ESEKIELE 6

₁Lefoko la ga Jehofa la tla mo go nna, la re: ₂“Morwa motho, lebisa sefatlhogo sa gago kwa dithabeng tsa Iseraele. ₃O di perofesetse, o re: ‘Lona dithaba tsa Iseraele, utlwang lefoko la Morena Modimo. Morena Modimo o bua jaana le dithaba le makhubu, le melatswana le melapo. A re: Bonang, nna e bong nna, ke tlaa tlisa tšhaka mo go lona, ke tlaa senya mafelo a lona a a tlotlometseng. ₄Dibeso tsa lona di tlaa swafala, ditshwantsho tsa lona tsa letsatsi di tlaa thujwa; ke tlaa digela fa fatshe babolaiwi ba lona fa pele ga medimo ya lona ya disetwa. ₅Ke tlaa baya ditoto tsa bana ba Iseraele fa pele ga medimo ya bone ya disetwa, ke tlaa gasa marapo a lona mo tikologong ya dibeso tsa lona. ₆Mo mannong otlhe a lona metse e tlaa ropefadiwa, le mafelo a a tlotlometseng a tlaa swafala; gore dibeso tsa lona di ropefadiwa, le gore medimo ya lona ya disetwa e thujwe e khutle, le gore ditshwantsho tsa lona tsa letsatsi di rengwe, le ditiro tsa lona di tlosediwe ruri. ₇Babolaiwi ba tlaa wa mo gare ga lona, mme lo tlaa itse fa ke le Jehofa.

₈“ ‘Le fa go ntse jalo ke tlaa tlogela masalela, ka lo tlaa bo lo saletswe ke bangwe ba ba tlaa falolang mo tšhakeng mo merafeng, mogang lo gasagasegelang mo mafatsheng. ₉Mme bone ba lona ba ba tlaa falolang ba tlaa nkgakologelwa mo merafeng kwa ba tlaa bong ba isitswe e le ditshwarwa teng; le jaaka ke ntse ke remilwe ke pelo ya bone ya go akafala, e e ntlogetseng, le ke matlho a bone a a akafalelang medimo ya bone ya disetwa; ba tlaa ipherogela sebete mo go iponeng ga bone ka ntlha ya masula a ba a dirileng mo dilong tsotlhe tsa bone tse di makgapha. ₁₀Ba tlaa itse fa ke le Jehofa; ga ke a bua ka lefela fa ke re ke tlaa ba direla bosula jo.’ ”

₁₁Morena Modimo o bua jaana, a re: “Bata ka seatla, o tibe ka lonao, mme, o re: ‘Ija we!’ Ka ntlha ya makgapha otlhe a a bosula a ba ntlo ya Iseraele; gonne ba tlaa wa ka tšhaka, ka mmopamo, le ka kgogodi. ₁₂Yo o kwa kgakala o tlaa swa ka kgogodi; yo o fa gaufi o tlaa wa ka tšhaka; yo o salang mme a tlhaselwa, o tlaa swa ka go bopama; jalo ke tlaa dirafatsa tsa tšararego ya me mo go bone. ₁₃Mme lo tlaa itse fa ke le Jehofa, mogang babolaiwi ba bone ba tlaa fitlhelwang ba tlhakanye le medimo ya bone ya disetwa mo tikologong ya dibeso, mo lekhujaneng lengwe le lengwe le le godileng, mo ditlhoreng tsotlhe tsa dithaba, le fa tlase ga setlhare sengwe le sengwe se setala, le fa tlase ga mooka mongwe le mongwe o mokima, felong fa ba iseditseng medimo yotlhe ya bone ya disetwa lonko lo lo monate teng. ₁₄Ke tlaa ba otlololela letsogo la me, ke swafatsa lefatshe ke le kgakgabatsa, go tswa nageng ntlheng ya Dibela, go ya le manno otlhe a bone; mme ba tlaa itse fa ke le Jehofa.”