EKESODO 37

₁Besalele a dira letlole ka logong lwa mokala; boleele jwa lone e le boleele jwa disentimetara di le 110, boatlhamo jwa lone e le disentimetara di le 66, le bogodimo jwa lone e le disentimetara di le 66. ₂A le manega gouta e e sa pekwang ka fa teng le ka fa ntle, a le direla segomo sa gouta mo tikologong ya lone. ₃A le thelela melepo e le mene ya gouta mo maotong a lone oo mane, melepo e le mebedi ka fa lotlhakoreng longwe lwa lone le melepo e le mebedi ka fa lotlhakoreng lwa lone lo longwe. ₄A dira disikaro tsa mokala, a di manega gouta. ₅A tsenya disikaro mo melepong ka fa ditlhakoreng tsa letlole, go sikara letlole ka tsone. ₆A dira senno sa boutlwelo botlhoko ka gouta e e sa pekwang; boleele jwa sone e le disentimetara di le 110, boatlhamo jwa sone e le disentimetara di le 66. ₇A dira ditšheruba di le pedi ka gouta; a di dira ka gouta e e papetlilweng ka noto ka fa dintlheng tsoo pedi tsa senno sa boutlwelo botlhoko; ₈tšheruba nngwe kwa ntlheng nngwe, le tšheruba e nngwe kwa ntlheng e nngwe; ditšheruba tse, di ne di le kwa dintlheng tsa senno sa boutlwelo botlhoko; di le dingwe fela naso, di semega mo go sone. ₉Ditšheruba tsa tsharololela diphuka tsa tsone godimo, tsa khurumetsa senno sa boutlwelo botlhoko ka diphuka tsa tsone, di lebanye difatlhogo; difatlhogo tsa ditšheruba di ne di inametse mo sennong sa boutlwelo botlhoko.

₁₀A dira lomati lwa bojelo ka mokala; boleele jwa lone e le boleele jwa disentimetara di le 88, boatlhamo jwa lone e le disentimetara di le 44, le bogodimo jwa lone e le disentimetara di le 66. ₁₁A lo manega gouta, a lo direla segomo sa gouta mo tikologong ya lone. ₁₂A lo direla merapalego mo tikologong ya lone e le boatlhamo jwa dimilimetara di le 75, a ba a direla merapalego ya lone segomo sa gouta mo tikologong ya lone. ₁₃A lo thelela melepo ya gouta e le mene, a tsenya melepo fa dinakeng tse nne tse di fa maotong a lone a mane. ₁₄Melepo e ne e le gaufi le losi lwa merapalego, e le masomelo a disikaro tse go sikarwang lomati lwa bojelo ka tsone. ₁₅Disikaro a di dira ka mokala, a di manega gouta, go tla go sikarwa lomati lwa bojelo ka tsone. ₁₆A dira dilwana tse di nnang mo lomating lwa bojelo, megotšana ya lone, dintshwana tsa lone, digwana tsa lone, le digo tsa lone, tse go thelwang ka tsone, e le tsa gouta e e sa pekwang.

₁₇A dira setlhomo sa dipone ka gouta e e sa pekwang; a dira setlhomo sa dipone ka gouta e e papetlilweng ka noto, e bong marago a sone, le thito ya sone; dinkgwana tsa sone le dikgolokwane tsa sone, le dithunya tsa sone, di le gouta nngwe fela naso, di semega mo go sone.

₁₈Ga bo go le dikala di le thataro tse di tswang mo ditlhakoreng tsa sone; dikala di le tharo tsa setlhomo tsa tswa mo lotlhakoreng longwe, le dikala di le tharo tsa setlhomo tsa tswa mo lotlhakoreng lo longwe. ₁₉Dinkgwanyana di le tharo tse di dirilweng mo tshwanong ya dithunya tsa thamane di le mo kaleng nngwe, di na le kgolokwane le sethunya; le dinkgwanyana di le tharo tse di dirilweng mo tshwanong ya dithunya tsa thamane di le mo kaleng e nngwe, di na le kgolokwane le sethunya; ga nna jalo mo dikaleng tsoo thataro tse di tswang mo setlhomong sa dipone. ₂₀Mo setlhomong sa dipone go ne go le dinkgwanyana di le nne tse di dirilweng mo tshwanong ya dithunya tsa thamane, dikgolokwane tsa tsone, le dithunya tsa tsone. ₂₁Ga bo go le kgolokwane fa tlase ga dikala di le pedi di le tiro nngwe fela naso, di semega mo go sone, le kgolokwane fa tlase ga dikala di le pedi di le tiro nngwe fela naso, le kgolokwane fa tlase ga dikala di le pedi di le tiro nngwe fela naso, ga nna jalo mo dikaleng tse thataro tse di tswang mo go sone. ₂₂Dikgolokwane tsa tsone, le dikala tsa tsone di le tiro nngwe fela naso, di semega mo go sone; bojotlhe jwa sone bo ne bo le tiro nngwe fela ya gouta e e sa pekwang, e e papetlilweng ka noto. ₂₃A dira dilampa tsa sone di supa, le dipoma tsa tsone, le dipomelo tsa tsone, ka gouta e e sa pekwang. ₂₄A se dira le dilwana tsotlhe tsa sone ka talenta ya gouta e e sa pekwang.

₂₅A dira sebeso sa maswalo ka logong lwa mokala: boleele jwa sone e le disentimetara di le 45, boatlhamo jwa sone e le disentimetara di le 45, se le dintlha di le nne tse di lekalekanyeng fela; bogodimo jwa sone e le disentimetara di le 90; dinaka tsa sone e le logong lo le longwe fela naso, di semega mo go lone. ₂₆A se manega gouta e e sa pekwang, e bong fa godimo ga sone, le ka fa ditlhakoreng tsa sone mo tikologong, le dinaka tsa sone; mme a se direla segomo ka gouta mo tikologong. ₂₇A se direla melepo e le mebedi ya gouta ka fa tlase ga segomo sa sone mo dikgopong tsa sone tse pedi, ka fa ditlhakoreng tsa sone tsoo pedi, e le masomelelo a disikaro tse se sikarwang ka tsone. ₂₈Disikaro a di dira ka mokala, a di manega gouta.

₂₉A dira lookwane lo lo itshepileng lo lo tlolwang, le maswalo a a sa pekwang a maroku a a nkgang monate, ka fa botswerereng jwa modira malao a a nkgang monate.