditlhabi a khubama; e rile motlotsedi wa gagwe o ise o tle, a belega ngwana wa mosimane. ₈Mang yo o kileng a utlwa selo se se ntseng jalo? Mang yo o bonyeng tse di ntseng jalo? A lefatshe le ka tsalwa ka letsatsi le le lengwe fela? A morafe o ka belegelwa gongwe fela? Gonne e rile Sione a sa ntse a ikutlwa ditlhabi a ba a belega bana ba gagwe. ₉A ke tlaa kukuntsha, mme ke se ka ka belegisa?” Go bua Jehofa: “Nna yo ke belegisang, a ke tlaa tswala sebopelo?” Go bua Modimo wa gago.

₁₀“Itumeleng le Jerusalema, lo bo lo ipele ka ntlha ya gagwe, lona lotlhe ba lo mo ratang; itumeleng nae ka moduduetso, lona lotlhe ba lo mo lelelang; ₁₁gore lo tle lo anye lo kgore mabele a gagwe a a nametsang pelo; gore lo tle lo game lo napole, mme lo thethebale thata ka letlotlo la kgalalelo ya gagwe.”

₁₂Gonne go bua jaana Jehofa, a re: “Bona, ke tlaa anamisetsa kagiso kwa go ene jaaka noka, le kgalalelo ya merafe jaaka nokana e e penologelang kwa ntle, gore lo tomane lo nwe teng; lo tlaa tsholwa ka noka, lo tlaa akgolwa mo mangoleng. ₁₃Fela jaaka mongwe yo mmaagwe o mo gomotsang, nna ke tlaa lo gomotsa jalo; mme lo tlaa gomotsega mo Jerusalema.” ₁₄Mme lo tlaa go bona, le pelo tsa lona di tlaa itumela, marapo a lona a tlaa kgaba jaaka bojang jo botalana; mme seatla sa ga Jehofa se tlaa itsiwe ntlheng ya batho ba gagwe, mme o tlaa gakalela baba ba gagwe.

₁₅Gonne bonang, Jehofa o tlaa tla ka molelo, le dikara tsa gagwe di tlaa nna jaaka sefefo; a tla go ntsha bogale jwa gagwe ka tšarologo, le kgalemo ya gagwe ka dikgabo tsa molelo. ₁₆Gonne Jehofa o tlaa emela kgang ka molelo le ka tšhaka ya gagwe, o tlaa bua le nama yotlhe; mme bagaidiwi ba ga Jehofa ba tlaa nna bantsi.

₁₇“Ba ba iitshepisang ba intlafaletsa go ya mo masimong ba bopeletse, ba ja nama ya kolobe, le se se makgapha, le peba; bone ba tlaa khutla mmogo, go bua Jehofa.

₁₈“Gonne ke a di itse ditiro tsa bone, le megopolo ya bone; lobaka lo etla lo ke tlaa phuthang merafe yotlhe le diteme ka lone, mme ba tlaa tla, ba tla bona kgalalelo ya me. ₁₉Ke tlaa tlhoma sesupo mo go bone; mme ba ba falolang mo go bone ke tlaa ba roma kwa merafeng, kwa Tarešiše, le kwa Pule le Lute, e le ba ba itseng go laela bora, kwa Tubale, le Jafane, kwa ditlhakeng tse di kgakala, kwa ba iseng ba ke ba utlwe tumedi ya me, le gone ba ise ba bone kgalalelo ya me; mme ba tlaa kakanya kgalalelo ya me mo merafeng. ₂₀Ba tlaa lere bomorwa rraeno botlhe, ba ba ntsha mo merafeng yotlhe, go nna tshupelo kwa go Jehofa, ba tla ka dipitse le mo dikareng, le ka difata, le ka dimmoulo, le ka dikamelana tse di fefogang, ba tla mo Jerusalema, mo thabeng ya me e e boitshepo, go bua Jehofa, jaaka bana ba Iseraele ba tle ba tlise tshupelo ka sejana se sentle mo ntlong ya ga Jehofa. ₂₁Mme ke tlaa tsaya ba bone go nna baperesiti le Balefi,” go bua Jehofa.

₂₂“Gonne jaaka magodimo a maša a ke tlaa a dirang a tlaa sala a ntse fa pele ga me, le lefatshe le leša, losika lwa lone lo tlaa sala lo ntse jalo, le leina la lone jalo,” go bua Jehofa. ₂₃“Go tlaa dirala, go re, go tloga mo kgweding e ntšha nngwe go ya kwa go e nngwe, le mo Sabateng mongwe go ya kwa go o mongwe, nama yotlhe e tlaa tla go obama fa pele ga me,” go bua Jehofa. ₂₄“Ba tlaa tsamaela kwa ntle ba ya go bona ditoto tsa batho ba ba dirileng ditlolo fa pele ga me; gonne seboko sa bone ga se ketla se swa. Le gone molelo wa bone ga o ketla o tingwa; mme ba tlaa nna se se tsitlisang marapo mo bathong botlhe fela.”