EKESODO 21

₁“Jaana dikatlholo tse o tlaa di bayang fa pele ga bone ke tse. ₂E re fa o reka motlhanka e le Mohebere, a dire ka dinyaga di le thataro; e re ka ya bosupa a tswe a gololegile, e seng ka sepe. ₃E re fa a tsile a le esi, a tswe a le esi; fa a tsere mosadi, foo mosadi wa gagwe a tswe nae. ₄Fa mong wa gagwe a mo tseisitse mosadi, mme mosadi yoo a bona bana nae ba basimane, le fa e le ba basetsana; mosadi le bana ba gagwe e nne ba mong wa gagwe, monna ene a tswe a le esi. ₅Fa motlhanka a ka itlhomamisa sentle a re: ‘Ke rata mongwake le mosadi wa me, le bana ba me; ke gana go tswa ke gololegile.’ ₆Foo mong wa gagwe a mo ise kwa baatlhoding, a mo ise fa mojakong wa ntlo, le fa e le fa mophakwaneng wa mojako; mme mong wa gagwe a mo phunye tsebe ka thoko; mme a mo direle ka bosakhutleng.

₇“E re fa motho a rekisa morwadie gore a nne lelata, lelata le se ka la tswa jaaka batlhanka ba e leng banna. ₈E re fa a sa kgatlhe mong wa gagwe fa a mo nyetse, foo a mo lese a rekololwe; go mmapaletsa mo bathong ba morafe o sele ga a na thata epe gonne o mo diretse ka tsietso. ₉Fa a mo tseisitse morwawe, a mo direle jaaka mokgwa wa ba e leng bomorwadia motho. ₁₀Fa a tsaya mosadi yo mongwe a se ngotle dijo tsa gagwe, le fa e le diaparo tsa gagwe, le fa e le tshwanelo ya gagwe ya nyalo. ₁₁Fa a sa mo direle dilo tse tharo tse, foo a tswe fela a sa rekololwe ka sepe, le fa e le ka madi.

₁₂“Yo o itayang monna mme aa swa, ruri a bolawe. ₁₃Fa motho a sa mo lalele, mme Modimo o mo tsenya fela mo seatleng sa gagwe; foo ke tlaa go kaela felo gongwe kwa o ka tshabelang gone. ₁₄Fa motho a tla ka bomo mo go mongwe ka ene, a tla go mmolaya ka tsietso; o mo tlose mo sebesong sa me, gore a swe.

₁₅“Yo o itayang rraagwe le fa e le mmaagwe, ruri a bolawe.

₁₆“Le yo o utswang monna, a mo rekisa, gongwe fa a fitlhelwa mo seatleng sa gagwe, ruri a bolawe.

₁₇“Le yo o rogang rraagwe le fa e le mmaagwe, ruri a bolawe.

₁₈“Fa banna ba lwa mme mongwe a gatla yo mongwe ka lentswe, gongwe a mo tlhanya ka letswele, mme a se ka a swa, mme a nna mo bolaong fela; ₁₉fa a ka ba a tsoga, a tsamaya a ikokotlela ka lore, foo motho yo o mo iteileng o tlaa bo a se na molato; fa e se gore a mo duele go ikoka ga gagwe fela, gape a mmatlele kalafo a ba a tle a folele ruri.

₂₀“Fa motho a itaya motlhanka wa gagwe, le fa e le lelata la gagwe ka thobane, mme a swela mo atleng sa gagwe; ruri a busolosiwe. ₂₁Le fa go ntse jalo, fa a ka tlhola gangwe fela, le fa e le gabedi, a se busolosiwe; gonne ke madi a gagwe.

₂₂“E re fa banna ba lwa, ba bo ba utlwisa mosadi mongwe yo o ithweleng botlhoko, a bo a senyegelwa, mme a sa dirafalelwe ke molato ope kwa morago; ruri a lefisiwe ka fa monna wa mosadi yoo o tlaa lopang ka gone, mme a duele ka fa baatlhodi ba atlholang ka gone. ₂₃E re fa molato o ka sala o mo dirafalela kwa morago, foo o beye botshelo mo boemong jwa botshelo. ₂₄Leitlho le tswelwe ke leitlho, leino ke leino, letsogo ke letsogo, lonao ke lonao. ₂₅Phiso ke phiso, ntho ke ntho, thupa ke thupa.

₂₆“Fa monna a itaya motlhanka wa gagwe, le fa e le lelata la gagwe leitlho, a le senya; a mo lese a tsamaye fela a gololegile ka ntlha ya leitlho la gagwe. ₂₇Fa a kgola motlhanka wa gagwe le fa e le lelata la gagwe leino, ka go mo itaya; a mo lese a tsamaye a gololegile ka ntlha ya leino la gagwe.”

₂₈“E re fa kgomo e ka tlhaba monna le fa e le mosadi gore a swe, ruri kgomo eo e kgobotlediwe ka maje, nama ya yone e se jewe; mong wa kgomo o tlaa bo a se na molato. ₂₉Fa kgomo eo e tlwaetse go tlhaba gale, mme go boleletswe mong wa kgomo, mme a se ka a e kganela, ya bo ya bolaya monna le fa e le mosadi; kgomo eo a e kgobotlediwe ka maje, mong wa yone le ene a bolawe. ₃₀E re fa go lopiwa mo go ene serekololo, foo a a ntshe se o se lopiwang go rekolola botshelo jwa gagwe ka sone. ₃₁Le fa e tlhabile ngwana wa mosimane, le fa e le wa mosetsana, a a direlwe ka fa katlholong e. ₃₂Fa kgomo e tlhabile motlhanka le fa e le lelata, mong wa yone a neye mong wa bone, dišekela di le masome mararo tsa selefera, mme kgomo a e kgobotlediwe ka maje.

₃₃“Fa monna a ka khurumolola mokole, gongwe motho a ka epa mokole mme a se ka a o khurumela, mme kgomo e wela mo go one, le fa e le esela, ₃₄a mong wa mokole a di emisetse; a neye mong wa tsone madi, mme se se suleng e nne sa gagwe.

₃₅“Fa kgomo ya monna e utlwisa kgomo ya yo mongwe botlhoko, gore e swe; foo a ba rekise kgomo e e tshedileng, ba kgaogane tlhwatlhwa ya yone; le e e suleng ba e kgaogane. ₃₆Gongwe fa go ne go itsiwe fa kgomo eo e tlwaetse go tlhaba gale, mme mong wa yone a se ka a e kganela; ruri a a lefe kgomo ka kgomo e nngwe, mme e e suleng e nne ya gagwe.”