Karolo ya Modimo ya lefatshe
1“Gape, e tlaa re lo kgaoganya lefatshe ka taolo ya bola, gore le nne boswa, lo isetse Jehofa seromololo, e bong kabelo nngwe e e boitshepo ya lefatshe; boleele e nne jwa boleele jwa ditlhaka di le 25 000, le boatlhamo e nne ditlhaka di le 10 000; kabelo eo e tlaa nna boitshepo go ya le molelwane otlhe wa lone mo tikologong. 2Mo go lone a go nne sebaka sa felo ga boitshepo, boleele bo nne 500, le boatlhamo bo le 500, se lekalekanye fela ka ntlha yotlhe; le mabogo a le 50 a dintlhana tsa yone ntlheng tsotlhe. 3Mo selekanyong seo o lekanye boleele bo le 25 000, le boatlhamo bo le 10 000; mme e tlaa nna gone felo ga boitshepo, mo go boitshepo jo bo itshepileng. 4Ke kabelo ya lefatshe e e itshepileng; e tlaa nna ga baperesiti, badiredi ba felo ga boitshepo, ba ba atamelang go direla Jehofa; e tlaa nna felo ga mantlo a bone, le felo mo go itshepileng ga felo ga boitshepo. 5Boleele jwa 25 000, le boatlhamo jwa 10 000 e tlaa nna ga Balefi, badiredi ba ntlo, go nna boswa jwa bone, jwa matlwana a le 20.
6“Lo tlaa laolela boswa jwa motse boatlhamo bo le 5 000, le boleele bo le 25 000 go bapile le seromololo sa kabelo e e itshepileng; e nne ga ba ntlo yotlhe ya Iseraele.
Karolo ya kgosana ya lefatshe
7“Se e ka nnang sa kgosana e nne ka fa ntlheng nngwe le e nngwe, se bapile le seromololo se se itshepileng le boswa jwa motse, fa pele ga seromololo se se itshepileng, le fa pele ga boswa jwa motse, ka fa ntlheng ya bophirimatsatsi go leba bophirimatsatsi, le ka fa ntlheng ya botlhabatsatsi go leba botlhabatsatsi; le mo boleeleng go lekalekanye le kabelo nngwe, go tswa molelwaneng wa bophirimatsatsi go ya molelwaneng wa botlhabatsatsi. 8Mo lefatsheng e tlaa nna boswa jwa yone mo Iseraele; mme dikgosana tsa me ga di ketla di tlhola di patika batho ba me; di tlaa naya ba ntlo ya Iseraele lefatshe ka fa ditsong tsa bone.”
Dikgosana di a laelwa
9Morena Modimo o bua jaana, a re: “A go lo lekane lona dikgosana tsa Iseraele; tlosang thubakano le thopo, mme lo dirafatse katholo le tshiamiso; tlosang dipatiko tsa lona mo bathong ba me, go bua Morena Modimo.
10“Lo nne le dilekanyo tsa pego tse di siameng, selekanyo sa emere se se siameng le selekanyo sa batha se se siameng.
11“Efa le batha di nne selekanyo se le sengwe fela gore e tle e re homere e kgaoganngwa sesome, batha e be e le kana ka kgaogano e le nngwe fela ya yone, le efa e le kana ka kgaogano e le nngwe fela ya tse di some tsa homere; selekanyo sa tsone se tlaa nna ka fa selekanyong sa homere.
12“Shekele e nne digera di le 20; dišekele di le 20, dišekele di le 25, dišekele di le 15 e nne selekanyo sa lona sa mane.
13“Se ke sone seromololo se lo tlaa se isang; fa e le homere ya mabele go isiwe kgaogano e le nngwe fela ya dikgaogano di le thataro tsa efa, le fa go le homere ya barele, e tlaa nna kgaogano e le nngwe fela ya dikgaogano di thataro tsa efa. 14Kabelo e e laotsweng ya lookwane, e e tswang mo batheng ya lookwane a e nne kgaogano e le nngwe fela ya dikgaogano di le some tsa batha mo selekanyong sa kore (kore ke homere), e e leng dibatha di le some, e bong homere; gonne dibatha di le some ke homere. 15Le kwanyana e le nngwe fela ya letsomane, ya makgolo a le mabedi, e e tswang kwa mahulong a monono a Iseraele; go nna tshupelo ya dijo, le tshupelo e e fisiwang, le ditshupelo tsa kagiso, go ba direla tetlanyo, go bua Morena Modimo.
16“Batho botlhe ba lefatshe a ba ntshe seromololo se, e le sa kgosana mo Iseraele. 17E tlaa nna tshwanelo ya kgosana go ntsha ditshupelo tse di fisiwang, le ditshupelo tsa boupe, le ditshupelo tse di nowang, mo medirong, le mo metlheng ya go rogwa ga dikgwedi, le mo bosabateng, mo medirong yotlhe e e laotsweng ya ntlo ya Iseraele; o tlaa baakanya tshupelelo ya boleo le tshupelo ya boupe le tshupelo e e fisiwang, le ditshupelo tsa kagiso, go direla ntlo ya Iseraele tetlanyo.”
Meletlo ya ditshupelo
18“Morena Modimo o bua jaana, a re: E re ka kgwedi ya ntlha, ka letsatsi la ntlha la kgwedi, o tseye kgongwana e e se nang bogole; mme o tlhapise felo ga boitshepo. 19Moperesiti a tseye madi a tshupelelo ya boleo, a a beye mo mephakwaneng ya mojako wa ntlo, le mo dikgokgotšhong tse nne tsa serepodi sa lomota lwa sebeso, le mo mephakwaneng ya kgoro ya lolwapa lwa ka fa teng. 20O tlaa dira jalo ka tsatsi la bosupa la kgwedi, o direla mongwe le mongwe yo o timelang le yo o motho senyana. Jalo lo tlaa bo lo direla ntlo tetlanyo.
21“Ka kgwedi ya ntlha, ka letsatsi la 14 la kgwedi, lo dire modiro wa tlolaganyo, e le modiro wa malatsi a supa; go tlaa jewa senkgwe se se sa bedisiwang. 22Ka tsatsi leo, a kgosana e ipaakanyetse le batho botlhe ba lefatshe kgomo, e le tshupelelo ya boleo. 23Mo malatsing a a supang a modiro a e baakanyetse Jehofa tshupelo e e fisiwang, dikgomo disupa, le diphelefu disupa tse di se nang bogole, ka tsatsi lengwe le lengwe la malatsi a a supang, le phoko ka letsatsi lengwe le lengwe e le tshupelelo ya boleo. 24A a baakanye tshupelo ya dijo, e le emere ya kgomo nngwe le nngwe, le emere ya kgomo nngwe le nngwe, le emere ya phelefu nngwe le nngwe, le sego sa lookwane sa emere nngwe le nngwe.
25“Ka kgwedi ya bosupa, ka tsatsi la 15 la kgwedi, mo modirong, a dire jalo ga malatsi a a supang; ka fa tshupelelong ya boleo, ka fa tshupelong e e fisiwang, le ka fa tshupelong ya boupe, le ka fa lookwaneng.”
