Matlapa a le mabedi a melao
1Jehofa a raya Moše a re: “Betla matlapa a le mabedi a a tshwanang le a ntlha; mme ke tlaa kwala mo matlapeng ao mafoko a a neng a le mo matlapeng a ntlha, a o a thubileng. 2E re ka moso o bo o ipaakantse, mo mosong o tlhatlogele mo thabeng ya Sinai, o iponatse fa pele ga me gone kwa tlhoreng ya thaba. 3Go se nne motho ope yo o tlhatlogang nao, le gone go se ka ga bonwa motho ope mo thabeng yotlhe fela; le matsomane le matlhape a se ka a fula fa pele ga thaba eo.” 4Moše a betla matlapa a le mabedi a a tshwanang le a ntlha; mme a phakela a tlhatloga thaba ya Sinai, jaaka Jehofa a mo laotse, a tshotse matlapa a mabedi mo seatleng sa gagwe.
5Jehofa a fologa a le mo lerung, a ema nae gone, mme a utlwatsa leina la ga Jehofa. 6Jehofa a feta fa pele ga gagwe, a utlwatsa, a re: “Jehofa, Jehofa, Modimo o o tletseng bopelotlhomogi, o o tsalano, o o bonya go galefa, le o o letlotlo la boutlwelo botlhoko le boammaaruri; 7o o bolokelang ba makgolokgolo boutlwelo botlhoko, o o itshwarelang tshiamololo, le tlolo, le boleo; le o o se ketlang o golola yo o molato gope; o o beletsang bana ba batho tshiamololo ya borraabo, le bana ba bana, go ya go fitlha mo kokomaneng ya boraro le ya bone.”
8Moše a akofa a ikobela tlhogo fa fatshe, a obama. 9A re: “Fa jaana ke bonye tsalano mo matlhong a gago Jehofa, ke a go rapela, a Jehofa a ke a tsamaye mo gare ga rona; gonne ke tšhaba e thamo e thata; o re itshwarele tshiamololo le boleo jwa rona, o re tseye re nne boswa jwa gago.”
Kgolagano e a ntšhafadiwa
10A re: “Bona, ke dira kgolagano; fa pele ga batho botlhe ba gago ke tlaa dira dikgakgamatso, tse di iseng di ke di dirwe mo lefatsheng lotlhe, le fa e le mo morafeng ope; batho botlhe ba o mo go bone ba tlaa bona tiro ya ga Jehofa, gonne se ke se dirang nao se a boitshega. 11O tshegetse se ke se go laolelang gompieno; ke leleka fa pele ga gago Moamore, le Mokanana, le Mohite, le Moperise, le Mohife le Mojebuse. 12O itise, o se ka wa dira kgolagano le banni ba lefatshe le o yang kwa go lone, gore e se ka ya nna seru mo gare ga lona. 13Lo tlaa rutla dibeso tsa bone, lo thubaganye difikantswe tse di motloutlo tsa bone, lo reme medimako ya bone.
14“Gonne ga o ketla o obamela modimo ope o sele; gonne Jehofa yo leina la gagwe go tweng, Kelefufa, ke Modimo o o lefufa ruri: 15O ka tla wa dira kgolagano le banni ba lefatshe, wa akafalela medimo ya bone, wa isetsa medimo ya bone tshupelo, mme mongwe a go bitse, mme o ye go ja tshupelo ya gagwe; 16wa tseisa bomorwao bomorwadia bone; bomorwadia bone ba akafalele medimo ya bone, ba fepe bomorwao, le bone ba akafalele medimo ya bone.
17“O se ka wa itirela medimo epe e e thelwang.
18“O tshegetse modiro wa senkgwe se se sa bedisiwang. O je senkgwe se se sa bedisiwang ka malatsi a supa jaaka ke go laotse, ka lobaka lo lo tlhomilweng, ka kgwedi ya Abibe; gonne o dule kwa Egepeto ka kgwedi ya Abibe.
19“Botlhe ba maitibolo ke ba me; le tse ditonanyana mo dikgomong tsotlhe tsa gago, e bong maitibolo a kgomo le a sehutshane. 20Leitibolo la esela o le rekolole ka sehutshanyane; mme fa o gana go le rekolola, o le komole thamo. Batsalwapele mo go bomorwao o ba rekolole. Ga go na ope yo o tlaa bonalang fa pele ga me a iphotlhere fela.
21“O dire ka malatsi a le marataro, mme ka letsatsi la bosupa o ikhutse: mo lobakeng lwa go lema le lwa go roba, le gone o ikhutse.
22“O tshegetse modiro wa dibeke; e bong wa mabutswapele a thobo ya mabele, le modiro wa go rora mabele mo bokhutlong jwa ngwaga.
23“Lonna lotlhe lwa gago lo bonale gararo ka ngwaga fa pele ga Jehofa Modimo, Modimo wa Iseraele. 24Gonne merafe ke tlaa e kgopholela kwa ntle fa pele ga gago, ke tlaa atlhamolosa melelwane ya gago; le gone ga go na motho ope yo o tlaa eletsang lefatshe la gago, mogang o yang go bonala fa pele ga Jehofa Modimo wa gago gararo ka ngwaga.
25“O se ka wa isa madi a tshupelo ya me a na le senkgwe se se bedisitsweng; le gone tshupelo ya modiro wa tlolaganyo e se ka ya salela moso.
26“Sa ntlha sa mabutswapele a lefatshe la gago o se ise mo ntlong ya ga Jehofa Modimo wa gago. O se ka wa tlhadia potsane ka maši a mmaayo.”
27Jehofa a raya Moše a re: “Kwala mafoko a; gonne ke dirile kgolagano le wena le Iseraele ka fa mafokong a.” 28A nna gone le Jehofa ka malatsi a le 40, le masigo a le 40; ga a ka a ja dijo, le fa e le go nwa metsi. Mme a kwala mo matlapeng mafoko a kgolagano, e bong mantswe a a some.
Moše o fologa thaba ya Sinai
29Ga dirala ya re Moše a fologa mo thabeng ya Sinai a na le matlapa a tshupo mo seatleng a bo a sa itse fa letlalo la sefatlhogo sa gagwe le phatsima, ka a buile le Jehofa. 30E rile Arone le bana botlhe ba Iseraele ba leba Moše, letlalo la sefatlhogo sa gagwe la bo le phatsima; ka moo ba boifa go mo atamela. 31Moše a ba tlhaeletsa; Arone le balaodi botlhe ba phuthego ba boela kwa go ene; mme Moše a bua nabo. 32Morago bana ba Iseraele botlhe ba atamela; a ba laolela tsotlhe tse Jehofa o di buileng nae mo thabeng ya Sinai. 33E ne e tle e re Moše a wetsa go bua nabo, a beye losire mo sefatlhogong sa gagwe. 34E ne e re fa Moše a tsena fa pele ga Jehofa a ya go bua nae a tlose losire, go tsamaya a tswe; mme a tswe a bue le bana ba Iseraele se o se laoletsweng. 35Bana ba Iseraele ba bone sefatlhogo sa ga Moše, fa letlalo la sefatlhogo sa ga Moše le phatsima; Moše a beye losire mo sefatlhogong sa gagwe gape go tsamaya a tsene a ye go bua nae.
