Baiseraele kwa thabeng ya Sinai
1E rile ka kgwedi ya boraro bana ba Iseraele ba sena go tswa mo Egepeto, ka lone tsatsi leo ba fitlha mo nageng ya Sinai. 2E rile ba sena go tloga kwa Refidime, ba fitlha mo sekakeng sa Sinai, ba thibelela mo sekakeng, Iseraele a thibelela gone fa pele ga thaba. 3Moše a tlhatlogela kwa Modimong, mme Jehofa, a mo tlhaeletsa a le mo thabeng a re: “Bua jaana le ntlo ya ga Jakobe, o bolelele bana ba Iseraele; 4o re: Lo bonye se ke se diretseng Baegepeto, le jaaka ke lo rwele ka diphuka tsa bontswi ka lo lere mo go nna. 5Ke gone, fa ruri lo ka reetsa lentswe la me, lwa tshegetsa kgolagano ya me, foo lo tlaa nna boswabotshwerwe jwa me go feta ditšhaba tsotlhe; gonne lefatshe lotlhe ke la me; 6lo tlaa bo lo ntse bogosi jwa baperesiti mo go nna, le morafe o o boitshepo. A, ke mafoko a o tla a buang le bana ba Iseraele.” 7Moše a tla a bitsa bagolwane ba batho, mme mafoko otlhe a Jehofa o a mo laoletseng, a a baya fa pele ga bone. 8Batho botlhe ba fetolela gongwe ba re: “Gotlhe mo Jehofa o go buileng re tlaa go dira.” Mme Moše a ya a kakanyetsa Jehofa mafoko a batho.
9Jehofa a raya Moše a re: “Bona, ke ya koo go wena ka leru le le kwenneng gore e tle e re ke bua nao batho ba utlwe, le gone ba itse go go dumela ka bosakhutleng.” Moše a bolelela Jehofa mafoko a batho. 10Jehofa a raya Moše a re: “Ya kwa bathong o ba itshepise gompieno le ka moso, ba tlhatswe diaparo tsa bone. 11E re ka letsatsi la boraro boo ba iketleeditse, gonne e tlaa re ka letsatsi la boraro Jehofa o tlaa fologela mo thabeng ya Sinai mo ponong ya batho botlhe. 12O beele batho melelwane mo tikologong ya thaba o re: ‘Lo ikefe, gore lo se tlhatlogele kwa thabeng, le fa e le go ama moripo wa yone; le fa e le mang yo o tlaa amang thaba o tlaa swa ruri: 13Fa seatla sengwe se ka e ama, ruri motho yoo o tlaa kgobotlediwa ka maje, le fa e le go phololediwa; le fa e ka nna kgomo, lefa e le motho, ga e ketla e tshela.’ Motlhang phala e lelang ka boleele, ba ka tlhatloga thaba.”
14Moše a fologa thaba a ya kwa bathong, a itshepisa batho; mme ba tlhatswa diaparo tsa bone. 15A raya batho a re: “E re ka letsatsi la boraro lo bo lo iketleeditse; lo se ka lwa atamela mosadi ope.”
16Ga dirala ya re ka letsatsi la boraro bosigo boo sa, ga bo go le ditumo tsa maru le dikgadima, ga bo go le leru le le kwenneng le le mo thabeng, le go gelebetega ka thata ga lonaka: mme batho botlhe ba ba mo bothibelelong ba roroma. 17Moše a bolotsa batho mo bothibelelong ba ya go kopana le Modimo; ba ya ba ema fa moripong wa thaba. 18Thaba ya Sinai ya bo e kua mosi gotlhe fela, gonne Jehofa a fologetse mo go yone a le mo molelong; mme mosi wa yone wa tlhatloga jaaka mosi wa leiso la leubelo, thaba yotlhe ya reketla thata. 19E rile go gelebetega ga lonaka go golela pele Moše a bua, mme Modimo wa mo fetola ka lentswe. 20Jehofa a fologela mo thabeng ya Sinai fa tlhoreng ya thaba; Jehofa a biletsa Moše kwa tlhoreng ya thaba; Moše a tlhatloga. 21Jehofa a raya Moše a re: “Fologa o ye go laya batho, ka ba ka tla ba tlhagelela kwa go Jehofa go leba, mme ba a swa ba le bantsi. 22Le bone baperesiti, ba ba atamelang kwa go Jehofa, a ba iitshepise, e se re kgotsa Jehofa a ba phomegela.”
23Moše a raya Jehofa a re: “Batho ga ba kake ba tlhatloga thaba ya Sinai, gonne o re laotse wa re: ‘Bayang melelwane mo tikologong ya thaba, lo e itshepise.’ ”
24Jehofa a mo raya a re: “Tsamaya, o fologe; o tlaa itse go tlhatloga o na le Arone; baperesiti le batho ba se phomesegele go tla go tlhatlogela kwano go Jehofa, e se re kgotsa a ba phomegela.” 25Jalo Moše a fologela kwa bathong, a ba bolelela.
