ISAIA 29

₁Heela! Ariele, Ariele, motse o Dafite o ne a thibelela mo go one! Tlhomaganyang dinyaga; a mediro e nne e dikologe e tle. ₂Foo ke tlaa pitlaganya Ariele, mme go tlaa nna selelo le khutsafalo; le fa go ntse jalo mo go nna o tlaa nna jaaka Ariele fela. ₃Ke tlaa go thibelela ka ntwa, ke tlaa go dikelela ka kago ya tlhabano, mme ke tlaa go tsosetsa dikadisi tsa tikeletso. ₄O tlaa folosediwa kwa tlase, o tlaa bua o le mo mmung, le puo ya gago e tlaa nna tlase e tswa mo loroleng; lentswe la gago le tlaa nna jaaka la motho yo o buang le badimo, mme puo ya gago e tlaa tswerenya e tswa mo loroleng.

₅Bontsi jwa baba ba gago ba tlaa nna jaaka lorole lo losesane, le bontsi jwa ba ba boitshegang bo nna jaaka mmoko o o fetang; ee, go tlaa nna jalo ka bonako ka tshoganetso. ₆O tlaa sekisiwa ke Jehofa wa masomosomo ka tumo ya maru, ka thoromo ya lefatshe, le modumo o mogolo, ka setsuatsue, le ledimo la phefo, le ka kgabo ya molelo o o lailang. ₇Bontsi jo bo tswang merafeng yotlhe e e tlhabanang le Ariele, e bong botlhe ba ba tlhabanang nae le felo ga gagwe fa go thata, mme ba mo pitlaganya, ba tlaa nna jaaka toro fela, le ponatshego bosigo. ₈Go tlaa etsa jaaka fa motho yo o bolailweng ke tlala a lora, bonang o a ja; a thanye, mme mowa wa gagwe wa bo o le lolea fela; kgotsa jaaka motho yo o nyorilweng a lora, bonang o a nwa; mme a thanye, mme bonang o a idibala, mowa wa gagwe o eletse fela; bontsi jo bo tswang mo merafeng yotlhe, jo bo tlhabanang le thaba ya Sione, bo tlaa nna fela jalo.

₉Emaemang lo gakgamale; lo nne lo ineele kgatlhego lo budulale; ba tagilwe, mme e seng ka bojalwa jwa mofine; baa theekela, mme e seng ka senoo se se loileng. ₁₀Gonne Jehofa o goromeleditse mo go lona mowa wa boroko jwa thulamelo, o rarile matlho a lona, e bong baperofeti; le ditlhogo tsa lona, e bong balebeledi, o di bipile. ₁₁Ponatshego yotlhe e ntse mo go lona jaaka mafoko a lokwalo lo lo konetsweng ka sekano, lo batho ba lo neelang mongwe yo o rutegileng, ba re: “A ko o bale mo, ke a go rapela.” mme ene, a re: “Ke a palelwa gonne lo konetswe ka sekano;” ₁₂mme lokwalo lo tloge lo neelwe yo o sa rutegang, go twe: “A ko o bale mo, ke a go rapela.” Mme ene a re: “Ga ke a rutega.”

₁₃Mme Morena a re: “E re ka batho ba, ba nkatamela, ba ba ba ntlotla ka molomo wa bone le ka dipounama tsa bone, mme ba tloseditse pelo ya bone kgakala le nna; le go mpoifa ga bone e be e le taolo ya batho fela e ba e rutilweng; ₁₄ke gone ka moo, ke tlaa tloga ke dira tiro e e gakgamatsang mo bathong ba, e bong tiro ya kgakgamatso le ya tseanyo; botlhale jwa batlhale ba bone bo tlaa nyelela, le tlhaloganyo ya ba bonokopela bo tlaa fitlhwa.”

₁₅Ija! A bo go latlhega ba ba senkelang kwa teng, gore ba subele Jehofa kgakololo ya bone, le ba ditiro tsa bone di a bong di le mo lefifing, mme ba re: “E mang yo o re bonang? E mang yo o re itseng?” ₁₆Lo a tle lo pitikolole dilo! A mmopi o tlaa kaiwa, go re, ke ene letsopa; fa e tlaa bo ne ne selo se se dirilweng se ka raya ene yo o se dirileng, se re: “Ga a a ntira;” kgotsa selo se se bopilweng se ka raya ene yo o se bopileng sa re: “Ga a na tlhaloganyo?”

₁₇A ga e sa ntse e le lobakanyana fela, mme Lebanone o tlaa fetolwa leota le le sisisang; mme leota le le sisisang le tlaa kaiwa go re ke sekgwa fela?

₁₈Mme mo letsatsing leo ba bosusu ba tlaa utlwa mafoko a lokwalo, le matlho a difofu a tlaa bona a le mo lootong le mo lefifing. ₁₉Bapelonolo le bone ba tlaa itotisetsa boitumelo jwa bone mo go Jehofa, le bahumanegi ba ba mo bathong ba tlaa itumela mo go ene Moitshepi wa Iseraele. ₂₀Gonne yo o boitshegang o dirilwe lefela fela, le moswinyi o a khutla, le botlhe ba ba lebelelang boikepo ba kgaotswe; ₂₁e bong ba ba leofisang motho ka mafoko, ba beele yo o kgalemelang molato mo kgorong serai, ba fapose mosiami ka selo se e leng lefela fela.

₂₂Ke gone ka moo go buang Jehofa, yo o rekolotseng Aberahame, kaga ntlo ya ga Jakobe, a re: “Jakobe ga a ketla a tlhajwa ke ditlhong jaanong, le gone sefatlhogo sa gagwe ga se ketla se khwata jaanong. ₂₃O tlaa re a bona bana ba gagwe, tiro ya diatla tsa me, mo gare ga gagwe, ba tlaa itshepisa leina la me; ee, ba tlaa itshepisa Moitshepi wa ga Jakobe, mme ba tlaa ema mo go boifeng Modimo wa Iseraele. ₂₄Le ba ba timelang mo moweng ba tlaa tla mo tlhaloganyong, le ba ba ngongoregang ba tlaa ithuta thuto.”