ISAIA 32

₁Bonang, kgosi e tlaa busa ka tshiamo, le dikgosana di tlaa laola ka tshiamo. ₂Monna o tlaa nna jaaka boipoteletso mo phefong, le boitekeletso mo ledimong; jaaka dinoka tsa metsi mo sekakeng, jaaka moriti wa lefika le legolo mo nageng e e lapisang. ₃Matlho a ba ba bonang ga a ketla a fifala, ditsebe tsa ba ba utlwang di tlaa reetsa. ₄Le dipelo tsa baphomesegedi di tlaa tlhaloganya kitso, le diteme tsa bakwakweetsi di tlaa bo di etleetsegile go bua sentle. ₅Sefephe ga se ketla se tlhola se rewa go twe se pelontle, le fa e le senoge go rewa, go twe se pelo. ₆Gonne sefephe se tlaa bua bofephe fela, le pelo ya sone e tlaa dira boikepo, se tlhapatsa, go bua timetso ka ga Jehofa, go dira mowa wa yo o bolailweng ke tlala go nna lolea fela, le go tlhaetsa go nwa ga yo o bolailweng ke lenyora. ₇Le dilo tse senoge se dirang ka tsone di bosula; se loga maano a borumolang go tlaa se senya bahumanegi ka mafoko a maaka, ee, le e leng fa motlhoki a bua tshiamo. ₈Yo o pelontle o loga maano a dilo tsa bopelontle; mme o tlaa nna a tswelela mo dilong tsa bopelontle.

₉Nanogang, lona basadi ba lo iketlileng, lo utlwe lentswe la me; lona bomorwadiaka, ba lo tlhokomologileng dilo, beelang puo ya me tsebe. ₁₀Gonne lo tlaa fuduiwa ka malatsi a a fetang a ngwaga, lona basadi ba lo tlhokomologileng dilo; gonne phulo ya lofine e tlaa tlhaela; le go rorela kwa gae ga go ketla go tla. ₁₁Roromang, lona basadi ba lo iketlileng; fuduegang, lona ba lo tlhokomologileng dilo; apolang, lo ipeye motomotsa, lo itlame ditheka ka letsela la kgetse. ₁₂Ba tlaa ititaya dihuba, ba ititeela maota a a eletsegang, le mofine o o sisang. ₁₃Mo matlhagareng a batho ba me go tlaa tlhoga lorwana le lokhi; ee, mo godimo ga matlo otlhe a tuduetso, mo motseng wa tuduetso. ₁₄Gonne ntlo ya bogosi e tlaa tlhobogwa, le motse wa bontsintsi jwa batho o tlaa tlogelwa; thotana le serala sa tebelelo di tlaa nna dikgagakgaga ka bosenabokhutlo, di nne boitumelelo jwa diesela tsa nageng, le bofulo jwa matsomane;

₁₅go tle go tsamaye mowa re o goromelediwe o tswa kwa godimo, le e e leng naga fela e nne leota le le ungwang, le leota le le ungwang le kaiwe jaaka sekgwa. ₁₆E dira gone tshiamiso e tlaa agang mo e leng naga fela, le tshiamo e nna mo leoteng le le ungwang. ₁₇Tiro ya tshiamo e tlaa nna kagiso; le se se tlaa tswang mo tshiamong e tlaa nna lodule le boikanyo ka bosakhutleng. ₁₈Batho ba me ba tlaa nna mo boagong jwa thagamo, le mo dikagong tse di tlhomameng, le mo mafelong a tapologo le a lodule. ₁₉Mo go koameng ga sekgwa sefako se tlaa nna, motse o tlaa lalediwa ruri fa fatshe. ₂₀Go sego lona ba lo jalang ka fa matloding a metsi otlhe fela, ba lo bolotsang kgomo le esela di iketlile ka dinao fela.