ESEKIELE 25

₁Lefoko la ga Jehofa la tla mo go nna, la re: ₂“Morwa motho, lebisa sefatlhogo sa gago kwa baneng ba Amone, mme o ba perofesetse o ba nyatse. ₃O reye bana ba Amone o re: Utlwang, lefoko la Morena Modimo; Morena Modimo o bua jaana, a re: E re ka o nyaditse felo ga me ga boitshepo, jale ka go tlhapadiwa, wa re: ‘Ahe;’ le ka ga lefatshe la Iseraele jale ka le swafadiwa; le ka ga ba ntlo ya Juta jale ka ba isiwa botshwarong. ₄Ke gone bona, ke tlaa go neela bana ba botlhabatsatsi gore ba go rue, mme ba tlaa tlhoma mathibelelo a bone mo go wena, ba tlaa dira maago a bone mo go wena; ba tlaa ja maungo a gago, ba tlaa nwa maši a gago. ₅Ke tlaa dira Raba gore go nne ntlo ya dikamela, le bana ba Amone gore o nne mabothelo a matsomane; mme lo tlaa itse fa ke le Jehofa.”

₆Gonne Morena Modimo o bua jaana, a re: “E re ka o opantse diatla, wa tiba ka dinao, wa itumela ka kilo yotlhe ya mowa wa gago ka ga lefatshe la Iseraele; ₇ka re: Bona, ke go otlololetse seatla, ke tlaa go neela merafe gore o thopiwe; ke tlaa go kgaola mo ditšhabeng, ke dira gore o nyelele mo mafatsheng, ke tlaa go senya; mme o tlaa itse fa ke le Jehofa.”

₈Morena Modimo o bua jaana, a re: “Ereka boMoabe le Seira ba re: Bonang, ba ntlo ya Juta ba tshwana le merafe yotlhe; ₉ke gone bonang, ke tlaa phunya lotlhakore lwa Moabe ka fa ntlheng ya metse, go tswa metseng ya gagwe e e mo melelwaneng ya gagwe, kgalalelo ya lefatshe, e bong Bethe-jesimothe, le Baale-meone, le Kiriathaime, ₁₀ke lo phunyetsa bana ba botlhabatsatsi, ba ya go tlhabana le bana ba Amone, mme ke tlaa ba ntshetsa go ruiwa, gore bana ba Amone ba se tlhole ba gakologelwa mo merafeng. ₁₁Ke tlaa dirafatsa ditshekiso mo Moabe; mme ba tlaa itse fa ke le Jehofa.”

₁₂Morena Modimo o bua jaana, a re: “E re ka Etome a tlhabanye le ba ntlo ya Juta ka go ipusolosa a kgopile thata, mme a ipusoloseditse mo go bone; ₁₃ke gone ka moo Morena Modimo o bua jaana, a re: Ke tlaa otlololela Etome seatla, ke tlaa kgaola ke tlosa gone motho le kgomo, ke tlaa go swafatsa go simolola kwa Temane; go ya fela kwa Detane ba tlaa wa ka tšhaka. ₁₄Ke tlaa baya pusoloso ya me mo Etome ka seatla sa batho ba me ba Iseraele; ba tlaa dira mo Etome ka fa bogaleng jwa me, le ka fa tšararegong ya me; mme ba tlaa itse pusoloso ya me,” go bua Morena Modimo.

₁₅Morena Modimo o bua jaana, a re: “E re ka Bafilisitia ba dirile ka pusoloso, mme ba ipusolositse ka kilo ya mowa go le senya ka bobaba jo bo sa khutleng; ₁₆ke gone ka moo Morena Modimo o bua jaana, a re: Bonang, ke tlaa otlololela Bafilisitia seatla, mme ke tlaa kgaola Bakerethe, ke ba ke senya masalela a ka fa dintshing tsa lewatle. ₁₇Ke tlaa ba ipusolosetsa thata ka dikgalemo tse di šakgetseng; mme ba tlaa itse fa ke le Jehofa, mogang ke ipusolosang mo go bone.”