Emang ka tlhomamo mo kgololesegong
1Keresete o re golotse ka kgololo; ke gone, tlhomamang, lo se ka lwa tlhola lo ikgweleanya ka jokwe ya botlhanka.
2Bonang, nna Paulo, ke a lo raya ka re, fa lo rupa, Keresete ga a ketla a dira le thuso epe mo go lona. 3Ee, ke bile ke supetsa mongwe le mongwe gape yo o rupang, fa a le molato le molao otlhe go o dira. 4Lo lomologantswe mo go Keresete, lona ba lo ratang go siamisiwa ka molao; lo ole mo tshegofatsong. 5Gonne rona re lebeletse tsholofelo ya tshiamo re le mo Moweng, ka tumelo. 6Gonne mo go Keresete Jesu bogwera ga bo thuse sepe, le fa e le bokgola, fa e se tumelo fela e e dirang ka lorato.
7Lo kile lwa nna lwa siana sentle; e mang yo o lo kgoreleditseng gore lo se utlwe boammaaruri? 8Kgakololo e ga e a tswa mo go yo o lo bitsang. 9Sebediso se le sennye se tle se bedise boupe jotlhe. 10Ke ikantse Morena ka ga lona, gore ga lo ketla lo gopola ka go sele gope; mme yo o lo huduang, le fa e ka bo e le mang, o tlaa rwala tshekiso ya gagwe.
11Nna, bagaetsho, fa ke sa ntse ke rera bogwera, ke bo ke sa ntse ke bogisediwang? Fa e le jalo kgopiso ya mokgoro e tlositswe. 12A bo ba ba lo huduang ba ka bo ba ikgaola fela.
13Gonne lona, bagaetsho, lo bileditswe kgololesego; lo se ka lwa fetola kgololesego ya lona sebaka sa nama go itirela; mme lo nne batlhanka, mongwe wa yo mongwe mo loratong. 14Gonne molao otlhe o dirafadiwa mo lefokong le le lengwe fela, e bong mo go le, go re: “O rate wa gaeno jaaka o ithata.” 15Mme fa lo lomana, lo jana, lo itise gore lo se nyeletsane.
Maungo a Mowa le ditiro tsa nama
16Ka re, sepelang ka Mowa, mme ga lo ketla lo dirafatsa thato ya nama. 17Gonne dithato tsa nama di tlhabana le Mowa, le Mowa o tlhabana le nama; gonne dilo tse di a tlhabana; e le gore lo se ka lwa dira tse lo di ratang fela. 18Fa lo gogwa ke Mowa, lo bo lo se fa tlase ga molao.
19Jaana ditiro tsa nama di a bonala, tse e leng boaka le bomaswe, le bopepe, 20le tirelo ya medimo ya disetwa, le boloi, le dikilano, le kgang, le mafufa, le dikgakalo, le ditomologano, le dikgaogano, le makoko, 21le dipelotshetlha, le matago, le ditlhapelo, le dilo tse di ntseng jalo; ke lo tlhagisa ka ga tsone, fela jaaka nkile ka lo tlhagisa, gore ba ba dirang dilo tse di ntseng jalo, ga ba ketla ba rua bogosi jwa Modimo.
22Mme loungo lwa Mowa ke lorato, le boitumelo, le kagiso, le bopelotelele, le bopelonomi, le molemo, le boikanngo, 23le boingotlo, le boikgapo; dilo tse, ga di angwe ke molao ope. 24Mme ba e leng ba ga Keresete Jesu ba bapotse nama, le dikgotelo le dithato tsa yone. 25Fa re tshela ka Mowa, le gone a re sepeleng ka Mowa. 26A re se nne boipelafatso fela, re se ka ra rumolana, ra direlana ka bopelotshetlha.
