Jehofa o tlhoma Kurose go nna kgosi
1Jehofa o bua jaana le motlodiwa
wa gagwe,
a raya Kurose, yo letsogo la gagwe
ke le tshegeditseng
go tla ke fenya merafe
fa pele ga gagwe,
mme ke tlaa repisa ditheka
tsa dikgosi;
go tla ke bula mejako
fa pele ga gagwe,
mme dikgoro ga di ketla di tswalwa.
2A re: “Ke tlaa go etelela pele,
ke tlaa papana mafelo
a a makgawekgawe;
ke tlaa thubaganya ditswalo
tsa kgotlho,
ke tlaa pomaganya mephakalego
ya tshipi.
3Ke tlaa go naya mahumo a lefifi,
le dikhumo tse di subegileng
tsa mafelo a a fitlhegileng,
gore o tle o itse fa ke le Jehofa,
yo ke go bitsang ka leina la gago,
yo ke bong Modimo wa Iseraele.
4Ke ka ntlha ya ga Jakobe
motlhanka wa me,
le Iseraele moitshenkedwi wa me,
fa ke go biditse ka leina la gago;
ke go retile,
le fa o ntse o sa nkitse.
5Ke nna Jehofa,
mme ga go na ope o sele;
kwa ntle ga me
ga go na Modimo ope;
ke tlaa go tlama
le fa o ntse o sa nkitse;
6gore ba itse
ba le kwa botlhabatsatsi
le kwa bophirimatsatsi,
fa go se na ope kwa ntle ga me;
ke nna Jehofa,
mme ga go na ope o sele.
7Ke bopa lesedi,
ke bile ke tlhola lefifi;
ke dira kagiso,
ke bile ke tlhola bosula;
ke nna Jehofa,
yo ke dirang dilo tse tsotlhe fela.
8“Dutlang, lona magodimo
kwa godimo,
mme a phuthologo e phike tshiamo;
a lefatshe le nyere,
gore go ungwiwe poloko,
mme a le tlhogise tshiamo mmogo;
nna Jehofa ke di tlhodile.”
Jehofa ke motlhodi wa lobopo le ditso
9“Ija! A bo go latlhega ene
yo o ganelang le Modiri wa gagwe!
A lobeana mo dipeapeaneng
tsa lefatshe!
A letsopa le tlaa raya yo o le bopang
le re: ‘O bopa eng?’
Kgotsa tiro ya gago, e re:
‘Ga a na diatla.’
10Ija! A bo go latlhega ene
yo o rayang rrangwana, a re:
‘O tsala eng?’ Kgotsa a raya mosadi
a re:
‘O mo pelegong ya eng?’ ”
11Go bua jaana Jehofa,
Moitshepi wa Iseraele
le Modiri wa gagwe; a re:
“Mpotsang ka ga dilo tse di tlang;
ka ga bomorwaake,
le ka ga tiro ya diatla tsa me,
lo bo lo ntaole.
12Nna ke dirile lefatshe,
mme ka tlhola motho mo go lone;
nna e leng diatla tsa me
di phutholotse magodimo,
le masomosomo otlhe a one,
ke nna ke a laotseng.
13Ke mo tsositse mo tshiamong;
mme ke tlaa lolamisa ditsela tsotlhe
tsa gagwe;
o tlaa aga motse wa me,
mme o tlaa lesa bafaladi ba me
ba tsamaye fela,
e seng ka tlhwatlhwa,
le fa e le ka tuelo,”
go bua Jehofa wa masomosomo.
14Go bua jaana Jehofa, a re:
“Matsapa a Egepeto le thoto
e e rekisiwang ya Ethiopia,
le Basabea,
batho ba ba mebele e e godileng
ba tlaa tlolela kwa go wena
ba tlaa nna ba lona;
ba tlaa lo latela;
ba tlaa kgabaganya
ba le mo diketaneng;
ba tlaa wela fa pele ga gago;
ba tlaa go rapela ka mekokotlelo
ba re:
‘Ruri Modimo o mo go wena;
ga go na ope o sele,
ga go na Modimo ope.’ ”
15Ruri, o Modimo
o o tlong o iphitlhe,
wena Modimo wa Iseraele, Mmoloki.
16Ba tlaa tlhajwa ke ditlhong, ee,
ba tlaa sosobaganngwa botlhe fela;
bone ba e leng badiri ba medimo
ya disetwa ba tlaa ya ba tsena
mo mapetepeteng mmogo.
17Iseraele ene o tlaa bolokwa
ke Jehofa,
ka poloka e e sa khutleng;
ga lo ketla lo tlhajwa ke ditlhong,
le fa e le go tseanngwa
ka bosakhutleng.
18Gonne go bua jaana Jehofa
yo o tlhodileng magodimo;
ke ene Modimo;
o o bopileng lefatshe wa le dira;
o ne wa le tlhomamisa, o ne o se ka
wa le tlholela lefela,
wa le bopela go ungwa;
a re: “Ke nna Jehofa,
mme ga go na ope o sele.
19Ga ke a buela mo sephiring,
mo felong ga lefatshe la lefifi;
ga ke a ka ka raya
losika lwa ga Jakobe, ka re:
‘Lo mpatlele lefela;’
nna Jehofa ke bua tshiamo,
ke bolela dilo tse di siameng.”
Modimo wa Iseraele le medimo ya Babilone
20“Phuthegang, lo tle;
atamelang mmogo
lona ba merafe ba lo falotseng;
ga ba na kitso,
bone ba ba rwalang logong
lwa setshwantsho se se setilweng
sa bone, ba rapela modimo
o o sa kakeng wa boloka.
21Bolelang, a go ntshiwe;
ee, a ba gakololane mmogo,
emang yo o supileng selo
se e sa le bogologolo tala?
Emang yo o se boletseng bogologolo?
A ga se nna Jehofa?
Mme ga go na Modimo ope o sele
fa e se nna.
Ke Modimo o o tekatekanyo
ke bile ke mmoloki;
ga go na ope kwa ntle ga me.
22Lebang kwa go nna,
lo bolokwe lona lotlhe
dikhutlo tsa lefatshe;
gonne nna ke Modimo,
mme ga go na ope o sele.
23Ke ikanne ka nna ka nosi,
lefoko le dule mo molomong wa me
mo tshiamong,
mme ga le ketla le boa, la go re:
‘Mangole otlhe a tlaa nkhubamela,
le diteme tsotlhe di tlaa ikana ka nna.’
24“Motho o tlaa nthaya a re:
Mo go Jehofa a le esi
go tshiamo le thata;
le kwa go ene batho ba tlaa ya,
le botlhe ba ba kileng
ba ne ba mo gakaletse
ba tlaa tlhajwa ke ditlhong.
25Jehofa ke ene
yo losika lotlhe lwa Iseraele
lo tlaa siamisiwang mo go ene,
lo ba lo kgantsha ka ene.”
