ESERA 8

₁Jaana ba, ke ditlhogo tsa makgotla a borraabo, mme e ke yone polelo ya losika, ya bone ba ba tlhatlogileng le nna ba tswa Babilone, mo pusong ya ga kgosi Aretaserese: ₂Gerešome, wa bomorwa Finehase; Daniele, wa bomorwa Ithamare; Hatuše, wa bomorwa Dafite. ₃Wa bomorwa Shekania; wa bomorwa Paroše, Sekaria; mme ga balelwa nae ka losika banna ba le 150. ₄Ba bomorwa Bahathe-moabe, Eliehoenai morwa Serahia; le banna ba le 200 nae. ₅Ba bomorwa Shekania, morwa Jahasiele, le banna ba le 300 nae. ₆Ba bomorwa Adine, Ebete morwa Jonathane; le banna ba le 50 nae. ₇Ba bomorwa Elame, Ješaia morwa Athalia; le banna ba le 70 nae. ₈Ba bomorwa Shefataia, Sebadia morwa Mikaele, le banna ba le 80 nae. ₉Ba bomorwa Joabe, Obadia morwa Jehiele, le banna ba le 218 nae. ₁₀Ba bomorwa Shelomithe, morwa Josifia; le banna ba le 160 nae. ₁₁Ba bomorwa Bebai, Sekaria morwa Bebai; le banna ba le 28 nae. ₁₂Ba bomorwa Asegate, Johanane morwa Hakatane; le banna ba le 110 nae. ₁₃Ba bomorwa Atonikame, ba e ne e le ba bofelo; maina a bone ke a: Elifelete, Jeuele, le Shemaia, le banna ba le 60 nabo. ₁₄Ba bomorwa Bigefai, Uthai le Sabute; le banna ba le 70 nabo.

₁₅Mme ka ba phuthela kwa nokeng e e elelang kwa Ahafa; ra thibelela teng malatsi a le mararo; ka lebaleba batho, le baperesiti, mme ka se ka ka fitlhela ope gone wa bomorwa Lefi. ₁₆Foo ka roma ka ya go bitsa Eliesere, le Ariele, Shemaia, le Elenathane, le Jaribe, Elenathane, le Nathane, le Sekaria le Mešulame, ditlhogo tsa batho; le gone ka bitsa Joaribe le Elenathane ba e neng e le baruti. ₁₇Ka ba roma kwa go Ito yo e leng mogolwane kwa felong fa go tweng Kasifia; ka ba laela se ba tlaa se bolelelang Ito le bomonnawe Banethinime kwa felong fa go tweng Kasifia, gore ba re leretse badiredi ba ntlo ya Modimo wa rona. ₁₈Ka fa seatla se se molemo sa Modimo wa rona se ntseng mo go rona ka teng, ba re leretse monna yo o matsetseleko, wa bomorwa Mahale, morwa Lefi, morwa Iseraele; le Sherebia, a na le bomorwawe le bana ba ga rraagwe, ba le 18; ₁₉Hašabia, a na le Ješaia le bomorwa Merari, bana ba ga rraagwe le bomorwa bone, ba le 20; ₂₀le Banethinima, ba Dafite le dikgosana ba kileng ba ba neela tirelo ya Balefi, Banethinima, ba le 220; botlhe ba bolelwa ka maina.

₂₁Foo ka opa mokgosi wa go re, go ikidiwe dijo gone, fa nokeng ya Ahafa, gore re tle re ikokobetse fa pele ga Modimo wa rona, go tla re batla mo go one tsela e e siameng, ya rona, le ya banyana ba rona, le ya dithuo tsotlhe tsa rona. ₂₂Gonne ke ne ke tlhajwa ke ditlhong go lopa kgosi lesomo la batlhabani le bapalami ba dipitse go re thusa go tlhabana le mmaba mo tseleng; gonne re buile le kgosi, ra re: “Seatla sa Modimo wa rona se na le botlhe ba ba o batlang go ba direla molemo; mme thata ya one le bogale jwa one di tlhabana le botlhe ba ba o latlhang.” ₂₃Jalo ra ikitsa go ja, ra rapela Modimo wa rona ka ga selo se, mme wa re rapelesegela.

₂₄Foo ka lomolola batho ba le 12 ba ditlhogo tsa baperesiti, e bong Sherebia, Hašabia le bomonnaa bone ba le some ba na nabo. ₂₅Ka ba lekanyetsa selefera, le gouta, le dilwana, e bong tse di ntsheditsweng ntlo ya Modimo, tse kgosi le bagakolodi ba yone, le dikgosana tsa yone, le Baiseraele botlhe ba ba teng, ba di ntshitseng. ₂₆Ka lekanyetsa fela mo diatleng tsa bone dikilokerame tsa selefera di le 22 100, le dilwana tsa selefera tsa dikilokerame di le 3 400; gouta e le dikilokerame di le 3 400. ₂₇Le megotšana ya gouta e le 20, e le ya madi a a kanang ka diponto di le 400; le dilwana di le pedi tsa kgotlho e e itshekileng e e phatsimang, e le e e tlhokegang jaaka gouta.

₂₈Ka ba raya ka re: “Lo iitshepetse Jehofa, le dilwana tse di boitshepo; le selefera le gouta ke neo ya pelo e e thamileng fela, e newa Jehofa Modimo wa borraeno. ₂₉Lo lebele, lo di boloke, go tsamaya lo di lekanya fa pele ga ditlhogo tsa baperesiti le Balefi, le dikgosana tsa makgotla a borra Baiseraele kwa Jerusalema, mo matlwaneng a ntlo ya ga Jehofa.” ₃₀Jalo baperesiti le Balefi ba amogela selekanyo sa bokete jwa selefera le gouta, le dilwana, go tla ba di isa Jerusalema mo ntlong ya Modimo wa rona.

₃₁Foo ra tloga mo nokeng ya Ahafa ka letsatsi la 12 la kgwedi ya ntlha, go ya Jerusalema; seatla sa Modimo wa rona sa nna le rona, wa re golola mo seatleng sa mmaba le molaledi mo tseleng. ₃₂Ra fitlha kwa Jerusalema, mme ra nna gone malatsi a le mararo. ₃₃Ya re ka letsatsi la bone selefera le gouta le dilwana tsa lekanngwa mo ntlong ya Modimo, tsa lekanyediwa mo seatleng sa ga Meremothe morwa Uria moperesiti; Eleasare morwa Finehase a na nae; le Josabate morwa Ješua, le Noadia morwa Binui, ba Balefi ba bo ba na nabo; ₃₄tsotlhe tsa ema ka palo le ka bokete; mme bokete jotlhe jwa kwalwa ka lobaka loo.

₃₅Bana ba botshwaro, ba ba duleng kwa botshwarong, ba isetsa Modimo wa Iseraele ditshupelo tse di fisiwang, dipholwana tsa dikgomo di le 12 tsa Baiseraele botlhe, diphelefu di le 96, dikwanyana di le 77 le diphoko di le 12, tsa tshupelelo ya boleo; gotlhe mo e ne e le tshupelo e e fisediwang Jehofa. ₃₆Ba isa melaetso ya kgosi mo balaodisiweng ba kgosi, le mo balaoding ba ba kwa moseja ga noka; mme ba tswedisetsa batho le ntlo ya Modimo kwa pele.