ESEKIELE 8

₁Ga dirala e rile ka ngwaga wa borataro, ka kgwedi ya borataro, ka letsatsi la botlhano la kgwedi, ka ke dutse mo ntlong ya me, le bagolwane ba Juta ba dutse fa pele ga me, seatla sa Morena Modimo sa nkwela teng. ₂Foo ka leba, mme bonang, setshwano ekete ponalo ya molelo; go simolola ka ponalo ya lotheka lwa gagwe le go ya kwa tlase ya bo e le molelo; mme go tswa mo lothekeng lwa gagwe le go ya kwa godimo e kete e ne e le ponalo ya phatsimo, e kete mmala wa motsodutsokwane. ₃Mme a ntsha setshwano sa seatla, mme a ntshwara ka lekaodi la moriri wa tlhogo ya me; mowa wa ntsholeletsa fa gare ga lefatshe le legodimo, wa nkisa ka diponatshegelo tsa Modimo kwa Jerusalema, kwa mojakong wa kgoro ya lolwapa lwa kwa teng, e e lebileng ntlheng ya botsheka; kwa senno sa setshwantsho sa lefufa se leng teng, se se fufanyang.

₄Mme bonang, kgalalelo ya Modimo wa Iseraele e ne e le teng, ka fa ponalong e ke kileng ka e bona kwa lobaleng. ₅Foo a nthaya, a re: “Morwa motho, a ko o tsholetse matlho o lebe ntlheng ya botsheka.” Mme ka tsholetsa matlho ka leba ntlheng ya botsheka, mme bonang ntlheng ya botsheka ga kgoro ya sebeso ga bo go dutse setshwantsho se, sa lefufa se le fa botsenong.

₆A nthaya, a re: “Morwa motho, a o bona se ba se dirang, e bong dilo tse dikgolo tse di makgapha tse ba ntlo ya Iseraele ba di dirang mono, gore ke tle ke ye kgakala le felo ga me ga boitshepo? Mme o tlaa ba o bona tse di makgapha tse dikgolo tse dingwe gape.”

₇Mme a nkisa kwa mojakong wa lolwapa; mme ya re ke leba, bonang ga bo go le letshofa mo lomoteng. ₈Foo a nthaya, a re: “Morwa motho, a ko o phunye lomota.” Ke rile ke sena go phunya lomota, bonang, ga bo go le mojako. ₉A nthaya a re: “Tsena, o bone dilo tse di maswe tse di makgapha tse ba di dirang mono.” ₁₀Jalo ka tsena, mme ka bona; mme bonang, ga bo go le setshwano sengwe le sengwe sa dilo tse di gagabang, le sa ditshedi tse di maswe, le medimo yotlhe ya disetwa ya ba ntlo ya Iseraele, tsa bo di kwalakwaditswe ditshwantsho mo lomoteng tikologong. ₁₁Ga bo go eme fa pele ga tsone banna ba le 70 ba bagolwane ba ntlo ya Iseraele, mo gare ga bone ga bo go eme Jaasania morwa Safane, mongwe le mongwe a tshotse lobeyana lwa gagwe; mme monko wa leru la maswalo wa bo o tlhatloga. ₁₂Foo a nthaya a re: “Morwa motho, a o bonye se bagolwane ba ntlo ya Iseraele ba se dirang mo sephiring, mongwe le mongwe mo matlwaneng a gagwe a a kwalakwaditsweng? Gonne, ba re: Jehofa ga a re bone; Jehofa o tlogetse lefatshe.”

₁₃A ba a nthaya gape, a re: “O tlaa ba o bona dilo tse di makgapha tse dikgolo tse dingwe, tse ba di dirang.” ₁₄Foo a nkisa kwa mojakong wa kgoro ya ntlo ya ga Jehofa e e lebileng ntlheng ya botsheka; mme bonang ga bo go dutse basadi teng ba lelela Tamuse.

₁₅Foo a nthaya a re: “A o bonye selo se morwa motho? O tlaa ba o bona tse di makgapha tse dingwe gape tse di gaisang tse.” ₁₆Mme a nkisa mo lwapeng lwa kwa teng lwa ntlo ya ga Jehofa, mme bonang, fa mojakong wa tempele ya ga Jehofa, fa gare ga mokatako le sebeso, ga bo go le banna e ka ne e le 25, ba hularetse tempele ya ga Jehofa, ba lebile ntlheng ya botlhabatsatsi; mme ba bo ba obamela letsatsi ba lebile kwa botlhabatsatsi.

₁₇Foo a nthaya a re: “A o bonye selo se, morwa motho? A ke selo se se motlhofo mo go ba ntlo ya Juta fa ba dira tse di makgapha tse ba di dirang mono? Gonne ba tladitse lefatshe ka thubakano, ba menogetse gape go ntlhotlheleletsa bogaleng. Mme bonang ba ipaya kala ya setlhare fa nkong. ₁₈Ke gone ka moo le nna ke tlaa dirang ka tšararego; leitlho la me ga le ketla le rekegela, le gone ga nketla ke tlhomoga pelo; mme le fa ba goa mo tsebeng tsa me ka kgoo e kgolo, le fa go ntse jalo ga nketla ke ba utlwa.”