GENESISE 11

₁Lefatshe lotlhe la bo le le puo e le nngwe fela, le mafoko a le mangwe fela. ₂Mme ga dirala ya re batho ba etela kwa ntlheng ya botlhabatsatsi, ba fitlhela lobala longwe mo lefatsheng la Shinare; mme ba aga gone. ₃Ba raana, ba re: “Tlang re direng setene, re se bese se butswe thata.” Setene ya bo e le sone maje a bone, mme bitumena ya bo e le seretse sa bone. ₄Ba re: “Tlang re ikageleng motse, le kago e e godileng e setlhowa sa yone se tlaa fitlhang kwa legodimong, mme a re itireleng leina; e se re kgotsa ra phatlalalela mo lefatsheng lotlhe.”

₅Mme Jehofa a fologela go bona motse, le kago e e godileng e bana ba batho ba e agang. ₆Jehofa a re: “Bonang, ke batho ba le bangwe fela, ba bile ba na le puo e le nngwe fela botlhe; mme se ke sone se ba simololang go se dira. Jaanong ga ba ketla ba kgoreletsega mo go sepe se ba ikaeletseng go se dira. ₇Tlang re fologeng, re tlhakatlhakanye puo ya bone gone, gore ba se ka ba utlwana mo puong.” ₈Jalo Jehofa a ba phatlalaletsa le lefatshe lotlhe; mme ba khutla go aga motse. ₉Ke gone ka moo, leina la gone go tulweng Babele, ka gobo Jehofa a petekantse puo ya lefatshe lotlhe gone; Jehofa a ba phatlalaletsa le lefatshe lotlhe go tswa gone.

₁₀Tse, ke tsone ditshika tsa ga Sheme. O ne a le dinyaga di le 100, a tshola Arepakešate dinyaga di le pedi morago ga morwalela. ₁₁Sheme a re a sena go tshola Arepakešate, a tshela dinyaga di le 500, a ntse a tshola tshimane le tshetsana.

₁₂Arepakešate a tshela dinyaga di le 35, a tshola Shela. ₁₃Arepakešate a re a sena go tshola Shela, a tshela dinyaga di le 403, a ntse a tshola tshimane le tshetsana.

₁₄Shela a tshela dinyaga di le 30, a tshola Ebere. ₁₅Shela a re a sena go tshola Ebere, a tshela dinyaga di le 403, a ntse a tshola tshimane le tshetsana.

₁₆Ebere a tshela dinyaga di le 34, a tshola Pelege. ₁₇Ebere a re a sena go tshola Pelege, a tshela dinyaga di le 430, a ntse a tshola tshimane le tshetsana.

₁₈Pelege a tshela dinyaga di le 30, a tshola Reu. ₁₉Pelege a re a sena go tshola Reu, a tshela dinyaga di le 209, a ntse a tshola tshimane le tshetsana.

₂₀Reu a tshela dinyaga di le 32, a tshola Seruge. ₂₁Reu a re a sena go tshola Seruge, a tshela dinyaga di le 207, a ntse a tshola tshimane le tshetsana.

₂₂Seruge a tshela dinyaga di le 30, a tshola Nahore. ₂₃Seruge a re a sena go tshola Nahore, a tshela dinyaga di le 200, a ntse a tshola tshimane le tshetsana.

₂₄Nahore a tshela dinyaga di le 29, a tshola Tera. ₂₅Nahore a re a sena go tshola Tera, a tshela dinyaga di le 119, a ntse a tshola tshimane le tshetsana.

₂₆Ya re Tera a sena go tshela dinyaga di le 70, a tshola Aberame, Nahore le Harane.

₂₇Mme jaana tse, ke tsone ditshika tsa ga Tera. Tera a tshola Aberame, Nahore le Harane; Harane a tshola Lote. ₂₈Harane a swa pele ga rraagwe Tera, mo lefatsheng le a tsaletsweng mo go lone, e bong Ure wa Bakalatea. ₂₉Aberame le Nahore ba tsaya basadi: leina la mosadi wa ga Aberame, go twe Sarai; leina la mosadi wa ga Nahore go twe Mileka, morwadia Harane, rra Mileka le rra Iseka. ₃₀Sarai ya bo e le moopa; a se na ngwana.

₃₁Tera a tsaya Aberame morwawe, le Lote morwa Harane, ngwana wa ngwana wa gagwe, le Sarai ngwetsi ya gagwe, mosadi wa ga Aberame morwawe, a tswa nabo mo Ure wa Bakalatea, go ya kwa lefatsheng la Kanana, mme ba fitlha mo Harane, ba aga gone. ₃₂Malatsi a ga Tera e ne e le dinyaga di le 205; a swela mo Harane.