ISAIA 15

₁Ponelopele ka ga Moabe. Gonne Are wa Moabe o sentswe, o kgakgabaditswe mo bosigong bo le bongwe fela; gonne Kire wa Moabe o sentswe, o kgakgabaditswe mo bosigong bo le bongwe fela. ₂O tlhatlogetse kwa Bajithe, le kwa Dibone, kwa mafelong a a tlotlometseng a ya go lela: Moabe o bokolelela Nebo le Meteba; mo ditlhogong tsotlhe go logatadima, ditedu tsotlhe di beotswe. ₃Ba itlama ka letsela la kgetse mo mebileng ya bone; mongwe le mongwe o bokolela a lela thata, ba le mo godimo ga matlo, le mo dibatleng tse di atlhameng. ₄Le Hešebone o a gala, le ene Eleale; go goa ga bone go utlwala le kwa Jahase; ke gone ka moo banna ba ba tlhometseng ba Moabe ba galang thata; mowa wa gagwe o roroma mo teng ga gagwe. ₅Pelo ya me e kurueletsa Moabe; batho ba bagolo ba gagwe ba tshabela kwa Soare, kwa Egelathe-šelišiya; gonne ba tlhatloga mokong wa Luhithe ka selelo; gonne mo tseleng ya Horonaime ba tsosa kurueletso ya tshenyego. ₆Gonne metsi a Nimerime a tlaa kgala; bojang bo swabile, loreme lwa fela, ga go na sepe se se talana. ₇Ke gone ka moo letlotlo le ba le bapetseng, le se ba se bolokileng, ba tlaa di rwala ba isa kwa nokaneng ya madibonoka. ₈Gonne kuruetso e potonogile le melelwane ya Moabe; go bokolela ga gone kwa Egelaime, le go bokolela ga gone kwa Beerelime. ₉Gonne metsi a Dimone a tletse madi; le fa go ntse jalo ke tlaa nna ke tlisa mo go Dimone fela, ke tlaa tlisa tau mo go ene yo o falolang wa Moabe, le mo masaleleng a lefatshe.