ISAIA 13

₁Ponelopele ka ga Babilone, e Isaia morwa Amose o ne a e bona.

₂Tlhomang mokgele mo thabeng e e loforotlho, ba tsholeletseng lentswe, akgang seatla, gore ba ye go tsena mo dikgorong tsa batho ba bagolo. ₃Ke laotse batshwaedi ba me, ee, ke biditse bagale ba me, ke ba bileditse bogale jwa me, e bong ba ba kganang ka boitumelo ka ntlha ya borena jwa me.

₄A modumo wa bontsi jwa batho mo dithabeng, jaaka e kete ya tšhaba e tona! A modumo wa kudumedi ya magosi a merafe e phuthegile mmogo! Jehofa wa masomosomo o epela tlhabano ntwa. ₅Ba tswa kwa lefatsheng le le kgakala, kwa bokhutlong jwa legodimo, e bong Jehofa, a na le dibolao tsa kgakalo ya gagwe, go senya lefatshe lotlhe fela.

₆Bokolelang; gonne letsatsi la ga Jehofa le gaufi; le tlaa tla jaaka tshenyego e e tswang mo go Mothataotlhe. ₇Ke gone ka moo diatla tsotlhe di tlaa repang, le pelo nngwe le nngwe e tlaa nyema. ₈Ba tlaa rerega; metlotsedi e tlaa ba tshwara le mahutsana; ba tlaa nna mo botlhokong jaaka mosadi yo o belegang; ba tlaa gakgamalelana fela; difatlhogo tsa bone di tlaa nna difatlhogo tsa kgabo ya molelo. ₉Bonang letsatsi la ga Jehofa le etla, la bolalome, ka tšhakgalo le bogale jo bo tukang, go dira lefatshe tshwafalo, le go senyetsa ruri baleofi ba ba mo go lone. ₁₀Gonne dinaledi tsa legodimo le dinaletsana tsa lone ga di ketla di ntsha lesedi la tsone; letsatsi le tlaa tlhatloga le fifetse, le kgwedi ga e ketla e phatsimisa lesedi la yone.

₁₁Lefatshe ke tlaa le beletsa bosula jwa bone, le baikepi boikepo jwa bone; ke tlaa khutlisa boikgantsho jwa ba ba bopelompe, ke tlaa isa tlase boipego jwa ba ba boitshegang. ₁₂Ke tlaa dira gore monna a tlhokafale bogolo go gouta e ntlentle, e bong motho bogolo go gouta e e itshekileng ya Ofire. ₁₃Ke gone ka moo ke tlaa roromisang magodimo, lefatshe le tlaa kutumisiwa le tswa mo felong ga lone, ka tšhakgalo ya ga Jehofa wa masomosomo, le mo letsatsing la bogale jwa gagwe jo bo tukang.

₁₄Mme go tlaa dirala, go re, jaaka tshephe e e khukhelwang, le jaaka dinku tse di se nang ope yo o di phuthang, mongwe le mongwe wa bone o tlaa sokologela kwa go ba ga gabo, motho mongwe le mongwe o tla tshabela kwa lefatsheng la ga gabo. ₁₅Mongwe le mongwe yo o fitlhelwang o tlaa sogotlhwa; mongwe le mongwe yo o tshwarwang o tlaa wa ka tšhaka. ₁₆Ditshea tsa bona di tlaa phatlakanngwa fa pele ga matlho a bone; matlo a bone a tlaa thopiwa, le basadi ba bone ba tlaa betelelwa.

₁₇Bonang, ke tlaa ba tsosetsa Bamete ba ba sa tlhokomeleng selefera, le ka ga gouta ga ba ketla ba itumela mo go yone. ₁₈Mara a bone a tlaa phatlakanya makau a bone; loungo lwa sebopelo ga ba ketla ba lo tlhomogela pelo; leitlho la bone ga le ketla le rekegela banyana. ₁₉Mme Babilone, kgalalelo ya magosi, bontle jwa pelafalo ya Bakalatea, o tlaa nna jaaka fa Modimo o lo wa ribegetsa Sotoma le Gomora. ₂₀Ga o ketla o tlhola o nnwa ke batho gope, le gone ga go ope yo o tlaa agang mo go one go tswa kokomaneng, go ya kokomaneng; le gone Moarabia ga a ketla a tlhoma mogope wa gagwe gone; le gone badisa ga ba ketla ba bothisa matsomane a bone gone. ₂₁Dibatana tsa naga di tlaa robala gone; matlo a bone a tlaa tlala ditshedi tse di dumadumang; le bontšhe ba tlaa aga gone, le badimo ba sekapodi ba tlaa kalapa gone. ₂₂Diphiri di tlaa lela mo matlong a a thata a bone, le diphokoje mo matlong a magolo a mantle a bone; mme lobaka lwa gagwe lo atametse go tla, le malatsi a gagwe ga a ketla a nyafadiwa.