BAHEBERE 9

₁Jaana le e leng kgolagano ya pele e ne e na le ditaolelo tsa tirelo ya Modimo, le felo ga yone ga boitshepo, e le felo ga boitshepo ga lefatshe leno. ₂Gonne go ne go baakantswe motlaagana, ga bo go le o o fa pele, o setlhomo sa lobone se ne se le mo go one, le lomati lwa bojelo le senkgwe sa tshupo, e le o o bidiwang Felo ga Boitshepo. ₃Ka fa teng ga sesiro sa bobedi ga bo go le motlaagana o o bidiwang Boitshepo jwa Maitshepo. ₄O na le leiswana la gouta, le letlole la kgolagano, le le manegilweng gouta ka ntlha tsotlhe, le le tsentseng nkgwana ya gouta e e beileng mana, le thobane ya ga Arone e e kileng ya tlhoga, le one matlapa a kgolagano. ₅Mo godimo ga yone ga bo go le ditšheruba tsa kgalalelo, di okame senno sa boutlwelobotlhoko; ke dilo tse re sa ka keng ra bua ka ga sengwe le sengwe sa tsone tsotlhe gompieno.

₆Jaana dilo tse, e rile di sena go baakanngwa jalo, baperesiti ba ne ba tle ba tsene mo motlaaganeng o o fa pele, ba ye go dira ditirelo. ₇Mme mo go wa bobedi, go tsene moperesiti yo mogolo a le esi, gangwe fela ka ngwaga; mme a bo a sa tlogele madi a o a isang ka ga gagwe ka esi, le ka ga ditimelo tsa batho. ₈Mowa o o Boitshepo o kaya selo se, gore tsela ya go tsena mo Felong ga Boitshepo e ne e ise e senolwe, ka motlaagana wa pele o ne o sa ntse o eme. ₉Mme mo, e be e le setshwantsho se se tshwanetseng motlha wa gompieno; jaaka go ntse go isiwa dineo le ditlhabelo tse di sa ka keng tsa dira gore yo o obamang a nne boitekanelo mo segakoloding. ₁₀Ka e le melawana ya senama fela – e le ya dijo, le dino, le ditlhatso dingwe le dingwe – e e beetsweng go tla e fitlha mo lobakeng lwa go tlhabololwa.

₁₁Mme ka Keresete a tsile, e le moperesiti yo mogolo wa dilo tse di molemo, tse di tlang, di tla ka one motlaagana o o gaisang ka bogolo le ka boitekanelo o o sa dirwang ka diatla, ke go re e se wa tlholego eno, ₁₂le gone e seng ka madi a dipodi, le fa e le a dinamane, mme e le ka madi a gagwe ka esi; ya re a sena go dira thekololo e e emeng ka bosakhutleng, a tsenela ruri gangwe fela mo Felong ga Boitshepo. ₁₃Gonne fa go kgatsha ba ba leswe ka madi a dipodi le a dipoo, a na le melora ya kgomo ya moroba, fa go mo go na le go tlhapisa nama ya nna ntle, ₁₄go golo jang madi a ga Keresete, yo o rileng a ikisetsa Modimo setlhabelo ka esi, ka Mowa o o sa khutleng, a se na bogole, bogolo jang madi a, a tlaa tlhapisa segakolodi sa lona, a tlosa ditiro tse di suleng, gore lo direle Modimo o o tshedileng!

₁₅Ene ke motsereganyi wa kgolagano e ntšha ka ntlha ya gone moo; gore e tle e re ka loso longwe lo dirafetse, lwa thekololo ya ditlolo tsa motlha wa kgolagano ya pele, bone ba ba biditsweng ba tle ba amogele polelo ya tsholofetso ya boswa jo bo sa khutleng.

₁₆Gonne kwa go nang le lokwalo lwa go aba boswa, loso lwa yo o lo dirileng lo tshwanetse lwa bo lo dirafetse. ₁₇Gonne lokwalo lwa go aba boswa lo na le tiro kwa loso lo dirafetseng teng; ke a botsa go re, a lo tle lo dirane le tiro modiri wa lone a sa ntse a tshedile? ₁₈Ke gone ka moo le e leng yone kgolagano ya pele, ga e a ka ya tlhomamisiwa kwa ntle ga madi. ₁₉Gonne e ne ya re ditaolo tsotlhe di sena go bolelelwa batho ke Moše ka fa molaong, a tseye madi a dinamane le a dipodi, a na le metsi, le boboa jo bohibidu le mosiama, mme a kgatshe lone lokwalo, le batho botlhe. ₂₀A re: “Ke one madi a kgolagano e Modimo o e laotseng ka ga lona.” ₂₁Le gone a kgatshe jalo motlaagana le dilwana tsotlhe tsa tirelo ka madi. ₂₂Ka fa molaong, e kete nka re dilo tsotlhe di ntlafadiwa ka madi; mme kwa ntle ga go tsholola madi ga go na boitshwarelo.

₂₃Ke gone go ne go tshwanetse fa malebela a dilo tse di kwa magodimong di ka ntlafadiwa ka ditlhabelo tseo; tse e leng tsone dilo tsa selegodimo ka ditlhabelo tse di molemo bogolo go tseo. ₂₄Gonne Keresete ga a ka a tsena mo Felong gongwe ga Boitshepo, fa go dirilweng ka diatla, fa go leng setshwano sa felo ga ammaaruri; mme o tsenye mo go le e leng legodimo tota, go tla a bonalela rona jaanong fa pele ga sefatlhogo sa Modimo; ₂₅e bile e se gore a nne a ikise setlhabelo gantsi; jaaka moperesiti yo mogolo a tle a tsene mo Felong ga Boitshepo ka ngwaga le ngwaga, ka madi a e seng a mmele wa gagwe. ₂₆Fa go ne go sa nna jalo, o ka bo fano a bolailwe gantsi, go simolola ka lobaka lwa lefatshe go thaiwa. Mme jaanong, o dirile gangwe fela mo bokhutlong jwa metlha, o senoletswe go tla a tlosa dibe ka go intsha setlhabelo ka esi. ₂₇Mme e re ka go laotswe gore batho ba swe gangwe fela, kwa morago go bo go tla tsheko, ₂₈jalo le ene Keresete, ka a isitswe setlhabelo gangwe fela, gore a tle a belege maleo a batho ba le bantsi, o tlaa bonala lwa bobedi, kwa ntle ga boleo, a bonalela ba ba mo lebeletseng go ba boloka.