ISAIA 57

₁Mosiami o a nyelela, mme ga go motho ope yo o go bayang mo pelong; batho ba ba pelotlhomogi ba a tlosiwa, mme ope a sa tlhokomele go re mosiami o tlosediwa bosula jo bo tlang. ₂O tsena mo kagisong: ba lapologa mo malaong a bone, e bong mongwe le mongwe yo o tsamayang mo thokgamong ya gagwe.

₃“Atamelang kwano lona bomorwa mosadi yo o moloi, lona losika lwa mosadi wa seotswa le wa seaka. ₄Lo a bo lo tshameka ka mang? Lo atlhamolosetsa mang molomo, lo laila ka loleme? A ga lo bana ba tlolo, losika lwa maaka. ₅Ba lo ikgotetsang ka medimo ya disetwa, fa disetwa fa tlase ga setlhare sengwe le sengwe se setala; lo bolaya banyana mo megorogorong, fa tlase ga mariba a mafika? ₆Ga eno ke mo gare ga maje a a borethe a mogorogoro; one ke one ga eno; ke one a o a theletseng tshupelo ya seno, o a iseditse seromololo. A nka rapelesega ka dilo tse? ₇O beile bolao jwa gago mo thabeng e e godileng, e e godimo thata; wa tlhatlogela koo wa ya go isa setlhabelo. ₈O tlhomile segopodiso sa gago ka fa morago ga ditswalo le mephekwana; o ikapoletse o sele e seng nna, mme o tlhatlogile; o katolositse bolao jwa gago, o golaganye nabo; wa rata bolao jwa bone fela kwa o bo bonang teng. ₉Wa ya kwa kgosing o tshotse setlolo, wa oketsa tse di nkgang monate tsa gago, wa roma barongwa ba gago kwa kgakala, wa itswapolela le go ya Bobipong. ₁₀Wa lapisiwa ke boleele jwa loeto lwa gago; le fa go ntse jalo ga o a ka wa re: ‘Ga go na tsholofelo;’ wa fitlhela go na le thudiso ya thata ya gago; ke gone ka moo o ne o se ka wa idibala.

₁₁“O ntse o tshaba mang wa nna mo poifong, fa e bo ne ne o aka jaana, o sa nkgakologelwe, le fa e le go go baya mo pelong ya gago? A ga ke a nna ka itidimalela e sa le bogologolo, mme o sa mpoife? ₁₂Tshiamo ya gago ke tlaa e kakanya; mme ka ga ditiro tsa gago ga di ketla di go direla molemo. ₁₃Mogang o galang, a ba o ba phuthileng ba go golole; mme phefo e tlaa ba tsaya, go hema ga molomo go tlaa ba tlosa botlhe; mme yo o ikanyang mo go nna o tlaa rua lefatshe, o tlaa ja thaba ya me e e boitshepo boswa.”

₁₄O tlaa re: “Tlhatlosang, tlhatlosang, lo baakanye tsela, tlosang sekgopi mo tseleng ya batho ba me.”

₁₅Gonne go bua jaana Ene yo o godimo, yo o godileng thata, yo o ntseng mo Bosakhutleng, yo leina la gagwe e leng Boitshepo, a re: “Ke agile mo felong ga godimo le ga boitshepo, le gone ke nna le ene yo o mowa o o ngomogileng, o o ikokobeditseng, go rudisa mowa wa ba ba ikokobeditseng, le go rudisa pelo tsa ba ba pelo e e ngomogileng. ₁₆Gonne ga nketla ke ganela ka bosenabokhutlo, le gone ga nketla ke nna ke šakgala ka gale; gonne botshelo bo ne bo ka fela fa pele ga me, le mewa e ke e dirileng. ₁₇Ke ne ke šakgetse ka ba ka mo itaya ka ntlha ya boikepo jwa bopelotshetlha jwa gagwe; ka fitlha sefatlhogo sa me, ka šakgala; mme a tswelela pele ka lešoko fela mo mokgweng wa gagwe.

₁₈“Ke bonye mekgwa ya gagwe, mme ke tlaa mo fodisa; le gone ke tlaa mo goga, ke ba ke busetsa dikgomotso kwa go ene, le kwa go ba ba mo lelelang. ₁₉Nna ke tlhola loungo lwa dipounama: Kagiso, kagiso e nne go ene yo o kgakala le go ene yo o gaufi, go bua Jehofa; mme ke tlaa mo fodisa. ₂₀Baikepi ba ntse jaaka lewatle le le kgaphaselang, gonne ga le kake la iketla, metsi a lone a bilola seretse le matlakala fela. ₂₁Ga go na kagiso epe e e leng ya baikepi,” go bua Modimo wa me.