ISAIA 14

₁Gonne Jehofa o tlaa tlhomogela Jakobe pelo, o tlaa nama a itshenkela Iseraele, a ba baya mo lefatsheng la bone; yo o leng moeng o tlaa ikopanya nabo, mme ba tlaa ngaparela ntlo ya ga Jakobe. ₂Ditšhaba di tlaa ba tsaya di ba isa kwa felong ga bone: mme ntlo ya Iseraele e tlaa di ruela mo lefatsheng la ga Jakobe go nna batlhanka le malata; ba tlaa ntsha ditshwarwa, bone ba ba kileng ba ntshiwa ditshwarwa ke bone; mme ba tlaa busa bapatiki ba bone.

₃Go tlaa dirala mo letsatsing le Jehofa o tlaa go nayang boikhutso ka lone ka ga bohutsana jwa gago, le ka ga pitlagano ya gago, le ka ga tirelo e e thata e o ne o dirisiwa mo go yone, ₄go re o tlaa tlhaba seane se ka ga Babilone, o re: “Ana mopatiki o khutlile jang! Motse o o gouta o khutlile jang! ₅Jehofa o robile serobi sa baikepi, e bong thobane ya bogosi ya babusi; e le ₆ba ba kileng ba nna ba teketa ditšhaba ka teketo e e sa emeng, ba busa merafe ka bogale, ka pogiso e go se nang ope yo o e kganelang. ₇Lefatshe lotlhe le ikhutsitse, le iketlile; ba ponyega mo go opeleng; ₈ee, ditlhare tsa mafira di a itumela ka ga gago le masetara a Lebanone tsa re: ‘E sa le ka o namaladiwa fa fatshe ga go ise go ko go tle moremi ope go re rema.’

₉“Bobipo kwa tlase o tsebeetsegela go ya go kgatlhantsha go tla ga gago; o go tsosetsa baswi, e bong ditlhogo tsotlhe tsa lefatshe; o nanotse dikgosi tsotlhe tsa merafe mo ditulong tsa tsone tsa bogosi. ₁₀Botlhe bao ba tlaa bua nao ba re: ‘A e ntse jaana le wena o koafetse jaaka rona? A o semegile go tshwana le rona?’ ₁₁Boitlotlomatso jwa gago bo foloseditswe mo Bobipong, le modumo wa diletso tsa gago; seboko se adilwe tlase ga gago, dibokwana di a go hupetsa.

₁₂“A bo o kile wa wa kwa legodimong, wena naledi ya masa! Morwa phepafalo ya bosa! A bo o kile wa remelwa fa fatshe, wena yo o kileng wa namalatsa merafe fa fatshe! ₁₃Mme wa bo o ne o itheile mo pelong ya gago, wa re, o tlaa tlhatlogela kwa legodimong, o tlaa goleletsa setulo sa gago sa bogosi godimo ga dinaledi tsa Modimo; o tlaa dula mo thabeng ya bophuthegelo, kwa dikhutlong tsa lefatshe, ntlheng ya botsheka. ₁₄Wa re o tlaa tlhatlogela godimo ga bogodimo jwa maru, o tlaa tshwana le Mogodimodimo. ₁₅Le fa go ntse jalo o tlaa folosediwa mo Bobipong, kwa dikhutlong tsa molete.

₁₆“Ba ba go bonang ba tlaa go sekaseka ka matlho, ba tlaa go akanya, ba re: ‘Monna yo a ke ene yo o ne a roromisa lefatshe, a reketlisa magosi; ₁₇a dira lefatshe go nna naga fela, a ribegetsa metse ya lone; mme a se ke a gololela ditshwarwa tsa gagwe go ya magabone?’ ₁₈Dikgosi tsotlhe tsa merafe, tsotlhetsotlhe fela, di totometse mo tlotlong, nngwe le nngwe e le mo ntlong ya yone; ₁₉mme wena o latlhetswe kwa ntle ga phupu ya gago jaaka kala e e makgapha, jaaka diaparo tsa ba ba bolailweng, ba ba sogotlhilweng ka tšhaka, ba ba kgokologelang mo majeng a molete; jaaka setoto se se sobotlwang ka dinao. ₂₀Ga o ketla o kopanngwa le tsone mo phitlhong, ka o sentse lefatshe la gago, o bolaile batho ba gago; losika lwa badirabosula ga lo ketla lo umakwa gope ka bosenabokhutlo. ₂₁Baakanyetsang bana ba gagwe polao ka ntlha ya boikepo jwa borraabo; gore ba tle ba se ka ba tsoga ba rua lefatshe, ba tlatsa sefatlhogo sa lefatshe ka metse.”

₂₂“Ke tlaa tsoga ke tlhabana nabo,” go bua Jehofa wa masomosomo: “Ke kgaola ke tlosetsa Babilone leina le lesalela, le ngwana wa mosimane, le ngwana wa ngwana wa mosimane,” go bua Jehofa. ₂₃“Le gone ke tlaa go ntsha boswa jwa setlhong, le megobe ya metsi; mme ke tlaa go feela ka lofeelo lwa tshenyo;” go bua Jehofa wa masomosomo.

₂₄Jehofa wa masomosomo o ikanne, a re: “Ruri jaaka ke akantse, go tlaa dirala jalo; le jaaka ke ikaeletse, go tlaa ema fela jalo; ₂₅go re, ke tlaa robaganya Mosiria mo lefatsheng la me, le mo dithabeng tsa me, ke tlaa mo gataka ka dinao; foo jokwe ya gagwe e tlaa tloga mo go bone, le morwalo wa gagwe o tlaa tloga leruding la bone.” ₂₆Ke lone boikaelelo jo bo ikaeleletsweng lefatshe lotlhe; mo ke sone seatla se se otlololetsweng merafe yotlhe. ₂₇Gonne Jehofa wa masomosomo, o ikaeletse, mme e mang yo o tlaa kaololang? Letsogo la gagwe le lolame, mme ke mang yo o tlaa le gonang.

₂₈E rile ka ngwaga o Ahase o suleng ka one ga nna ponelopele e. Ga re:

₂₉“O se ka wa itumela wena Filisitia, gotlhe ga gago, ka go re, thupa e e kileng ya go betsa e robegile, gonne mo motsweng wa noga go tlaa tswa šaušawane, mme lotsalo lwa yone e tlaa nna noga e e molelo e e fofang. ₃₀Mme batsalwapele ba bahumanegi ba tlaa ja fela, le batlhoki ba tlaa ithobalela fela mo boiketlong; motswe wa gago ke tlaa o bolaya ka leuba, le masalela a gago a tlaa bolawa.

₃₁“Bokolela, wena kgoro; lela, wena motse; o nyerile, wena Filisitia gotlhe fela ga gago; gonne go kua mosi kwa ntlheng ya botsheka, mme ga go ope yo o ikeolelang kwa thoko mo metlheng ya gagwe e e laotsweng.”

₃₂Jaana barongwa ba merafe ba tlaa fetolwa go tweng? Go tlaa twe: “Jehofa o theile Sione, mme bapatikwi ba batho ba gagwe ba tlaa fitlhela botshabelo mo go ene.”