ESEKIELE 2

₁A nthaya a re: “Morwa motho, ema ka dinao, mme ke tlaa bua nao.” ₂Ya re a bua le nna mowa wa tsena mo go nna, wa nkemisa ka dinao; mme ka utlwa yo o buang le nna. ₃Mme a nthaya a re: “Morwa motho, ke go roma kwa baneng ba Iseraele, kwa merafeng e e borukhutlhi, e e ntsuololetseng; bone le borraabo ba ntloletse molao, le go tla go fitlha mo tsatsing leno la gompieno. ₄Bana ba ke go romang kwa go bone ba makgakga, ba pelo ya lesoko; mme o tlaa ba raya o re: ‘Morena Modimo o bua jaana, a re.’ ₅Bone, le fa ba utlwa, kgotsa ba gana go utlwa, (gonne ke lekgotla le le borukhutlhi), ba tlaa bo ba itse fa go kile ga ne go le moperofeti mo go bone.

₆“Mme wena, morwa motho, o se ka wa ba boifa le gone o se ka wa boifa mafoko a bone, le fa go na le mengana le mitlwa nao, mme o agile fa gare ga diphepheng; o se ka wa boifa mafoko a bone, o bo o se ka wa rerega ka ponalo ya bone, le fa ba le lekgotla le le borukhutlhi. ₇Wena, o bue mafoko a me nabo, le fa ba utlwa, le fa ba gana go utlwa; gonne ba borukhutlhi mo gogolo thata.

₈“Wena, morwa motho, utlwa se ke se buang nao; o se ka wa nna borukhutlhi jaaka lekgotla leo le le tsuololang; atlhamolosa legano, mme o je se ke se go nayang.” ₉Mme e rile ke leba, bonang, ga ntshediwa seatla kwa go nna; mme bonang, ga bo go le momenagano wa lokwalo mo go sone. ₁₀Mme a lo menolola fa pele ga me; mme lwa bo lo kwadilwe ka fa teng le ka fa ntle; mme ga bo go kwadilwe mo go lone dikhutsafalo, le selelo, le tatlhego.