Modimo o tlaa otlhaya Egepeto
1Ponelopele ka ga Egepeto. Bonang, Jehofa o palame leru le le sefadima, o tla mo Egepeto; mme medimo ya disetwa ya Egepeto e tlaa tsebeetsega ka e mmona, le pelo ya Egepeto e tlaa nyera fa gare ga gagwe. 2Ke tlaa lotlhanya Baegepeto; ba tlaa tlhabana, mongwe le mongwe le morwa rraagwe, le mongwe le mongwe le mongwe ka ene; motse le motse, le bogosi le bogosi. 3Mowa wa Egepeto o tlaa dirwa lolea fela fa gare ga lone; mme ke tlaa senya kgakololo ya lone; mme ba tlaa botsa mo medimong ya disetwa, le mo baroming, le mo go ba ba buang le badimo, le mo baloing. 4Baegepeto ke tlaa ba tsenya mo seatleng sa morena yo o bolau; kgosi e e logala e tlaa ba busa, go bua Morena, Jehofa wa masomosomo.
5Metsi a tlaa ngomela mo lewatleng, noka e tlaa tšha, e omelela. 6Dinoka di tlaa nkga; dinokana tsa Egepeto di tlaa ngomela di omelediwa; lotlhaka lo tlaa swaba lo tsitla. 7Dipatlelo tsa noka ya Nile, ka fa maereng a Nile, le tsotlhe tse di jetsweng ka fa nokeng ya Nile, di tlaa ša, di kgophoga, di sa tlhole di le teng. 8Le babolai ba ditlhapi ba tlaa hutsafala, le botlhe ba ba konopelang kobe mo nokeng ya Nile ba tlaa lela, le ba ba tsharololang ditloa mo metsing ba tlaa topetega. 9Le gone ba ba dirang ka leloba le le tsharabolotsweng, le ba ba logang letsela le lesweu ba tlaa tlhajwa ke ditlhong. 10Mme maotwana a gagwe a tlaa komoganngwa, botlhe ba ba dirang ba thapetswe tuelo ba tlaa utlwa botlhoko mo pelong.
11Dikgosana tsa Soane di silofetse ruri; kgakololo ya bagakolodi ba ga Faro, e bong ba ba tlhalefileng segolo, e dule ya ditho fela; ana lo raya Faro jang, lo re, lo bomorwa batlhale, lo bomorwa dikgosi tsa bogologolo tala? 12Fa go ntse jaana, ba fa kae batlhale ba gago? A ba go bolelele gompieno; a ba itse se Jehofa wa masomosomo o se ikaeletseng ka ga Egepeto. 13Dikgosana tsa Soane di diregile masilo, dikgosana tsa Nofa di tsietsegile; di timeditse Egepeto; tsone tse e leng lentswe la kgokgotsho ya ditso tsa gagwe. 14Jehofa o tlhakantse mowa wa logwadi mo gare ga gagwe; ba timeditse Egepeto mo ditirong tsotlhe tsa gagwe, jaaka motho yo o tagilweng a tle a thekeele mo go tlhatseng ga gagwe. 15Le gone ga go ketla go nna tiro epe ya Egepeto, ya tlhogo le fa e le ya mogatla, kala ya mokolane le mokhasi, e di ka e dirang.
Egepeto o tlaa obamela Jehofa
16Mo letsatsing leo Egepeto o tlaa nna jaaka basadi; o tlaa roroma a boifa ka ntlha ya thokgosetso ya seatla sa ga Jehofa wa masomosomo, se o se thokgosetsang mo godimo ga gagwe. 17Lefatshe la Juta le tlaa tswa therego ya Egepeto, mongwe le mongwe yo le tlaa umakwang mo go ene o tlaa boifa, ka ntlha ya boikaelelo jwa ga Jehofa wa masomosomo, jo o bo ikaelelang ka ga lone.
18Mo letsatsing leo go tlaa nna metse e le metlhano mo lefatsheng la Egepeto e e tlaa buang puo ya Sekanana, e ikanela Jehofa wa masomosomo; mongwe o tlaa bidiwa, go twe, Motse wa tshenyego.
19Mo letsatsing leo go tlaa nna sebeso, e le sa ga Jehofa, fa gare ga lefatshe la Egepeto, le sefikantswe se se motloutlo, e le sa ga Jehofa, fa molelwaneng wa lone. 20E tlaa nna sekao le sesupo sa ga Jehofa wa masomosomo mo lefatsheng la Egepeto; gonne ba tlaa tlhaeletsa kwa go Jehofa ka ntlha ya bapatiki, mme o tlaa roma mmoloki kwa go bone, le mofemedi, mme o tlaa ba golola. 21Mme Jehofa o tlaa itsiwe ke Egepeto, le Baegepeto ba tla itse Jehofa mo letsatsing leo; ee, ba tlaa obama ka setlhabelo le seromololo, ba tlaa ikanela Jehofa ikano ba e dirafatse. 22Jehofa o tlaa itaya Egepeto, a iteye a ba a fodise; mme ba tlaa boela mo go Jehofa, mme o tlaa rapelesega ka ga bone, a ba fodisa. 23Mo letsatsing leo go tlaa nna tsela e kgolo ya mheru e tswa Egepeto e ya Asiria, mme Moasiria o tlaa tla mo Egepeto, le Moegepeto mo Asiria; Baegepeto ba tlaa obama le Baasiria mmogo. 24Mo letsatsing leo, Iseraele o tlaa nna wa boraro le Egepeto le Asiria, ba le tshegofatso mo gare ga lefatshe; 25ka gobo Jehofa wa masomosomo o ba segofaditse, a re: “Go sego Egepeto batho ba me, le Asiria tiro ya diatla tsa me, le Iseraele boswa jwa me.”
