HOSEA 4

₁Utlwang lefoko la ga Jehofa, lona bana ba Iseraele, gonne Jehofa o na le kgang le banni ba lefatshe, ka go bo go se na boammaaruri, le fa e le boutlwelobotlhoko, le fa e le kitso ya Modimo mo lefatsheng. ₂“Ga go na sepe fa e se go ikana le go tlola maikano, go bolaya, le go utswa, le go dira boaka; ba tla ba phomele, mme madi a batho a tshwaraganye le madi. ₃Ke gone ka moo lefatshe le tlaa hutsafala, mongwe le mongwe yo o agileng mo go lone o tlaa topetega, le diphologolo tsa naga, le dinonyane tsa loapi; ee, le ditlhapi tsa lewatle di tlaa tlosiwa.

₄“Le fa go ntse jalo a go se ganele motho ope, a go se kgaleme motho ope, gonne batho ba gaeno ba ntse jaaka batho ba ba ganelang le moperesiti. ₅O tlaa kgopiwa motshegare, le moperofeti o tlaa kgopiwa nao bosigo; mme ke tlaa senya mmaago. ₆Batho ba me ba senyegile ka go tlhoka kitso; ereka o ganne kitso, le nna ke tlaa go gana, gore o se nne moperesiti wa me, e re ka o lebetse molao wa Modimo wa gago, le nna ke tlaa lebala bana ba gago.

₇“Jaaka ba ne ba ntse ba ntsifala, ba bo ba ntse ba nteofela fela jalo, ke tlaa fetola kgalalelo ya bone ditlhong. ₈Ba otlwa ke boleo jwa batho ba me, ba tlhomile pelo ya bone mo boikepong jwa bone. ₉Go tlaa nna jaana, go re jaaka batho ba ntse, moperesiti o ntse fela jalo; ke tlaa ba betsa ka ntlha ya mekgwa ya bone, ke tlaa ba duela ka fa tirong tsa bone. ₁₀Ba tlaa ja, mme ga ba ketla ba kgora; ba tlaa dira boaka, mme ga ba ketla ba ata; ka ba baketse go tlhokomela Jehofa.

₁₁“Boaka le bojalwa jwa mofine le bojalwa jo boša di tlosa tlhaloganyo. ₁₂Batho ba me ba lopa kgakololo mo sesaneng sa bone, tsamma ya bone e ba kakanyetse; gonne mowa wa boaka o ba timeditse, mme ba akafetse ba dule mo Modimong wa bone. ₁₃Ba isa ditlhabelo mo ditlhoreng tsa dithaba, ba fisa maswalo mo godimo ga makhubu, fa tlase ga maoka le mapopolara le materebintha, ka moriti wa tsone ditlhare tseo o le molemo; ke gone ka moo bomorwadia lona ba dirang boaka, le banyadwi ba lona ba gokafala. ₁₄Ga nketla ke betsa bomorwadia lona mogang ba dirang boaka, le banyadwi ba lona mogang ba gokafalang; gonne bone ka bosi ba ya thoko mmogo le diaka, ba isa ditlhabelo mmogo le dipepe; mme batho ba ba sa tlhaloganyeng ba tlaa ribegediwa.

₁₅“Le fa wena Iseraele o akafala, le fa go ntse jalo a Juta a se dire molato; le gone se yeng kwa Gilegale, se tlhatlogeleng kwa Bethafene, se ikaneng, lwa re: ‘Jaaka Jehofa a tshedile.’ ₁₆Gonne Iseraele o dirile ka logwadi jaaka kgomo ya moroba e e logwadi; jaana Jehofa o tlaa ba otla jaaka kwanyana mo felong fa go atlhameng. ₁₇Eferaime o gokaganye le medimo ya disetwa; mo leseng. ₁₈Nno ya bone e fetogile botšarara; ba dira boaka ka metlha yotlhe; balaodi ba bone ba rata ditlhong thata. ₁₉Phefo e ba sopantse mo diphukeng tsa yone; mme ba tlaa tlhajwa ke ditlhong ka ntlha ya ditlhabelo tsa bone.