HOSEA 5

₁“Utlwang selo se, lona baperesiti, lo reetseng lona ba ntlo ya Iseraele, sekegang tsebe, lona ba ntlo ya kgosi, gonne tshekiso ke ya lona. Gonne lo ne lo ntse lo le seru kwa Misepa, le lotloa lo lo adilweng mo Tabore. ₂Batsuolodi ba ile kwa teng mo go bolayeng; mme nna ke mokgalemedi wa bone botlhe. ₃Ke a ba itse ba Eferaime, le ba Iseraele ga ba a ntshubegela; gonne jaana, wena Eferaime, o dirile boaka, Iseraele o leswefetse.”

₄Ditiro tsa bone ga di ketla di ba leseletsa go sokologela kwa modimong wa bone; gonne pelo ya boaka e mo teng ga bone, mme ga ba itse Jehofa. ₅Boikgodiso jwa ga Iseraele bo supa mo ponong ya gagwe; ke gone ka moo Iseraele le Eferaime ba tlaa kgopiwang mo boikepong jwa bone; le Juta o tlaa kgopiwa nabo. ₆Ba tlaa ya go batla Jehofa ka matsomane a bone le ka matlhape a bone; mme ga ba ketla ba mmona; o ikgogonne mo go bone. ₇Ba diretse Jehofa ka bonongwane; gonne ba tsetse bana ba seeng; jaana kgwedi e ntšha e tlaa ba suputsa le masimo a bone.

₈Letsang lohare kwa Gibea, le lonaka kwa Rama. Opang mokgosi wa tshoso kwa Bethafene; morago ga gago, wena Benjamine. ₉Eferaime o tlaa nna tshwafalo mo motlheng wa kgalemo; ke itsisitse ditso tsa Iseraele se ruri se tlaa nnang.

₁₀“Dikgosana tsa Juta di ntse jaaka ba ba tlosang sesupo sa molelwane; ke tlaa ba goromeletsa bogale jwa me jaaka metsi. ₁₁Eferaime o patikegile, o pitlegile mo katlholong; gonne o ne a itumetse fela go sala taolo morago. ₁₂Ke gone ka moo ke ntseng jaaka motoutwane mo go Eferaime, le jaaka go bola mo go ba ntlo ya Juta.

₁₃“E rile Eferaime a ipona botlhoko, le Juta a ipona ntho, foo Eferaime a ya kwa Asiria, a roma kwa go kgosi Jarebe; mme ga a nonofa go lo fodisa, ga a ketla a lo fodisa ntho ya lona. ₁₄Gonne ke tlaa nna mo go Eferaime jaaka tau, le jaaka tawana mo go ba ntlo ya Juta. Nna, e bong nna, ke tlaa gagola, mme ke itse go tsamaya; ke tlaa tsaya, mme ga go ketla go dira le ope yo o ka gololang.

₁₅“Ke tlaa ya ke boela felong ga me, go tle go tsamaye ba ipolele molato wa bone, mme ba batle sefatlhogo sa me; mo pitlaganong ya bone ba tlaa mpatla ka tlhoafalo.”